“Mipela i Wokim Teritori Bilong Mipela Planti Taim Pinis!”
1 Olsem wanem? Sampela taim yu pilim olsem yupela i save autim tok long teritori bilong yupela planti taim, olsem na i no gat moa ol man i olsem sipsip i stap long en? Ating yu bin tingting: ‘Mi save ol man bai tok wanem. Bilong wanem yumi mas go bek lukim ol dispela man i no laik harim tok?’ Em tru, i gat planti teritori yumi save autim tok planti taim long en. Tasol yumi mas i gat stretpela tingting long dispela samting, na no ken kisim tingting kranki. Bilong wanem? Skelim 4-pela as bilong dispela samting i stap daunbilo.
2 God i Harim Pinis Beten Bilong Yumi: Jisas i tok: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i ken salim ol wokman i go bungim kaikai bilong en.” (Lu. 10:2) Inap planti yia pinis yumi bin beten askim Jehova long givim sampela helpim moa long yumi. Long nau long planti ples, yumi gat planti wokman moa, na yumi wok long autim tok planti taim long ol teritori. Jehova i harim beten bilong yumi na dispela i mas mekim na yumi amamas, a?
3 Pasin Bilong Wok Strong Yet i Kamapim Gutpela Kaikai: Long ol teritori yumi save autim tok planti taim long en, ol man i wok long harim tok bilong Kingdom na kisim save long tok i tru. Olsem na yumi mas go planti taim long ol teritori na ting olsem yumi inap painim sampela man moa i gat gutpela bel. (Ais. 6:8-11) Olsem ol disaipel bilong Jisas bilong bipo i bin mekim, ‘yumi i mas i go oltaim’ long ol manmeri long teritori bilong yumi, na wok strong long kirapim ol long tingim Kingdom bilong God.—Mt. 10:6, 7.
4 Long Potugal, planti kongrigesen i save pinisim teritori bilong ol long olgeta wik, tasol ol i save painim yet ol man i olsem sipsip. Wanpela sista i gat stretpela tingting. Em i tok: “Pastaim long mi go autim tok long olgeta moning, mi save beten askim Jehova long helpim mi long painim wanpela man i gat laik long stadi long Baibel.” Wanpela taim em i stretim rot bilong stadi wantaim ol wokman long wanpela ples bilong wokim na katim gras bilong man. Tasol bihain, wanpela meri tasol i kam long stadi. Dispela meri i tok: “Ol narapela i no laik stadi, tasol mi gat laik.” Insait long wanpela mun dispela meri i kirap stadi long Baibel wantaim tupela meri. I no longtaim na dispela meri i baptais, na bihain em i kirap mekim wok painia!
5 Ol i Wok Yet Long Autim Tok: Olsem Jisas i bin tok profet long en, ol Witnes i wok long autim gutnius. (Mt. 24:14) Na long ol hap ol man “i no save harim tok bilong [yumi],” wok autim tok bilong yumi i save givim tok lukaut long ol. Yumi save sampela bai no laik harim tok i tru, o ol bai birua long en. Tasol yumi mas givim tok lukaut long ol kain man olsem long kot bilong Jehova.—Ese. 2:4, 5; 3:7, 8, 19.
6 Wok i No Pinis Yet: Em i no wok bilong yumi long makim wanem taim wok autim tok bai pinis. Jehova i save long wanem taim stret dispela wok i mas pinis. Em i save i gat sampela man long teritori bilong yumi ol bai harim yet gutnius o nogat. Long nau sampela man i tok ol i no laik harim, tasol sampela bikpela senis inap painim ol—ol i lusim wok mani, kisim bikpela sik, wanpela ol i laikim tumas i dai—ol dispela samting inap mekim na long narapela taim ol bai laik harim tok. Ating pasin bilong tingting nogut long yumi o ol man i no gat taim long harim tok i mekim na planti man i no bin harim tok yumi autim. Taim yumi go lukim ol planti taim na mekim gutpela pasin pren, dispela inap mekim na ol i tingim na harim tok.
7 Ol man i bin kamap bikpela na ol i gat meri pikinini bilong ol yet, ol i wok long tingting long i stap bilong ol na ol i gat sampela askim em Baibel tasol inap bekim. Wanpela yangpela mama i singautim tupela Witnes i go insait long haus bilong em na i tok olsem: “Taim mi liklik yet, mi no save i gat wanem as na mama bilong mi i rausim ol Witnes na i tok em i no laik harim. Tasol samting ol i laik toktok wantaim em long en em tok bilong Baibel. Mi pasim tok long tingting bilong mi olsem taim mi go bikpela, na mi marit na mi gat haus bilong mi yet, mi bai askim ol Witnes Bilong Jehova long kam na stori long Baibel long mi.” Em i bin mekim olsem na ol Witnes i go lukim em ol i amamas.
8 Yu Inap Mekim Gutpela Wok Moa? Ating i no ol man yumi bungim i mekim na i hatwok long autim tok planti taim long wanpela teritori, nogat. Sampela taim yumi yet i as bilong dispela samting. Olsem wanem? Yumi gat ol tingting kranki taim yumi laik autim tok? Dispela inap mekim na pasin, na nek, na pes bilong yumi i narapela kain. Yumi mas i gat stretpela tingting na pes bilong yumi i mas lait. Traim nupela rot bilong autim tok. Traim kain kain rot bilong kamapim ol tok, na wok strong long mekim tok i kamap gutpela moa yet. Ating yu ken senisim askim long kirap bilong tok, o kamapim narapela skripsa long tok bilong yu. Askim ol narapela brata sista long tokim yu long pasin ol i save bihainim long autim tok na i wok gut long teritori. Wok wantaim ol narapela narapela pablisa na painia, na skelim samting ol i mekim na wok autim tok bilong ol i kamap gutpela.
9 Jehova i amamas na blesim wok bilong autim tok bilong Kingdom, na taim yumi mekim dispela wok em i kamapim klia olsem yumi laikim em na ol narapela man. (Mt. 22:37-39) Olsem na yumi mas mekim dispela wok bilong yumi i go inap long wok i pinis, na yumi no ken les long autim tok planti taim long teritori.