Autim Tok Long Olgeta Haus Long Teritori Bilong Yupela
1 Long hap ol man i save slip long en, sampela taim yumi bungim ol ples bilong bisnis, kain olsem wanpela liklik stua, haus kaikai, o bikpela stua. Sapos ol dispela ples bilong bisnis i stap long hap teritori yumi save autim tok long en, orait yumi mas autim tok tu long ol dispela ples bilong bisnis wantaim ol haus ol man i save slip long en.
2 Yu ken mekim sotpela tok olsem: “Mi gat wanpela samting mi laik soim long yu.” Sapos papa bilong bisnis i gat planti wok tumas, yu ken givim liklik nius long em na tok: “Bai mi kam lukim yu gen taim yu no gat planti wok. Mi laik save yu ting olsem wanem long dispela liklik nius.”
3 Yumi no ken pret o surik long autim tok long ol man bilong stua. Wanpela pablisa i tok: “Mi ting ol man bilong stua bai i no inap harim tok. Tasol mi kirap nogut long pasin ol i mekim, em ol i amamas long harim tok bilong Kingdom. Ol i mekim gutpela pasin tru na pasin pren, na klostu olgeta i kisim ol nius.”
4 Wanpela meri i save wok long wanpela kampani bilong baim haus em i singautim Witnes i go insait long ofis bilong em. Meri i kisim ol nius na i tok em i gat laik long stadi long Baibel. Witnes i soim buk Save long em na long dispela taim yet ol i kirapim stadi insait long ofis bilong em.
5 Dispela wok yupela i kisim bilong autim tok long olgeta haus long teritori bilong yupela, i makim tu olsem yupela i mas go long ol man wan wan em ol i gat ol bisnis. (Ap 10:42) Tingting long autim tok long ol dispela ples i gat bisnis wankain olsem yumi save mekim long ol narapela haus. Long dispela rot bai yumi autim tok long olgeta haus i stap long teritori, na tu yumi inap kisim ol gutpela ekspiriens long dispela wok!
This article is repeated in km 7/98.