Wok Tisa Bilong Yu i Gutpela?

OL PAPAMAMA, ol elda, na ol manmeri i autim gutnius​—⁠olgeta i mas mekim wok tisa. Ol papamama i skulim ol pikinini, ol elda i skulim ol manmeri long kongrigesen Kristen, na ol manmeri i autim gutnius ol i skulim ol nupela man i laik kisim save. (Lo 6:​6, 7; Matyu 28:​19, 20; 1 Timoti 4:​13, 16) Yu ken mekim wanem na bai wok tisa bilong yu i kamap gutpela moa? Wanpela rot em long bihainim pasin bilong ol gutpela tisa em Baibel i stori long ol. Esra i wanpela gutpela tisa olsem.

Kisim Skul Long Pasin Bilong Esra

Esra i wanpela pris long lain bilong Aron. Em i bin stap long Babilon inap 2,500 yia i go pinis. Long yia 468 B.C.E., em i go long Jerusalem bilong helpim wok bilong lotu i tru i kamap bikpela namel long ol Juda i stap long hap. (Esra 7:​1, 6, 12, 13) Bilong mekim olsem em i mas skulim ol manmeri long Lo bilong God. Esra i bin mekim wanem na bai wok tisa bilong em inap kamapim gutpela samting? Em i bin mekim sampela bikpela samting. Tingim ol dispela samting em Esra 7:10 i kolim:

“Esra i man bilong [1] wok strong [“redim bel,” NW ] long [2] kisim save long lo bilong Bikpela na [3] long bihainim gut dispela lo. Na tu em i wok [4] long skulim gut ol Israel long olgeta tok bilong lo.” Yumi ken skelim wan wan bilong ol dispela samting na bai ol inap givim save long yumi.

Esra i Redim Bel

Fama i save brukim na redim graun paslain long em i planim pikinini kaikai, na olsem tasol Esra i beten na redim bel long kisim ol tok bilong God. (Esra 10:⁠1) O yumi ken tok em i “wok strong” long kisim ol tok bilong Jehova.​—⁠Sindaun 2:⁠2.

Baibel i stori tu olsem King Jehosafat i bin “redim bel bilong [em] long painim God tru.” (2 Stori 19:​3, NW ) Tasol wanpela lain Israel bilong bipo em ol i no bin redim bel bilong ol, Baibel i tok long ol olsem ol i “bikhet na sakim tok.” (Song 78:⁠8) Jehova i save lukim pasin tru i stap “insait” long bel. (1 Pita 3:⁠4) Yes, ol man i daun long em, ‘em i save skulim ol long rot bilong em.’ (Song 25:⁠9) Olsem na em i bikpela samting long ol man i mekim wok tisa long nau long bihainim pasin bilong Esra. Namba wan samting long mekim em long beten na redim bel bilong ol!

“Kisim Save Long Lo Bilong Bikpela”

Bilong mekim gutpela wok tisa, Esra i bin mekim wok long ol tok bilong God. Sapos yu go lukim dokta, ating bai yu putim gut yau na givim bel long save gut long ol tok bilong em o marasin em i makim, a? Yes, bai yu mekim olsem, long wanem, dispela bai helpim yu. Olsem na em i bikpela samting moa yet long putim gut yau long ol samting Jehova i tokim yumi, o em i makim bilong yumi mas mekim, long rot bilong ol tok bilong em long Baibel, na “wokboi i gat gutpela tingting.” Yumi mas putim gut yau, long wanem, ol tok bilong em bai helpim yumi long kisim laip! (Matyu 4:4; 24:​45-47) Tru, tok bilong dokta inap popaia, tasol “lo bilong Bikpela em i stret olgeta.” (Song 19:⁠7) Bai i no gat wok long yumi mas askim narapela man bilong save olsem tok bilong God i tru o nogat.

Ol buk bilong Baibel olsem Namba 1 Stori na Namba 2 Stori (pastaim Esra i raitim olsem wanpela buk tasol) ol i soim olsem Esra i save mekim gut tru ol wok bilong em. Bilong raitim ol dispela buk, em i bin skelim planti narapela buk pastaim.a Ol Juda i bin lusim Babilon na i kam bek, na ol i mas i gat stretpela stori long ol samting i bin kamap long kantri bilong ol long bipo. Ol i no save tumas long ol samting ol i mas mekim bilong tingim ol bikpela de bilong lotu bilong ol, na ol wok ol i mas mekim long tempel, na ol wok bilong lain Livai. Ol lista i kolim lain tumbuna em i bikpela samting long ol. Olsem na Esra i kamapim gut ol dispela samting. Inap long taim Mesaia i kamap, ol Juda i mas stap olsem wanpela lain i gat graun bilong ol yet, wantaim wanpela tempel, lain pris, na gavena. Ol tok Esra i kamapim i lukautim ol Juda na ol inap stap wanbel na mekim lotu i tru.

Olsem wanem? Pasin bilong yu long stadi i wankain long pasin bilong Esra? Pasin bilong givim bel long stadi long Baibel bai helpim yu long skulim gut ol man long ol tok bilong Baibel.

“Kisim Save Long Lo Bilong Bikpela” Olsem Famili

Yumi kisim save long lo bilong Jehova taim yumi mekim stadi bilong yumi yet na i no long dispela taim tasol, nogat. Famili-stadi tu i gutpela taim bilong mekim olsem.

Jan na Julia, em tupela marit long Netelan, ol i bin ritim ol stori long tupela pikinini man bilong ol kirap long taim mama i karim ol. Long nau, Ivo i gat 15 krismas na Edo i gat 14 krismas. Ol i save mekim yet famili-stadi bilong ol wanpela taim long wik. Jan i tok: “Nambawan tingting bilong mipela em i no long inapim planti paragraf long taim bilong stadi, tasol em bilong helpim tupela mangi long klia gut long ol samting mipela i stadi long en.” Em i tok moa: “Tupela pikinini i save skelim ol buk na nius bilong kisim sampela save moa. Ol i save mekim sampela wok painimaut long ol tok em ol i no save long en, na ol man em Baibel i stori long ol​​—⁠ol i bin i stap long wanem taim, ol i husat, wanem wok bilong ol, na ol kain samting olsem. Kirap long taim ol i lain long rit, ol i mekim wok long ol kain buk olsem Insight on the Scriptures, ol dikseneri, na ol narapela bikpela buk. Dispela i mekim na famili-stadi i kamap gutpela moa. Ol pikinini i save amamas na redi i stap long taim bilong mekim famili-stadi.” Famili-stadi i helpim ol pikinini long narapela samting tu, olsem ol i winim ol wanklas bilong ol long save bilong ol long mekim wok long tok ples bilong ol.

John na Tini, em narapela tupela marit long Netelan, ol i bin stadi wantaim pikinini man bilong ol, Esli (nau em i gat 24 krismas na em i mekim wok painia long narapela kongrigesen), na pikinini meri bilong ol, Linda (nau em i gat 20 krismas na em i marit long wanpela gutpela yangpela brata). Tasol ol i no bin bihainim pasin bilong stadi long wanpela buk long rot bilong ol askim na bekim, nogat. Ol i senisim pasin bilong mekim famili-stadi na bai i stret long krismas bilong ol pikinini na long ol samting ol i mas save long en. Ol i bin bihainim wanem pasin?

John i tok tupela pikinini i save makim wanpela het-tok bilong “Askim” (long Wastaua) na “Baibel i Tok Wanem?” (long Kirap!). Bihain, ol i stori long ol samting ol i bin kisim save long en, na dispela i helpim famili long toktok gut wantaim. Long dispela rot ol pikinini i bin lain long pasin bilong skelim ol buk na nius bilong kisim sampela save moa, na long pasin bilong stori long ol samting ol i bin skelim. Olsem wanem? Yu “kisim save long lo bilong Bikpela” wantaim ol pikinini bilong yu? Dispela bai helpim wok tisa bilong yu yet long kamap gutpela moa, na tu, em bai helpim ol pikinini bilong yu long kamap gutpela tisa moa.

“Long Bihainim Gut Dispela Lo”

Esra i bihainim ol samting em i kisim save long en. Olsem: Taim em i bin i stap long Babilon, ating em i gat gutpela sindaun. Tasol, taim em i luksave olsem em inap helpim ol lain bilong em, em i lusim gutpela sindaun bilong em long Babilon na go long taun Jerusalem i stap longwe. Taun Jerusalem i gat planti hevi, na ol samting inap kamap bilong bagarapim em. Esra i bin wok strong long kisim save long Baibel, tasol tu em i kamapim klia olsem em i redi long mekim ol pasin i stret wantaim save em i bin kisim.​—⁠1 Timoti 3:⁠13.

Bihain, taim Esra i stap long Jerusalem, pasin bilong em i kamapim gen olsem em i save bihainim ol samting em yet i bin kisim save long en na ol samting em i skulim ol man long en. Dispela i kamap klia taim em i harim tok long ol man Israel i maritim ol meri haiden. Stori bilong Baibel i kamapim olsem Esra i ‘brukim klos bilong em na kamautim sampela gras long het na long wasket bilong em na tingting bilong em i pas tru na em i sindaun nating i stap inap long apinun.’ Na tu, em i “sem nogut tru” long beten long Jehova.​—⁠Esra 9:​1-6.

Em i stadi long Lo bilong God na dispela i bin mekim bikpela samting long em! Esra i save gut long wanem ol hevi bai kamap long pasin bilong ol manmeri long sakim tok. Ol Juda i kam bek long ples ol i liklik lain tasol. Sapos ol i marit long ol narapela lain, ating isi isi ol bai kamap wanlain bilong ol lain haiden i stap klostu, na em bai isi long lotu i tru i pinis olgeta!

Gutpela tru, pasin bilong Esra long pret na givim bel long God i kirapim ol Israel long stretim pasin bilong ol. Ol i rausim ol meri bilong narapela lain em ol i bin maritim. Insait long tripela mun ol i stretim pinis dispela hevi. Pasin bilong Esra yet long daun long Lo bilong God i helpim wok tisa bilong em long kamapim gutpela samting.

Long nau tu i wankain. Wanpela papa Kristen i tok: “Ol pikinini i no save bihainim ol tok yu mekim, nogat, ol i save bihainim ol samting yu yet yu mekim!” Wankain samting olsem i save kamap insait long kongrigesen Kristen. Ol elda i stap olsem ol gutpela piksa, ol i ken ting olsem kongrigesen bai bihainim ol tok ol i skulim ol long en.

“Long Skulim Gut Ol Israel Long Olgeta Tok Bilong Lo”

I gat narapela samting moa i mekim na wok tisa bilong Esra i kamapim gutpela samting. Em i no skulim ol man long tingting bilong em yet, nogat, em i skulim ol man long “olgeta tok bilong lo.” Em ol lo bilong Jehova. Dispela em wok em i mas mekim olsem pris. (Malakai 2:⁠7) Na tu, em i skulim ol man long bihainim stretpela pasin, na long rot bilong bihainim gut ol lo na mekim ol samting i stret, em i stap gutpela piksa long ol samting em i skulim ol man long en. Taim ol man i holim namba ol i mekim stretpela pasin, dispela i save mekim na ol samting i wok gut na em bai stap olsem inap longpela taim. (Sindaun 29:⁠4) Olsem tasol, ol elda Kristen, ol papamama, na ol man bilong autim tok bilong Kingdom, em ol lain i save gut long Tok Bilong God, ol bai strongim ol narapela long ol samting bilong spirit taim ol i skulim ol long lo bilong Jehova na stretpela pasin insait long kongrigesen, long famili, na long ol man i laik harim tok.

Ating yu wanbel long dispela tok olsem wok tisa bilong yu tu inap kamapim gutpela samting taim yu bihainim gut pasin bilong Esra. Olsem na ‘wok strong [“redim bel,” NW ], kisim save long lo bilong Bikpela, bihainim gut dispela lo, na skulim gut ol man long olgeta tok bilong lo.’​—⁠Esra 7:⁠10.

[Futnot]

[Blok/Piksa long pes 22]

WANEM OL SAMTING I MEKIM NA WOK TISA BILONG ESRA I KAMAPIM GUTPELA SAMTING?

1. Em i redim gut bel pastaim

2. Em i mekim wok long Lo bilong Jehova

3. Em i stap gutpela piksa long bihainim ol samting em i lainim

4. Em i skulim ol man long ol tok i stap long Baibel