Spesel Wok Bilong Tilim Liklik Nius Long Oktoba 20–Novemba 16!
1 Kirap long Mande, Oktoba 20, na i go inap 4-pela wik bihain, yumi bai insait long wanpela spesel wok bilong tilim nupela liklik nius, nem bilong en Yu Laik Save Long Tok i Tru? Mipela i bilip olsem dispela spesel wok yumi mekim long olgeta hap bilong graun bai kirapim laik bilong planti man long kisim save long as bilong tok i tru.—Jo. 17:17.
2 Dispela liklik nius i kamapim gutpela bekim bilong Baibel long 6-pela bikpela askim olsem: “Tru tru God i save tingim yumi?” “Woa na pen na hevi bai pinis bihain?” “Wanem samting i painim yumi taim yumi dai?” “Gutpela samting bai painim ol man i dai pinis?” “Bai mi beten olsem wanem na God i ken harim?” na “Olsem wanem mi inap i stap amamas?” Ol lotu i gat nem Kristen i no kamapim stretpela bekim bilong ol dispela askim. Na tu, planti man em ol i no Kristen ol i bin tingting planti long ol dispela askim, tasol ating ol i no save olsem stretpela bekim bilong ol dispela askim i stap long Baibel. Olsem na yumi save planti manmeri bai i laikim dispela tok.
3 Inapim Teritori: Wok strong long inapim ol teritori bilong yupela em yupela i save mekim wok autim tok long en. Sapos yupela i gat bikpela teritori, ol elda inap tokim yupela long lusim liklik nius long haus i no gat man long namba wan taim yupela i autim tok long dispela hap. Yupela i ken givim dispela liklik nius long ol neiba, ol famili, ol wanwok, ol wanskul, na ol narapela em yupela save toktok wantaim ol planti taim. Ating yu ken stretim rot bilong mekim wok painia haptaim long Oktoba o Novemba. Olsem wanem? Yu gat wanpela pikinini o wanpela Baibel stadi husat i wok long kamap strong na i winim ol mak bilong kamap pablisa i no baptais bilong em i ken insait long dispela wok? Sapos olsem, orait toktok wantaim ol elda.
4 Tok Bilong Tilim Nius: Bilong yumi ken autim tok long planti manmeri, yumi mas mekim sotpela tok tasol. Kamapim wanpela bilong ol dispela 6-pela askim i stap long karamap bilong nius long man bilong haus, na bihain soim bekim i stap insait long liklik nius. Dispela bai mekim na ol pablisa bai senisim pasin bilong mekim tok na mekim tok i stret long teritori bilong yupela. Sapos wanpela i soim olsem em i gat laik long harim tok, orait stretim rot bilong i go bek na lukim em. Long ol wiken, yu ken tilim dispela liklik nius wantaim magasin ol i makim bilong tilim long dispela mun. Bihain long dispela spesel wok i pinis long Novemba 16, bai yumi tilim buk Baibel i Tok. Sapos sampela liklik nius i stap yet, orait bai yumi tilim long wankain pasin olsem yumi save tilim ol arapela liklik nius.
5 Kirapim Baibel Stadi: Ol i bin wokim dispela liklik nius bilong helpim yumi long kirapim ol Baibel stadi. Taim yu mekim gobek long wanpela husat i gat laik long harim tok, yu inap askim em long wanem tok bilong Baibel i bin mekim gut bel bilong em. Soim em long ol tok i stap long baksait bilong dispela liklik nius i stori long pasin bilong mekim Baibel stadi na givim buk Baibel i Tok long em. Sapos inap, stori liklik long wanpela o tupela paragraf long sapta i gat sampela tok moa long samting em i gat laik long save long en.
6 Jehova i wok long painim ol manmeri husat bai i lotuim em long “Holi Spirit na long pasin i tru.” (Jo. 4:23) Yumi olgeta i laik insait long dispela spesel wok bilong helpim ol narapela man long kisim save long tok i tru!