Wok Yet Long Bungim Kaikai Bilong Gaden!
“Ol man i wok long krai na planim kaikai, bai ol i ken amamas na kisim ol kaikai i mau.”—SONG 126:5.
1. Long nau, bilong wanem i gat wok long “beten long Papa bilong gaden, bai em i salim ol wokman i go”?
TAIM Jisas Krais i mekim pinis namba 3 raun bilong autim tok long Galili, em i tokim ol disaipel: “Planti kaikai tumas i mau pinis long gaden, tasol i no gat planti wokman i stap bilong kisim.” (Matyu 9:37) Na i wankain tu long Judia. (Luk 10:2) Sapos long 2,000 yia i go pinis ol samting i olsem, orait olsem wanem long nau? Long sevis yia i go pinis, winim 6 milion Witnes Bilong Jehova i wok strong yet long mekim wok bilong bungim kaikai bilong gaden. Ol i mekim dispela wok namel long ol 6 bilion manmeri long graun, em planti bilong ol i “stap nogut tru, olsem ol sipsip i no gat wasman.” Olsem na dispela tok bilong Jisas long “beten long Papa bilong gaden, bai em i salim ol wokman i go bungim kaikai bilong en,” em i stret tu long dispela taim nau.—Matyu 9:36, 38.
2. Wanem samting i save pulim tingting bilong ol man i kam long yumi?
2 God Jehova, em Papa bilong gaden, i harim pinis dispela beten long salim sampela wokman moa. Na yumi amamas tru yumi insait long dispela wok God i bosim bilong bungim kaikai bilong gaden! Tru, taim yumi skelim lain bilong yumi wantaim ol narapela lain, yumi no planti, tasol pasin bilong yumi long wok strong long autim tok bilong Kingdom na kamapim ol disaipel em i pulim tingting bilong ol man long olgeta kantri i kam long yumi. Long planti kantri ol nius na TV samting i stori long yumi planti taim. Sampela taim long piksa long televisen, taim belo bilong dua i pairap, dispela i kirapim man long tok, ol Witnes Bilong Jehova i kam. Tru tumas, planti man long nau i save long dispela wok Kristen yumi save mekim, i olsem wok bilong bungim kaikai bilong gaden.
3. (a) Olsem wanem yumi save, long taim bilong ol aposel ol man i bin lukim wok bilong ol disaipel long autim tok bilong Kingdom? (b) Olsem wanem yumi inap tok ol ensel i helpim wok bilong yumi long autim tok?
3 Long taim bilong ol aposel tu ol man i bin lukim ol disaipel i autim gutnius bilong Kingdom, na ol i mekim nogut tru long ol. Olsem na aposel Pol i tok: “Mi ting olsem, God i bin putim mipela aposel i stap las tru. Mipela [ol aposel] i stap olsem ol man, kot i tok pinis long mipela i mas i dai, na ol i laik kilim mipela i dai long ai bilong olgeta manmeri na ol ensel wantaim.” (1 Korin 4:9) Na olsem tasol, pasin bilong yumi long stap strong long autim gutnius bilong Kingdom na yumi no les, maski ol man i mekim nogut long yumi, dispela i pulim tingting bilong ol manmeri i go long yumi na em i bikpela samting long ol ensel. Kamapim Tok Hait 14:6 i tok: “Mi [aposel Jon] lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” Tru tumas, ol ensel i save helpim yumi long wok bilong autim tok, olsem wok bilong bungim kaikai bilong gaden!—Hibru 1:13, 14.
Ol Bai “Bel Nogut Tru” Long Ol
4, 5. (a) Jisas i givim wanem toksave long ol disaipel bilong em? (b) I gat wanem as na ol man i save “bel nogut tru” long ol wokman bilong God long nau?
4 Taim Jisas i salim ol aposel i go mekim wok bilong bungim kaikai bilong gaden, ol i bihainim dispela tok bilong Jisas: “Yupela i mas bihainim pasin bilong ol snek, na tingim gut pastaim ol samting yupela i laik mekim. Na yupela i mas bihainim pasin bilong ol dispela pisin ol i kolim balus, na yupela i no ken tingting long mekim wanpela pasin nogut.” Jisas i tok moa: “Yupela lukaut long ol man. Ol bai i kotim yupela long ol kaunsil bilong ol, na ol bai i wipim yupela insait long ol haus lotu bilong ol. Ol bai i ting long daunim mi, na pulim yupela i go long ol gavman na ol king. Olsem na bai yupela i ken autim gutnius long ol dispela bikman, na long ol arapela haiden tu. . . . Na olgeta man bai i bel nogut tru long yupela, long wanem, nem bilong mi em i stap long yupela. Tasol ol manmeri i stap strong inap long las de, God bai i kisim bek ol.”—Matyu 10:16-22.
5 Long nau ol man i save “bel nogut tru” long yumi, long wanem, “dispela graun olgeta em i stap aninit long strong bilong Satan,” na Satan em i nambawan birua bilong God na lain bilong Em. (1 Jon 5:19) Ol birua i lukim olsem yumi stap gut long ol samting bilong spirit, tasol ol i no laik tokaut olsem Jehova em i as bilong dispela. Ol i lukim pes bilong yumi i lait na amamas taim yumi mekim wok. Ol i kirap nogut long pasin wanbel i stap namel long yumi! Sampela i tokaut long dispela long taim ol i go long ol narapela kantri na lukim ol Witnes Bilong Jehova i mekim wok i wankain stret olsem ol i lukim long as ples bilong ol. Tasol yumi save olsem, bihain ol birua tu bai save long Jehova, em i Man bilong sapotim yumi na em i as bilong pasin wanbel bilong yumi.—Esekiel 38:10-12, 23.
6. Taim yumi mekim wok bilong bungim kaikai bilong gaden, yumi ken tingim wanem samting bilong strongim bel bilong yumi? Tasol wanem askim i kamap?
6 Papa bilong gaden i bin givim Pikinini bilong em, Jisas Krais, “bikpela namba na strong bilong bosim olgeta samting long heven na long graun.” (Matyu 28:18) Olsem na Jehova i mekim wok long Jisas long bosim wok bilong bungim ol man long rot bilong ol ensel long heven na lain “wokboi i gat gutpela tingting” i stap long graun. (Matyu 24:45-47; KTH 14:6, 7) Tasol taim ol lain i birua long yumi, yumi ken mekim wanem bilong karim dispela hevi na stap amamas taim yumi mekim yet wok bilong bungim kaikai bilong gaden?
7. Taim ol man i birua o mekim nogut long yumi, yumi mas wok long holimpas wanem kain tingting na pasin?
7 Taim ol man i birua o mekim nogut long yumi, yumi mas beten askim God long helpim yumi bambai yumi inap holimpas tingting i wankain olsem bilong Pol. Em i tok: “Ol i save tok bilas long mipela, tasol mipela i save askim God long mekim gut long ol. Ol i save mekim nogut long mipela, na mipela i save pasim maus tasol na karim ol dispela hevi. Ol i save tok nogut tru long mipela, tasol mipela i save bekim gutpela tok long ol.” (1 Korin 4:12, 13) Dispela kain tingting, wantaim pasin bilong autim tok long pasin isi, sampela taim em i save senisim tingting bilong ol man i birua long yumi.
8. Tok bilong Jisas long Matyu 10:28 i strongim bel bilong yu olsem wanem?
8 Taim ol man i tok long kilim yumi i dai, dispela tu i no daunim pasin bilong yumi long wok strong long bungim kaikai bilong gaden. Sapos i gat rot, yumi autim tok bilong Kingdom long ples klia na yumi no pret. Tok bilong Jisas i save strongim bel bilong yumi, em i tok: “Yupela i no ken pret long ol man i save kilim i dai bodi, tasol ol i no inap kilim spirit bilong yupela. Nogat. Yupela i mas pret long God tasol. Em inap bagarapim spirit na bodi tu long hel [olsem Gehena].” (Matyu 10:28) Yumi save olsem Papa bilong yumi long heven em i Man bilong givim laip. Em i save givim gutpela pe long ol man i stap gut long em na mekim yet wok bilong bungim kaikai bilong gaden.
Ol Tok i Helpim Man Long Kisim Laip
9. Taim Esekiel i autim tok, sampela i mekim wanem? Olsem wanem i gat wankain samting olsem i kamap long nau?
9 Taim profet Esekiel i givim ol tok bilong Jehova long “ol manmeri i bin bikhet”—em lain Israel na lain Juda—sampela i amamas long harim. (Esekiel 2:3) Jehova i tok: “Ol i laik harim tok bilong yu, olsem ol i laikim tumas long harim man i save paitim gita na mekim gutpela musik. Na olsem ol i laik harim man i gat gutpela nek na i save singim ol gutpela song bilong man i laikim meri.” (Esekiel 33:32) Tru, ol i amamas long tok bilong Esekiel, tasol ol i no bihainim. Olsem wanem long nau? Taim lain remnan God i makim na ol poroman bilong ol i strongim bel na tokaut long ol tok bilong Jehova, sampela i amamas long harim ol gutpela samting Kingdom bai mekim, tasol ol i no pilim tru na kamap disaipel na insait long wok bilong bungim kaikai bilong gaden.
10, 11. Long yia 1920 i go 1940 samting, ol i bin mekim wanem bilong kamapim tok bilong helpim man long abrusim bagarap na stap laip? Wanem samting i kamap long dispela?
10 Tasol planti i bihainim ol tok ol i harim na ol tu i kirap autim ol tok bilong God. Olsem: Ol kibung Kristen i kamap long 1922 i go 1928 ol i tokaut klia long kot bilong God bai painim ol lain bilong Satan. Ol redio-stesin i kamapim ol dispela strongpela tok i bin kamap long ol dispela kibung. Bihain, lain manmeri bilong God ol i prinim ol dispela tok na tilim planti milion.
11 Long 1936 narapela pasin bilong mekim wok autim tok i kamap—lain bilong Jehova i save wokabaut olsem bikpela lain na karim ol strongpela pepa i gat rait long en. Pastaim ol i pasim long skin ol strongpela pepa i tokaut long ol pablik-tok i laik kamap. Bihain, ol i karim ol strongpela pepa ol i bin pasim long stik na i gat rait long en olsem “Ol Lotu i Olsem Trap Bilong Giamanim Yu” na “Mekim Wok Bilong God na King Krais Jisas.” Taim ol i wokabaut long rot, dispela i pulim ai bilong planti man. Wanpela brata em bipo i save mekim dispela wok long Landon, Inglan, em i tok: ‘Dispela wok i bin kirapim tru ol man long lukluk long ol Witnes Bilong Jehova na i bin strongim ol na ol i no pret long mekim dispela wok.’
12. Yumi tokaut long kot bilong God, tasol yumi tokaut long wanem narapela samting tu? Wanem tupela lain i wok wantaim long autim gutnius?
12 Taim yumi tokaut long kot bilong God, yumi tokaut tu long ol gutpela samting Kingdom bilong God bai kamapim. Yumi strong long autim tok na yumi no pret, na dispela i helpim yumi long painim ol man i gat gutpela bel. (Matyu 10:11) Long 1920 i go 1930 samting, ol laspela manmeri bilong dispela lain God i bin makim, klostu olgeta ol i kirap mekim dispela wok bilong bungim kaikai bilong gaden. Orait long 1935 wanpela kibung i kamap na i tokaut long gutpela sindaun em bikpela lain bilong “ol arapela sipsip” inap kisim long Paradais long graun. (KTH 7:9; Jon 10:16) Ol i harim ol tokaut long kot bilong God na ol i helpim dispela lain God i bin makim long wok bilong autim gutnius bilong helpim man long abrusim bagarap.
13, 14. (a) Tok bilong Song 126:5, 6 inap mekim gut bel bilong yumi olsem wanem? (b) Sapos yumi wok i go yet long planim pikinini kaikai na givim wara long en, wanem samting bai kamap?
13 Tok bilong Song 126:5, 6 i mekim gut bel bilong ol wokman bilong God, na moa yet long ol wokman em ol man i mekim nogut long ol. Em i tok: “Ol man i wok long krai na planim kaikai, bai ol i ken amamas na kisim ol kaikai i mau. Tru tumas, ol man i krai na karim pikinini kaikai i go bilong planim, bihain bai ol i singim song bilong amamas, na kisim ol kaikai i mau na i kam.” Tok bilong man bilong raitim Song long wok bilong planim na kisim kaikai em i makim wok bilong Jehova long lukautim na mekim gut long liklik hap lain i lusim kalabus long Babilon na kam bek long kantri bilong ol. Ol i amamas tru long ol i stap fri, tasol ating ol i krai taim ol i planim pikinini kaikai long strongpela graun ol i no bin brukim na planim kaikai long en insait long 70 yia ol i stap kalabus. Tasol ol lain i kirap na planim pikinini kaikai na wokim haus lotu samting, ol i kisim bikpela amamas long ol gutpela samting i kamap long hatwok bilong ol.
14 Ating yumi wok long krai taim hevi i painim yumi o taim yumi o ol narapela i karim pen long mekim stretpela pasin. (1 Pita 3:14) Long wok bilong yumi long bungim kaikai bilong gaden, ating yumi hatwok pastaim, long wanem, i olsem i no gat wanpela gutpela samting i kamap long dispela wok. Tasol sapos yumi wok i go yet long planim pikinini kaikai na givim wara long en, God bai mekim kaikai i kamap, ating winim tru ol samting yumi bin tingting long kisim. (1 Korin 3:6) Ol gutpela samting i kamap long wok bilong tilim ol Baibel na ol buk bilong Baibel i kamapim klia dispela samting.
15. Stori long wanpela samting i bin kamap na i soim olsem ol buk Kristen i helpim wok bilong bungim kaikai bilong gaden.
15 Tingim wanpela man, nem bilong em Jim. Taim mama bilong em i dai, namel long ol kago bilong mama em i painim buk Life—How Did It Get Here? By Evolution or by Creation? a Em i amamas long ritim. Bihain em i toktok wantaim wanpela Witnes i bin bungim em long rot, na Jim i orait long Witnes i go bek lukim em, na em i kirap stadi long Baibel. Em i kamap strong hariap long ol samting bilong spirit, na dediket long Jehova, na kisim baptais. Em i tokim sampela moa bilong famili long ol samting em i lainim. Dispela i mekim na susa wantaim brata bilong em ol i kamap Witnes Bilong Jehova. Bihain, Jim i wok volantia fultaim long Betel long Landon.
Amamas, Maski Ol i Mekim Nogut Long Ol
16. (a) I gat wanem as na gutpela samting i bin kamap long wok bilong bungim kaikai bilong gaden? (b) Jisas i toksave olsem gutnius inap mekim wanem? Tasol taim yumi kamap long ol man, yumi laik mekim wanem kain pasin?
16 I gat wanem as na gutpela samting tru i bin kamap long wok bilong bungim kaikai bilong gaden? Bekim i olsem: Ol Kristen God i makim na ol poroman bilong ol i bin bihainim tok bilong Jisas, em i tok: “Tok mi mekim long yupela long tudak, em yupela i mas autim long san. Na tok yupela i harim isi tasol long yau, em yupela i mas sanap antap long haus na autim long ol manmeri.” (Matyu 10:27) Tasol Jisas i toksave olsem hevi bai painim yumi. Em i tok: “Man bai i kotim brata bilong en, na tokim ol long kilim dispela brata i dai. Na ol papa bai i mekim wankain pasin long ol pikinini bilong ol. Na ol pikinini bai i birua long papamama bilong ol na tokim ol man long kilim ol i dai.” Jisas i tok moa olsem: “Yupela i no ken ting mi kam bilong mekim i dai olgeta pait long graun. Mi no kam bilong mekim i dai pait. Nogat. Mi bringim bainat i kam.” (Matyu 10:21, 34) Jisas i no gat tingting long brukim ol famili. Tasol sampela taim tok bilong gutnius i mekim dispela samting. Na i wankain long ol wokman bilong God long nau. Taim yumi go lukim ol famili, yumi no gat tingting long brukim ol famili, nogat. Yumi laik bai olgeta long famili i kisim na bihainim tok bilong gutnius. Olsem na taim yumi autim tok, yumi laik mekim pasin isi na gutpela pasin long olgeta long famili na bai ol man em ‘bel bilong ol i gutpela tru bilong kisim laip i stap gut oltaim’ ol i ken laikim.—Aposel 13:48.
17. Ol man i stap gut long wok king bilong God, ol i stap narapela kain olsem wanem? Stori long wanpela samting olsem.
17 Tok bilong Kingdom i mekim na ol man i stap gut long wok king bilong God ol i stap narapela kain. Olsem: Long taim bilong ol Natsi, ol wanlotu bilong yumi long Jemani ol i stap narapela kain, long wanem, ‘samting bilong Sisar, ol i givim long Sisar, na samting bilong God, ol i givim long God.’ (Luk 20:25) Ol dispela wokman bilong Jehova ol i sanap strong na ol i no kalapim ol lo bilong Baibel bilong stiaim tingting, na long dispela samting ol i stap narapela kain long ol bikman bilong lotu na ol man i gat nem Kristen, em ol i bilong ol lotu bilong Kristendom. (Aisaia 2:4; Matyu 4:10; Jon 17:16) Profesa Christine King i raitim wanpela buk (The Nazi State and the New Religions) i tok: ‘I gat wanpela lain tasol em gavman Natsi i no inap daunim, em ol Witnes Bilong Jehova. Maski gavman i kilim i dai planti tausen, ol Witnes i mekim yet wok bilong ol, na long Me 1945, lotu bilong ol i stap yet, tasol gavman Natsi, nogat.’
18. Maski ol man i mekim nogut long ol, ol manmeri bilong Jehova i save kamapim wanem kain pasin na tingting?
18 Yumi ken tingim pasin ol manmeri bilong Jehova i kamapim taim ol man i mekim nogut long ol. Tru, ating ol bikman bilong gavman i pilim tru strongpela bilip bilong yumi, tasol ol i kirap nogut long yumi no bel nogut o birua long ol lain i mekim nogut long yumi. Olsem: Ol Witnes i bin abrusim bagarap long han bilong ol Natsi, planti taim ol i kamapim olsem ol i belgut na amamas taim ol i tingim bek ol hevi na pen i bin painim ol. Ol i save Jehova i bin givim “bikpela strong” long ol, i winim strong bilong yumi man. (2 Korin 4:7) Ol Kristen namel long yumi em God i bin makim ol, ol i bilip strong olsem “God i raitim pinis nem bilong [ol] long buk bilong en long heven.” (Luk 10:20) Pasin bilong ol long karim hevi na stap strong, dispela i mekim na ol i bilip strong long samting ol i wetim. Na ol Kristen i stap gut long wok bilong bungim kaikai bilong gaden na ol i gat tingting long stap oltaim long graun, ol tu i bilip strong long samting ol i wetim.—Rom 5:4, 5.
Wok Yet Long Bungim Kaikai Bilong Gaden
19. Ol i bin bihainim wanem ol gutpela rot long mekim wok Kristen bilong autim tok?
19 Jehova bai larim yumi i mekim dispela wok inap hamas yia moa, yumi no save. Tasol taim yumi mekim dispela wok, yumi mas save olsem ol man bilong bungim kaikai bilong gaden ol i gat sampela gutpela rot ol i bihainim bilong mekim wok bilong ol. Na olsem tasol, taim yumi mekim wok autim tok, sapos yumi mekim long pasin ol narapela i bin traim na i wok gut, yumi ken bilip olsem wok bilong yumi bai kamapim gutpela samting. Pol i tokim ol wanlain Kristen bilong em: “Mi laik kirapim yupela long lukim gut pasin bilong mi na bihainim.” (1 Korin 4:16) Taim Pol i bung wantaim ol elda bilong Efesus long Miletus, em i tokim ol olsem em i no bin surik long skulim ol long “ol [ples] bung bilong ol manmeri na long olgeta haus.” (Aposel 20:20, 21) Poroman bilong Pol, em Timoti, em i bin skul long ol pasin bilong Pol long mekim wok autim tok, olsem na em inap tokim ol Korin long ol dispela pasin. (1 Korin 4:17) God i mekim gut long Pol, na wok bilong em long skulim ol man i kamap gutpela, na sapos yumi stap strong long autim gutnius long ol haus, na long ol gobek na Baibel-stadi, na long olgeta hap i gat man i stap, God bai mekim gut long yumi tu.—Aposel 17:17.
20. Jisas i tok wanem bilong soim olsem bikpela wok i stap bilong bungim ol kaikai i redi pinis long gaden spirit? Long taim bilong yumi, dispela i bin kamap tru olsem wanem?
20 Taim Jisas i autim tok pinis long wanpela meri Samaria klostu long taun Sikar long yia 30 C.E., em i toktok long dispela wok bilong bungim kaikai bilong gaden spirit. Em i tokim ol disaipel: “Yupela i mas lukluk nabaut na lukim gut ol gaden. Ol kaikai i redi pinis. Man i wok long kisim kaikai, em i kisim pe bilong en na em i bungim kaikai bilong laip i stap gut oltaim oltaim. Olsem na man bilong planim kaikai na man bilong kisim kaikai, tupela i ken amamas wantaim.” (Jon 4:34-36) Ating Jisas i bin lukim gutpela samting i kamap long tok em i givim long meri Samaria, long wanem, planti Samaria i harim tok bilong dispela meri na ol i bilip long Jisas. (Jon 4:39) Nau long dispela taim, gavman bilong sampela kantri i bin tekewe ol tambu long ol Witnes Bilong Jehova, na sampela gavman i tok orait long ol. Dispela i bin opim rot na bai ol i ken go long ol nupela hap na autim tok. Dispela i mekim na ol i wok long bungim planti kaikai tru i redi pinis long gaden spirit. Tru tumas, long olgeta hap bilong graun yumi kisim planti gutpela blesing taim yumi amamas na mekim yet dispela wok i kain olsem wok bilong bungim kaikai bilong gaden.
21. Bilong wanem yumi mas amamas na mekim yet wok bilong bungim kaikai bilong gaden?
21 Taim kaikai bilong gaden i orait pinis na i redi long kisim, ol wokman i mas wok hariap. Ol i mas wok strong na no ken lusim taim. Long nau yumi mas wok strong na wok hariap, long wanem, yumi stap long “taim bilong las de.” (Daniel 12:4) Tru ol hevi i save painim yumi, tasol yumi kisim planti kaikai moa bilong gaden, olsem planti man moa yet ol i kirap lotuim Jehova long nau, winim olgeta taim bipo. Dispela i mekim na taim bilong yumi em i taim bilong amamas. (Aisaia 9:3) Olsem na yumi mas amamas na mekim yet wok bilong bungim kaikai i redi pinis long gaden!
[Futnot]
a Ol Witnes Bilong Jehova i wokim na tilim.
Bai Yu Bekim Olsem Wanem?
• Papa bilong gaden i bin mekim wanem na bai i gat planti wokman moa?
• Yumi holimpas wanem kain tingting maski ol man i “bel nogut tru” long yumi?
• I gat wanem as na yumi stap amamas maski ol man i mekim nogut long yumi?
• Bilong wanem yumi mas mekim yet wok bilong bungim kaikai bilong gaden na wok hariap?
[Ol Piksa long pes 16, 17]
Ol ensel i helpim ol man i mekim wok bilong bungim kaikai bilong gaden spirit
[Piksa long pes 18]
Pasin bilong wokabaut olsem bikpela lain na karim ol strongpela pepa, em i pulim tingting bilong planti man i go long tok bilong Kingdom
[Piksa long pes 18]
Yumi planim na givim wara, tasol God i mekim kaikai i kamap