Ol Kaikai i Redi Pinis Bilong Bungim
1. Wanem bikpela wok i wok long kamap long nau?
1 Taim Jisas i autim tok pinis long wanpela meri Samaria, em i tokim ol disaipel bilong em olsem: “Yupela i mas lukluk nabaut na lukim gut ol gaden. Ol kaikai i redi pinis.” (Jo. 4:35, 36) Dispela wok bilong bungim ol man i gat gutpela bel em i kirap pinis, na Jisas i save olsem dispela wok bai kamap long olgeta hap bilong graun. Long nau Jisas i stap long heven na em i insait tru long wok bilong bungim kaikai. (Mt. 28:19, 20) Wanem ol samting i soim klia olsem dispela wok i wok long kamap bikpela moa na pinis bilong en i kamap klostu?
2. Wanem ol samting i soim olsem wok bilong bungim kaikai i wok long i go bikpela tru?
2 Wok Bilong Bungim Kaikai Long Olgeta Hap: Long sevis yia bilong 2009, namba bilong ol pablisa long olgeta hap bilong graun i go antap inap olsem 3.2 pesen. Long ol kantri we i gat tambu long wok autim tok, namba bilong ol pablisa i go antap inap 14 pesen. Namba bilong ol Baibel stadi bilong olgeta wan wan mun i winim 7,619,000—dispela namba i winim tru namba bilong ol pablisa na ol Baibel stadi long 2008. Taim wok i go bikpela long planti kantri, planti kantri moa i singaut long kisim ol misineri i grediuet long skul Gileat. Long planti kantri we i gat ol lain bilong narapela tokples long en, planti bilong ol dispela man i wok long kisim tok i tru. Dispela i kamapim klia olsem Jehova i wok long hariapim dispela wok em nau i kamap klostu long pinis bilong en. (Ais. 60:22) Yu gat stretpela tingting long ol manmeri i stap long teritori bilong yu?
3. Sampela pablisa inap kisim wanem tingting long ol man long teritori bilong ol?
3 Wok Bilong Bungim Kaikai Long Teritori Bilong Yu: Ating sampela pablisa bai tok: “I no gat planti man i save harim tok long teritori bilong mipela.” Tru, long sampela teritori planti man i no laik harim tok, na long sampela teritori, bipo ol man i amamas long harim tok, tasol nau nogat. Dispela inap mekim na sampela Witnes i ting ol man long teritori bilong ol em ol i gat gutpela bel, planti bilong ol i kisim pinis tok i tru, olsem na nau i gat liklik lain tasol bilong bringim ol i kam insait long tok i tru. Yu ting i stret yumi kisim kain tingting olsem?
4. Yumi mas kisim wanem stretpela tingting long wok bilong yumi long autim tok? Bilong wanem?
4 Stat long kirap i go inap long pinis bilong en, wok bilong bungim kaikai em wanpela bikpela wok tru. Tingim gut dispela tok bilong Jisas: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Mt. 9:37, 38) Jehova, em Papa bilong gaden, em yet i makim taim bilong bungim kaikai na hap we kaikai i redi pinis. (Jo. 6:44; 1 Ko. 3:6-8) Wanem wok bilong yumi? Baibel i tok: “Yu mas planim sampela lain kaikai long moningtaim na sampela long apinun tu.” (Sav. 11:4-6) Yes, pinis bilong wok bilong bungim kaikai i kam klostu, olsem na nau em i no taim bilong malolo!
5. Bilong wanem yumi mas givim bel yet long autim tok long ol teritori we ol man i no laik harim tok?
5 Wok Yet Long Bungim Kaikai: Maski sapos planti taim yumi autim tok long teritori bilong yumi na planti man i no laik harim tok, i gat as na yumi mas givim bel yet long autim tok na tingim olsem taim i sot pinis. (2 Ti. 4:2) Ol bikpela hevi i kamap long graun inap kirapim ol man long senisim tingting bilong ol na tingting moa long ol samting bai kamap bihain. Taim ol yangpela i kamap bikpela pinis, ating ol bai laik kisim gutpela sindaun na stap bel isi. Pasin bilong yumi long givim bel yet long autim tok inap kirapim sampela narapela tu long harim tok. Yes, ol manmeri em bipo ol i no bin laik harim tok, ating nau ol bai laik harim tok. Ol man em ol yet i no laik harim tok, ol tu i mas kisim tok lukaut.—Ese. 2:4, 5; 3:19.
6. Sapos i hatwok liklik long autim tok long teritori bilong yumi, wanem samting bai helpim yumi long givim bel yet long autim tok?
6 Sapos i hatwok liklik long autim tok long teritori bilong yumi, wanem samting bai helpim yumi long givim bel yet long autim tok? Yumi ken go long ol haus na autim tok, na tu, yumi ken bihainim sampela narapela rot bilong autim tok. Yumi ken autim tok long ol bisnis teritori o autim tok long rot bilong telefon. O yumi ken traim narapela narapela pasin bilong autim tok. Yumi ken senisim sediul bilong yumi na autim tok long apinun o long ol narapela taim we ol man bai stap long haus. Bilong kirapim laik bilong ol man long harim gutnius, i gutpela sapos yumi karim ol liklik nius long ol tokples em ol man long teritori bilong yumi i save mekim. Yumi inap mekim bikpela wok moa bilong autim tok sapos yumi mekim wok painia oltaim. O yumi ken go sindaun long narapela ples we ol i sot long ol man bilong autim tok. Sapos yumi gat stretpela tingting long wok bilong bungim kaikai, yumi bai wok strong long inapim tru dispela bikpela wok.
7. Yumi mas wok yet long bungim kaikai i go inap long wanem taim?
7 Ol fama i gat sotpela taim tasol bilong bungim ol kaikai i redi pinis. Olsem na ol i no save slek o wok isi isi, nogat, ol i save taitim bun tru i go inap long wok i pinis. Olsem tasol, long wok bilong bungim ol man i gat gutpela bel, yumi tu i mas bihainim wankain pasin olsem ol fama. Tasol yumi mas wok yet long bungim kaikai i go inap long wanem taim? Yumi mas mekim dispela wok insait long dispela haptaim bilong pinis na mekim i go inap long pinis bilong en. (Mt. 24:14; 28:20) Olsem nambawan Wokman bilong Jehova i bin mekim, yumi tu i laik pinisim dispela wok Jehova i bin givim long yumi. (Jo. 4:34; 17:4) Olsem na yumi mas holim stretpela tingting na amamas na givim bel yet long mekim wok bilong yumi long autim tok i go inap long pinis. (Mt. 24:13) Wok bilong bungim kaikai i no pinis yet!
[Rait long pes 2]
Stat long kirap i go inap long pinis bilong en, wok bilong bungim kaikai em wanpela bikpela wok tru