Pasin Bilong Kisim Teritori Bilong Yu Yet Bai Helpim Yu Olsem Wanem?
1. Teritori bilong yu yet, dispela i makim wanem kain teritori?
1 Teritori bilong yu yet, dispela i makim wanem kain teritori? Sapos kongrigesen bilong yu i gat bikpela teritori, ating yu gat laik long kisim teritori bilong yu yet, ating klostu long hap yu stap long en. Buk Oganaisesen, pes 103 i tok: “Taim yu gat teritori bilong yu yet klostu long hap yu stap long en, dispela i helpim yu long mekim gutpela wok long haptaim yu gat bilong mekim wok autim tok. Na tu, yu ken singautim arapela pablisa long wok wantaim yu long teritori bilong yu.”
2. Maski yu gat teritori bilong yu yet, olsem wanem yu inap helpim grup bilong autim tok?
2 Helpim Grup Bilong Autim Tok: Sapos yu kisim wanpela teritori klostu long ples wok bilong yu, yu ken autim tok long belo o taim yu pinis wok, yu ken mekim olsem wantaim narapela pablisa em ples wok bilong em i klostu long yu. Na sapos yu kisim teritori klostu long haus bilong yu, yu na famili bilong yu i ken autim tok long dispela hap long ol apinun. Sapos yu no go long bung bilong autim tok, i gutpela long yu beten long Jehova i ken stiaim yu paslain long yu autim tok. (Fili. 4:6) Na tu, yu mas skelim gut taim bilong yu long wok long teritori bilong yu yet na taim bilong yu long autim tok wantaim grup bilong kongrigesen. Moa yet long ol wiken taim planti i bung long autim tok, em i gutpela long sapotim grup bilong autim tok.
3. Taim yu gat teritori bilong yu yet, dispela i helpim yu olsem wanem?
3 Ol Gutpela Samting: Sapos yu gat teritori bilong yu yet, long wanem wanem taim yu inap long autim tok bai yu go tasol long dispela teritori. Yu inap yusim bikpela haptaim long autim tok na yu no westim taim long ron long bas. Pasin bilong kisim teritori bilong yumi yet, dispela i opim rot long sampela pablisa inap mekim wok painia haptaim o painia oltaim. Ol man husat i laik harim tok ol i stap long hap bilong yu, olsem na em i isi long yu mekim ol gobek na ol Baibel stadi. Planti i luksave olsem taim ol i autim tok long teritori bilong ol yet, dispela i helpim ol long kisim gut save long ol man bilong haus na bihain man bilong haus i trastim ol, moa yet sapos yu autim tok long dispela teritori planti taim paslain long yu givim bek na narapela i ken kisim dispela teritori. Olsem wanem? Taim yu na famili bilong yu i gat teritori bilong yupela yet, dispela i helpim yupela long mekim gut wok autim tok?—2 Tim. 4:5.