Yusim Long Olgeta Kain Taim

1. Nius Save Long Tok i Tru inap helpim yumi long mekim wanem wok?

¹ Ol i bin wokim nius Yu Laik Save Long Tok i Tru? bilong helpim yumi long kirapim ol Baibel stadi. Na tu, em i gutpela tul yumi ken yusim bilong planim ol sid bilong tok i tru. (Sav. 11:⁠6) Em hia sampela rot bilong helpim yumi long mekim gutpela wok long dispela nius.

2. Olsem wanem yumi ken yusim nius Save Long Tok i Tru bilong kirapim tok?

² Bilong Kirapim Tok: Yu ken givim nius long man bilong haus, na soim 6-pela askim i stap long fran pes, na askim em: “Yu yet i save tingting planti long wanem askim i stap long hia?” Taim em i bekim pinis, orait opim nius na stori wantaim em long bekim bilong dispela askim na ritim wanpela skripsa i stap long nius em ol i no kamapim tok bilong en. Ritim o stori liklik long laspela pes na soim em buk Baibel i Tok. Maski sapos em i no laik kisim buk, em i kisim pinis nius, na dispela inap opim rot long tok i tru i ken go daun long bel bilong em.​—⁠Mt. 13:⁠23.

3. Sapos man bilong haus i bisi, orait yumi ken mekim wanem?

³ Sapos Man i Bisi: Yu ken tok: “I luk olsem yu bisi long nau, olsem na mi laik givim yu dispela nius. Dispela nius i kamapim 6-pela askim em planti bilong yumi i save tingting long en, na tu, nius i kamapim tok Baibel i mekim bilong bekim stret ol dispela askim. Taim mi kam lukim gen, yu ken tokim mi long wanem tingting yu gat taim yu ritim dispela nius.”

4. Taim yumi sanap long rot na autim tok, yumi ken tok wanem taim yumi laik tilim nius Save Long Tok i Tru?

⁴ Taim Yumi Sanap Long Rot na Autim Tok: Yu ken tok: “Halo. Yu lukim ol dispela askim i stap long hia, yu yet i save tingting planti long wanem askim? [Larim man i bekim tok.] Dispela nius i kamapim ol gutpela bekim i stap long Baibel.” Sapos em i no hariap long go, ating yu inap stori wantaim em long wanpela bilong ol bekim i stap long nius na soim em buk Baibel i Tok.

5. Sapos man i no stap long haus, yumi ken mekim wanem long nius Save Long Tok i Tru?

⁵ Sapos Man i No Stap Long Haus: Long sampela ples, taim pablisa i go long haus na i no gat man i stap, pablisa i save putim nius long wanpela hap bilong haus we ol narapela man i no inap lukim. Sapos kongrigesen bilong yupela i save mekim olsem, orait sampela taim yu ken lusim nius Save Long Tok i Tru long haus. Taim yu kam bek long dispela haus, yu ken tok: “Taim mipela i bin kam long haus bilong yu long pastaim, yu no bin stap long haus, olsem na mipela i lusim dispela nius long haus bilong yu. Yu yet i laik kisim bekim bilong wanem askim?”

6. Wanem samting long nius Save Long Tok i Tru i mekim na em i gutpela tul bilong yusim long wok autim tok?

⁶ Nius Save Long Tok i Tru i stori gut long tok i tru long pasin we ol man inap kliagut long en. Ol tok bilong en inap kirapim tingting bilong ol man bilong kain kain lotu na bilong kain kain sindaun. Em isi long tilim dispela nius; ol yangpela na ol nupela pablisa wantaim inap tilim. Olsem wanem? Yu save mekim wok long en long olgeta kain taim we i stret long mekim?