Amamas Long Bungim Kaikai Bilong Gaden!
“Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.”—MATYU 9:37, 38.
1. Wanem samting i helpim yumi long mekim yet wok bilong God?
TAIM yumi tingim bek de yumi kisim baptais na kamap wanpela wokman bilong Jehova, maski em long sampela yia o planti yia i go pinis, i olsem dispela samting i bin kamap asde tasol, a? Wok bilong litimapim nem bilong Jehova i bin kamap nambawan bikpela samting long laip bilong yumi, em yumi bin dediketim long Jehova. Taim yumi stretim gut wok bambai yumi gat taim bilong helpim ol narapela long harim na kisim tok bilong Kingdom, bikpela tingting bilong yumi em yumi mas amamas long mekim wok bilong Jehova. (Efesus 5:15, 16) I kam inap long nau, yumi lukim olsem ol yia i save go hariap hariap taim yumi “wok strong long mekim wok bilong Bikpela.” (1 Korin 15:58) Maski sampela hevi i painim yumi, amamas yumi kisim long mekim wok bilong Jehova i save kirapim yumi long mekim yet.—Nehemia 8:10.
2. Wanem ol samting i helpim yumi long kisim amamas long wok bilong bungim kaikai bilong gaden?
2 Yumi ol Kristen i insait long wanpela wok i olsem wok bilong kisim na bungim kaikai bilong gaden. Jisas Krais i tok, wok bilong bungim ol man bilong kisim laip i stap oltaim em i kain olsem wok bilong bungim kaikai bilong gaden. (Jon 4:35-38) Yumi insait long kain wok olsem bilong bungim kaikai bilong gaden, olsem na i gutpela sapos yumi skelim amamas bilong ol Kristen bilong pastaim em ol i insait long wankain wok. Bai yumi stori long 3-pela samting bilong helpim yumi long kisim amamas long dispela wok bilong nau long bungim ol man. Olsem, (1) yumi autim tok long ol gutpela samting ol man inap wet long en, (2) wok bilong yumi i kamapim gutpela samting, na (3) taim yumi autim tok long ol man, yumi laik kamapim pasin bilong i stap isi wantaim ol.
Ol i Go Bilong Bungim Kaikai
3. Wanem samting i givim amamas long ol disaipel bilong Jisas?
3 Long yia 33 C.E. bikpela senis tru i kamap long i stap bilong ol 11-pela gutpela aposel bilong Jisas na ol narapela wokman bilong bungim kaikai bilong gaden, taim ol i kamap long wanpela maunten long Galili bilong lukim Krais em i kirap bek pinis! (Matyu 28:16) Ating inap olsem ‘500 brata’ i stap. (1 Korin 15:6) Ol i holimpas dispela tok Jisas i givim long ol, olsem: “Go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Maski ol man i mekim nogut tru long ol, ol i kisim bikpela amamas long dispela wok bilong bungim ol man, taim ol i lukim planti kongrigesen bilong ol disaipel bilong Krais i kamap long planti hap. Bihain, ‘ol i autim gutnius long olgeta manmeri i stap long graun.’—Kolosi 1:23; Aposel 1:8; 16:5.
4. Wanem samting i kirapim Jisas long salim ol disaipel i go mekim wok bilong bungim ol man?
4 Taim Jisas i bin kirap mekim wok bilong em long Galili, em i singautim ol 12-pela aposel i kam na em i salim ol i go autim dispela tok: “Kingdom bilong heven em i kam klostu pinis.” (Matyu 10:1-7) Em yet i bin “go raun long olgeta taun na ples [long Galili]. Em i skulim ol manmeri insait long ol haus lotu bilong ol. Em i autim gutnius bilong kingdom bilong God, na em i mekim orait olgeta kain sik i stap long bodi bilong ol.” Jisas i sori tru long ol bikpela lain manmeri, “long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:35, 36) Bel bilong em i pilim tru hevi bilong ol, na em i tokim ol disaipel: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden [God Jehova], bai em i salim ol wokman i go bungim kaikai bilong en.” (Matyu 9:37, 38) Long Judia tu, taim i gat 6-pela mun tasol i stap yet bilong mekim wok bilong em long graun, Jisas i mekim wankain tok, olsem i mas i gat wokman bilong bungim kaikai. (Luk 10:2) Long dispela tupela taim, em i salim ol disaipel i go mekim wok bilong bungim ol man.—Matyu 10:5; Luk 10:3.
Yumi Autim Tok Long Ol Gutpela Samting Ol Man Inap Wet Long En
5. Yumi save autim wanem kain tok long ol man?
5 Yumi ol wokman bilong Jehova long nau, yumi amamas long bihainim singaut bilong bungim ol kaikai i redi pinis long gaden. Wanpela samting i givim bikpela amamas long yumi i olsem: Yumi bringim wanpela gutpela tok i go long ol man i bel hevi na nau ol i gat gutpela samting ol inap wet long en. Olsem ol disaipel bilong Jisas bilong pastaim, yumi bin kisim gutpela wok tru long autim gutnius long ol man “i stap nogut tru, olsem ol sipsip i no gat wasman,” na bai ol i gat gutpela samting ol inap wet long en!
6. Ol aposel i bin mekim wanem wok?
6 Long yia 50 C.E. samting, aposel Pol i wok strong i stap long autim gutnius. Na yumi save wok bilong em long bungim ol man i kamapim gutpela samting, long wanem, taim em i raitim pas i go long ol Kristen long Korin long yia 55 C.E. samting, em i tok: “Ol brata, mi laik kirapim tingting bilong yupela gen long gutnius mi bin autim long yupela. Yupela i kisim pinis dispela gutnius, na yupela i save sanap strong long en.” (1 Korin 15:1) Ol aposel na sampela Kristen moa bilong pastaim ol i wok strong long wok bilong bungim ol man. Baibel i no tokim yumi long hamas aposel i winim taim bilong bagarap i painim Jerusalem long 70 C.E., tasol yumi save olsem 25 yia bihain long dispela, aposel Jon i autim tok yet.—KTH 1:9.
7, 8. Wanem dispela gutpela tok ol wokboi bilong Jehova i wok strong long autim, winim olgeta taim bipo?
7 Bihain, lain pris pasto bilong Kristendom, olsem dispela “man bilong sakim lo,” ol i bosim strong ol man inap planti handet yia. (2 Tesalonaika 2:3) Tasol klostu long yia 1900, ol man i wok strong long bihainim ol tok bilong lotu Kristen bilong pastaim, ol i kirap autim tok long ol gutpela samting ol man inap wetim—ol i tokaut long Kingdom. Olsem na kirap long namba wan Wastaua (Julai 1879), taim ol i raitim nem bilong nius, ol i raitim tu dispela tok: “I Tokaut Long Kambek Bilong Krais” o “I Tokaut Long Kingdom Bilong Krais” o “I Tokaut Long Kingdom Bilong Jehova.”
8 Kingdom bilong God long heven long han bilong Jisas Krais i kamap long 1914, na nau yumi wok strong moa yet long autim dispela gutpela tok, winim olgeta taim bipo. Bilong wanem yumi wok strong olsem? Long wanem, wanpela gutpela wok Kingdom bai mekim, em klostu nau em bai pinisim dispela pasin nogut bilong graun. (Daniel 2:44) Em wanpela gutpela tok tru, a? Na yumi kisim bikpela amamas moa yet long autim tok bilong Kingdom paslain long kirap bilong “bikpela hevi tru.”—Matyu 24:21; Mak 13:10.
Gutpela Samting i Kamap Long En
9. Jisas i givim wanem tok long ol disaipel? Olgeta man i laik harim tok bilong Kingdom, o olsem wanem?
9 Narapela samting i helpim yumi long kisim bikpela amamas i olsem: Wok bilong yumi i kamapim gutpela samting—yumi painim ol man na ol i kamap disaipel na ol tu i insait long wok bilong bungim kaikai bilong gaden. Long yia 31-32 C.E., Jisas i tokim ol disaipel: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man.” (Matyu 10:11) I no olgeta man i gat gutpela bel, na dispela i kamap klia long pasin bilong ol olsem ol i no laikim tok bilong Kingdom. Tasol maski i no olgeta i laik harim, ol disaipel bilong Jisas i wok strong long autim gutnius long olgeta hap i gat man i stap.
10. Pol i mekim wanem bilong painim ol man i gat gutpela bel?
10 Bihain long taim Jisas i dai na kirap bek, ol disaipel i wok strong yet long painim ol man i gat gutpela bel. Pol i go long haus lotu bilong ol Juda na long ples bung long taun Atens na toktok gut wantaim ol man. Taim em i go long Areopagus long dispela taun Grik na autim tok, “sampela man i bihainim em na ol i bilip. Wanpela em Dionisius, em wanpela memba bilong dispela kaunsil i save bung long maunten Areopagus. Na wanpela meri, nem bilong en Damaris, em i bilip, na ol arapela manmeri tu i bilip.” Long olgeta hap Pol i go long en, em i stap olsem gutpela piksa long pasin bilong autim tok “long ol [ples] bung bilong ol manmeri na long olgeta haus.”—Aposel 17:17, 34; 20:20.
11. Bipo ol i mekim wok autim tok olsem wanem?
11 Long yia 1880 samting i go inap 1900, ol Kristen God i bin makim long spirit holi ol i strong long painim ol man i gat gutpela bel. Nius Zion’s Watch Tower bilong Julai/Ogas 1881 i kamapim wanpela stori (“Anointed to Preach”) i tok: ‘Wok bilong autim gutnius i go long “ol man i gat pasin daun,” em ol man i gat laik long harim, bambai ol i ken kamap olsem bodi bilong Krais na mekim wok king wantaim em.’ Planti taim ol dispela wokman bilong God i sanap ausait long haus lotu na bungim ol man taim ol i pinis long mekim lotu, na ol i givim ol liklik nius long ol i gat ol tok bilong Baibel long en bilong kirapim tingting bilong ol man i gat gutpela bel. Taim ol dispela wokman bilong God i skelim gut dispela pasin bilong autim tok na save olsem i gutpela, nius Watch Tower bilong Me 15, 1903, i kirapim ol wokman bilong bungim kaikai bilong gaden long tilim ol liklik nius long “olgeta haus, long Sande long moningtaim.”
12. Yumi bin mekim wanem bilong helpim wok autim tok bilong yumi i kamap gutpela moa? Stori long dispela.
12 Tasol inap sampela yia pinis, yumi bin autim tok long ol man long kain kain ples, na i no long haus bilong ol tasol. Dispela i bin kamapim gutpela wok long ol kantri em ol man i save wok mani na long taim bilong malolo ol i wok long painim ol gutpela amamas, na taim yumi go long haus bilong ol, ol i no stap. Wanpela Witnes long Inglan wantaim wanpela wanwok bilong em ol i bin lukim ol man i kam kisim malolo long nambis na bihain ol i kalap long bas na go bek long haus, olsem na tupela i strongim bel na kalap long bas na tilim nius Wastaua na Kirap! long ol pasindia. Long wanpela mun, ol i tilim 229 nius. Ol i tok: “Mipela i no pret long autim tok long hap bilong nambis na ples bisnis na kain hap olsem, long wanem, mipela i save oltaim Jehova i stap wantaim mipela.” Ol i kamapim wanpela raun bilong bringim ol nupela magasin i go long ol man long olgeta taim, na ol i kirapim wanpela Baibel-stadi, na tupela i bin mekim wok painia haptaim.
13. Long sampela hap, yumi mas senisim wanem pasin bilong yumi long autim tok?
13 Taim yumi wok yet long painim ol man i gat gutpela bel, ating long sampela hap yumi mas skelim gen pasin yumi bihainim long autim tok. Tru, planti Witnes i save autim tok long ol haus long Sande long moningtaim, tasol long sampela hap ol i save olsem moningtaim i no gutpela long autim tok, long wanem, planti man i slip i stap. Planti Witnes i bin stretim sediul bilong ol na nau ol i wok long painim ol man long apinun, ating taim miting Kristen i pinis. Dispela i bin kamapim gutpela samting. Long yia i go pinis, ol man i autim tok bilong Kingdom long olgeta hap, namba bilong ol i go bikpela inap olsem 2.3 pesen. Dispela i givim biknem long Papa bilong gaden na i mekim yumi belgut.
Stap Isi Wantaim Ol Man
14. Taim yumi autim tok, yumi bihainim wanem kain pasin? Bilong wanem yumi mekim olsem?
14 Narapela samting i mekim na yumi amamas long wok bilong bungim ol man, em yumi laik kamapim pasin bilong i stap isi wantaim ol. Jisas i tok: “Sapos yupela i go insait long wanpela haus, orait yupela i mas tokim ol manmeri bilong haus olsem, ‘God i ken mekim gut long yupela.’ Na sapos ol manmeri bilong dispela haus i amamas long kisim yupela, orait gutpela tok bilong yupela i ken i stap long ol.” (Matyu 10:12, 13) Tok Hibru ol i mekim taim ol i bungim man, na tok Grik bilong Baibel, tupela wantaim i wankain olsem dispela tok “God i ken mekim gut long yupela.” Dispela tok i stiaim pasin yumi mekim long ol man taim yumi autim gutnius. Yumi laik bai ol i ken harim na kisim tok bilong Kingdom. Ol man i mekim olsem, na ol i tanim bel, na baut, na bihainim laik bilong God, ol inap kamap wanbel gen wantaim God. Na pasin bilong stap wanbel wantaim God bai bringim ol i go bilong kisim laip i stap oltaim.—Jon 17:3; Aposel 3:19; 13:38, 48; 2 Korin 5:18-20.
15. Taim yumi autim tok na ol man i no amamas long harim, olsem wanem yumi ken bihainim pasin bilong i stap isi wantaim ol man?
15 Tasol olsem wanem yumi inap i stap isi wantaim ol man taim ol i no amamas long harim tok? Jisas i tok: “Sapos ol i no amamas long kisim yupela, orait yupela i ken kisim bek gutpela tok bilong yupela.” (Matyu 10:13) Taim Luk i stori long Jisas i salim ol 70 disaipel i go, em i kamapim dispela tok bilong Jisas: “Sapos wanpela man bilong bel isi i stap long dispela haus, orait gutpela tok bilong yupela i ken i go i stap long dispela man. Tasol sapos i no gat kain man olsem i stap, orait gutpela tok bilong yupela bai i kam bek long yupela yet.” (Luk 10:6) Taim yumi autim tok, yumi mas stap isi na pes i mas lait na amamas. Sapos man i no laik harim, o em i gat tok, o em i tok bilas long yumi, orait gutpela tok bilong yumi i ken ‘kam bek long yumi.’ Tasol dispela i no save tekewe pasin bilong yumi long stap isi wantaim ol man—em wanpela pasin spirit holi bilong Jehova i kamapim.—Galesia 5:22, 23.
Wanpela Gutpela Mak Bilong Winim
16, 17. (a) Taim yumi mekim ol gobek, yumi laik mekim wanem? (b) Yumi ken mekim wanem bilong helpim ol man i gat ol askim long Baibel?
16 Yumi amamas long insait long wok bilong bungim ol man bilong kisim laip i stap oltaim. Na yumi kisim bikpela amamas tru taim man i kisim tok yumi autim, na em i laik kisim sampela save moa, na em i kamapim olsem em i “man bilong bel isi”! Ating em i gat planti askim long Baibel na yumi no inap bekim olgeta dispela askim long namba wan taim yumi lukim em, na tu i no gutpela long mekim olsem. Orait yumi ken mekim wanem? Yumi ken mekim samting ol i bin tokaut long en olsem 60 yia i go pinis.
17 “Olgeta Witnes Bilong Jehova i mas redi long stadi wantaim man long Baibel.” Dispela tok i bin kamap long namba 3 buk bilong ol buk Model Study ol i kamapim long 1937 i go 1941. Buk i tok moa: ‘Olgeta man bilong autim tok bilong Kingdom i mas wok strong long helpim ol man i laik harim tok bilong Kingdom. Ol i mas go bek lukim ol dispela man na bekim ol askim bilong ol, na kwiktaim kirapim stadi wantaim ol.’ Em nau, taim yumi mekim ol gobek, yumi gat tingting long kirapim wanpela Baibel-stadi na mekim long olgeta wik.a Pasin bilong amamas na tingim gut dispela man i laik harim tok i save kirapim yumi long redi gut na mekim gut stadi.
18. Olsem wanem yumi ken helpim ol nupela man long kamap disaipel bilong Jisas Krais?
18 Buk Save i Bringim Man Long Laip Oltaim na buklet God i Laik Yumi Mas Mekim Wanem? ol i helpim yumi long mekim gutpela Baibel-stadi wantaim ol man long haus bilong ol yet na helpim ol long kamap disaipel. Taim yumi wok long bihainim pasin bilong Bikpela Tisa, Jisas Krais, na yumi stap isi wantaim ol man, na amamas, na bilip tru long wok yumi mekim, na daun long ol lo na ol tok bilong Jehova bilong stiaim yumi, dispela tu bai lainim ol. Taim yumi helpim ol nupela man long kisim bekim long ol askim bilong ol, yumi mas wok strong long lainim ol long pasin bilong bekim tok bilong ol man i givim askim long ol. (2 Timoti 2:1, 2; 1 Pita 2:21) Yumi ol wokman bilong bungim kaikai bilong gaden i amamas long mekim 4,766,631 Baibel-stadi long sevis yia i go pinis. Na yumi amamas moa sapos yumi yet i insait long dispela wok bilong mekim Baibel-stadi.
Amamas Yet Long Bungim Kaikai
19. I gat wanem as tru na ol disaipel inap amamas long wok bilong bungim kaikai bilong gaden long taim bilong Jisas na bihain liklik?
19 I gat as tru na ol disaipel inap amamas long bungim kaikai bilong gaden long taim bilong Jisas na bihain liklik. Planti i laik harim tok bilong gutnius. Long de Pentikos 33 C.E. i gat bikpela amamas moa, long wanem, inap 3,000 i bihainim tok bilong Pita, na ol i kisim spirit holi bilong Jehova na kam insait long lain Israel bilong God long spirit. Namba bilong ol i wok long go bikpela, na i gat bikpela amamas taim Jehova “i wok long kisim bek sampela manmeri, na . . . ol manmeri i bilip long Jisas i kamap planti moa.”—Aposel 2:37-41, 46, 47; Galesia 6:16; 1 Pita 2:9.
20. Wanem samting i mekim na yumi kisim bikpela amamas long wok bilong bungim kaikai bilong gaden?
20 Long dispela taim bipo, tok profet bilong Aisaia i wok long kamap tru, em i tok: “Bikpela, yu bin mekim ol manmeri bilong yu i kamap bikpela lain, na yu mekim ol i amamas moa yet. Ol i amamas long ai bilong yu, olsem ol i save amamas long taim ol i kisim ol kaikai i mau long gaden.” (Aisaia 9:3) Tru, nau i olsem namba bilong dispela “lain” God i bin makim ol, em inap pinis, tasol yumi kisim bikpela amamas taim yumi lukim namba bilong ol narapela wokman bilong bungim kaikai i go bikpela moa long olgeta yia.—Song 4:7; Sekaraia 8:23; Jon 10:16.
21. Long stori i kamap bihain long dispela, bai yumi toktok long wanem samting?
21 Tru tumas, i gat as tru na yumi ken amamas yet long wok bilong bungim kaikai bilong gaden. Yumi autim tok long ol gutpela samting ol man inap wet long en, na yumi wok long painim ol man i gat gutpela bel, na yumi laik kamapim pasin bilong i stap isi wantaim ol man—olgeta dispela samting i helpim yumi long kisim amamas long wok bilong bungim ol man. Tasol ol dispela samting i kirapim planti man long birua long yumi. Kain samting olsem i bin painim aposel Jon. Ol i bin kalabusim em long ailan Patmos, long wanem, em i ‘bin autim tok bilong God na autim tok olsem em i bilip long Jisas.’ (KTH 1:9) Orait olsem wanem yumi inap i stap amamas taim ol man i birua na mekim nogut long yumi? Long nau planti man i save pasim strong bel bilong ol taim yumi autim tok long ol, olsem na wanem samting bai helpim yumi long karim dispela hevi na stap strong? Stori i kamap bihain long dispela bai kamapim sampela tok bilong Baibel bilong bekim ol dispela askim.
[Futnot]
a Pastaim ol i bin mekim ol stadi long hap em ol man i laik harim tok i ken bung olsem wanpela grup. Tasol i no longtaim na ol i kirap tu long mekim stadi wantaim ol man wan wan na ol famili.—Lukim buk Jehovah’s Witnesses—Proclaimers of God’s Kingdom, pes 574, em ol Witnes Bilong Jehova i wokim.
Bai Yu Bekim Olsem Wanem?
• Wanem dispela wok i kain olsem wok bilong kisim na bungim kaikai bilong gaden?
• Yumi save autim wanem kain tok long ol man?
• I gat wanem as na wok bilong yumi long painim ol disaipel i kamapim gutpela samting?
• Long wok bilong bungim ol man, yumi mekim wanem bilong kamapim pasin bilong i stap isi wantaim ol man?
• I gat wanem as na yumi amamas yet long bungim kaikai bilong gaden?
[Ol Piksa long pes 12, 13]
Wok autim tok long taim bilong ol aposel na long nau
[Ol Piksa long pes 13]
Olsem Pol i bin mekim, ol wokman bilong bungim kaikai bilong gaden long nau, ol i wok strong long painim ol man i stap long olgeta hap
[Piksa long pes 13]
Taim yumi autim gutnius, pes i mas lait na amamas