Pasin Yumi Ken Bihainim Taim Yumi Autim Tok Long Bisnis Teritori
1 Yu laik autim tok long wanpela teritori we ol man i save stap olgeta taim na ol i save amamas long ol man i kam lukim ol? Yu inap mekim olsem long teritori bilong kongrigesen bilong yu. Olsem wanem yu inap mekim olsem? Long rot bilong autim tok long ol stua na bisnis samting i stap long teritori bilong kongrigesen. Planti taim ol pablisa i bin autim tok long ol stua ol i bin amamas long ol gutpela samting i kamap.
2 Teritori bilong sampela kongrigesen i gat planti stua na bisnis samting long en. Ating brata i lukautim teritori i ken wokim sampela mep bilong ol hap i gat planti bisnis long en. Sapos insait long bisnis teritori i gat ol haus slip, em ol i bilong narapela teritori, orait long teritori mep bilong ol haus slip i mas i gat toksave olsem ol i no ken autim tok long ol bisnis i stap long dispela hap. Long sampela ol narapela teritori, ol pablisa i ken autim tok long ol haus na ol ples bisnis wantaim. Sapos bipo yu no bin autim tok long ol bisnis teritori, orait yu ken kirap traim autim tok long ol liklik stua.
3 Mekim Sotpela Tok: Taim yu autim tok long ol stua, em i bikpela samting long yu bilas gut olsem yu laik toktok wantaim ol bisnisman. I gutpela yu autim tok long taim stua i no bisi. Sapos inap, yu ken i go long taim i no gat kastama long stua. Toksave olsem yu laik toktok wantaim maneja o man i lukautim dispela stua. Mekim sotpela tok na tokaut stret long as na yu laik lukim em. Yu ken tok wanem?
4 Taim yu toktok wantaim stuakipa o maneja, yu ken tok olsem: “Ol bisnisman ol i save bisi tru na mipela i no save bungim ol long haus bilong ol, olsem na mipela i kam lukim yu long ples wok bilong yu. Ol magasin bilong mipela i save stori long ol samting i save kamap long nau long olgeta hap.” Orait nau stori liklik long wanpela tok i stap long magasin.
5 O yu ken tok olsem: “Planti man i laik save moa long Baibel tasol ol i no gat bikpela taim. Dispela liklik nius hia i stori long wanpela Baibel stadi kos i no gat pe long en na em bai helpim yu long painim ol bekim bilong ol askim bilong yu long Baibel.” Orait nau soim em p. 4-5 bilong liklik nius Yu Laik Kisim Sampela Save Moa Long Baibel?
6 Sapos yu lukim olsem maneja i bisi, orait yu ken givim wanpela liklik nius na tok: “Bai mi kam bek lukim yu gen long taim yu no bisi. Mi laik save yu gat wanem tingting long dispela liklik nius.”
7 Helpim Ol Man i Harim Tok: Ating yu inap long mekim Baibel stadi wantaim wanpela long bisnis teritori. Wanpela painia salim i save bringim ol nupela magasin long wanpela bisnisman olgeta taim. Taim dispela man i tokaut olsem em i laikim ol tok em i ritim, painia i soim em pasin bilong mekim stadi long buklet Yumi Mas Mekim Wanem? Painia i kirapim stadi long ples wok bilong dispela man. Painia i tingim wok bilong dispela man, olsem na em i mekim stadi insait long 10 i go inap 15 minit samting. Yumi tu, yumi mas wok long painim ol man i gat gutpela bel long rot bilong autim tok long ol bisnis teritori.
[Askim Bilong Stadi]
1. Wanem sampela gutpela samting i kamap taim yumi autim tok long ol bisnis teritori?
2. Olsem wanem ol brata i ken stretim rot bilong autim tok long ol bisnis teritori?
3. Wanem samting bai helpim yumi long autim gut tok taim yumi autim tok long ol stua?
4-6. Yumi ken mekim wanem kain tok taim yumi autim tok long wanpela wokman bilong stua o maneja?
7. Olsem wanem yumi inap helpim ol man yumi bungim long ol bisnis teritori?