Mekim Wok Autim Tok i Kamap Gutpela Moa—Bisnis Teritori

Em i Bikpela Samting: Planti man i mekim wok mani inap planti aua, olsem na em i gutpela long yumi go long ples wok bilong ol na stori wantaim ol long tok bilong Kingdom. Yumi inap kisim amamas long mekim dispela wok, na gutpela samting inap kamap. Ol man bai stap long ples wok, na ol bai mekim gutpela pasin long ol man husat inap kamap kastama bilong ol. Ol pablisa i mas bilas gut na bihainim savetingting. (2 Kor. 6:3) Olsem na wasman autim tok i mas skelim gut hamas taim ol pablisa i autim tok long bisnis teritori, na husat i mekim dispela wok.

Rot Bilong Mekim:

Redim sotpela tok. Sapos yumi pulim bikpela haptaim bilong wokman, em bai les long yumi toktok gen wantaim em long narapela taim.
Makim taim we ol wokman i no bisi tumas, olsem long moning taim i no gat planti kastama.
Pastaim yumi mas toktok wantaim bosman. Soim gutpela pasin pren. Yu ken tok, “Mipela i visitim ol lain long ples wok na stori wantaim ol inap liklik haptaim tasol bikos mipela i no inap bungim ol long haus bilong ol.” Mekim sotpela tok tasol long bosman, tilim liklik nius, ol magasin, o narapela litresa long em. Yumi no laik bai ol man i kisim tingting kranki olsem yumi salim ol buk, olsem na mobeta yumi no ken stori long pasin bilong givim kontribusen. Yumi ken stori long dispela sapos man i laik save long hau yumi kisim mani bilong mekim dispela wok.
Sapos bosman i soim pasin pren, orait askim em sapos yu inap stori liklik wantaim ol narapela wokman. Sampela kampani i gat ples bilong ol wokman long i go kaikai na malolo, olsem na yu ken askim bosman sapos yu inap lusim sampela magasin long dispela hap bambai ol wokman i ken ritim.
Bihainim stretpela tingting, na no ken fosim man long putim yau. Sapos wokman i toktok wantaim kastama o sapos em i bisi, orait yu mas wet inap long em i fri.

Long Dispela Mun, Traim Dispela:

Long neks Famili Lotu, prektisim sotpela tok yu bai mekim sapos yu autim tok long bisnis teritori.