Mekim Wok Long Nupela Liklik Nius i Stori Long Web-Sait

Nem bilong dispela liklik nius em Hau Bai Yumi Inap Kisim Bekim Bilong Ol Bikpela Askim Long Laip? I gat tripela askim i stap long baksait bilong liklik nius. Sapos rot i op, askim man, wanem wanpela bilong dispela tripela askim em i laik tru long save long bekim bilong en, na stiaim em i go long Web-sait, long hap BIBLE TEACHINGS > BIBLE QUESTIONS ANSWERED bilong painim bekim. Long dispela hap em bai kisim tu bekim bilong ol dispela askim: Kingdom Bilong God em i wanem samting? Na Kingdom Bilong God bai kamapim wanem gutpela samting?

Long olgeta taim yu raun, yu mas holim dispela liklik nius na bai yu inap helpim ol man long kisim save long ol tok bilong Baibel i stori long ol gutpela samting Kingdom Bilong God bai kamapim long bihain.