I Mas i Gat Planti Wokman Moa Bilong Hariapim Wok!
“Planti tumas kaikai i redi pinis long gaden, tasol i no gat planti wokman Olsem na yupela i mas beten long Papa bilong gaden, bai em i ken salim wokman i go bungim kaikai bilong em.”—Luk 10:2.
1. Taim yu tingim tok Bilong Jisas long Luk 10:2, ating bai yu ting olsem wanem? Tasol gutpela sapos yu mekim wanem?
TAIM yu kaunim dispela tok Bilong Jisas olsem wanem? Yu pilim olsem yu yet yu insait long en? O ating yu pilim olsem Jisas i bin mekim dispela tok longtaim bipo na i no gat wok long yumi tingim long nau? Sapos yu ting olsem, yu popaia. Bilong save gut long as bilong dispela tok, pastaim yumi ken tingim ol samting i bin kamap taim Jisas i mekim dispela tok long bipo, na bihain yumi ken skelim ol samting i kamap nau long taim bilong yumi.—Lukim 1 Korin 10:11.
2. Long yia 32 C.E. bilong wanem Jisas i mas hariapim wok bilong autim tok? Em i mekim wanem bilong hariapim dispela wok?
2 Long 32 C.E. Bikpela De bilong tenkyu long kaikai i mau, em taim bilong ol i stap long ol haus win, dispela Bikpela De i pinis na nau Jisas i gat 6-pela mun tasol na bai ol i kilim em i dai. No gat bikpela hap taim moa, olsem na Bilong hariapim wok Jisas i salim 70 samting disaipel moa “ol i go tupela tupela, na ol i go paslain long em. Em i salim ol i go long olgeta taun na ples, bihain em yet i laik i go long en.” Jisas i tokim ol: “Planti tumas kaikai i redi pinis long gaden, tasol i no gat planti wokman. Olsem na yupela i mas beten long Papa bilong gaden, bai em i ken salim ol wokman i go bungim kaikai bilong em.”—Luk 10:1, 2.
Ol i Bungim Planti Kaikai
3. Taim Jisas i laik pinisim wok bilong em long graun, em i salim sampela wokman moa i go na wanem samting i kamap?
3 Planti wokman moa i go autim tok na wanem samting i kamap? Baibel i tok: “Bihain ol 72 man i kam bek na ol i amamas tru. Ol i tok, ‘Bikpela, mipela i bin kolim nem bilong yu, na ol spirit nogut tu ol i bihainim tok bilong mipela.’ ” Strong bilong God long daunim ol spirit nogut i kamap ples klia! Jisas i amamas long harim tok long gutpela wok ol i bin mekim na em i tok: “Mi lukim Seten i pundaun long heven olsem lait bilong klaut i pairap.” (Luk 10:17, 18) Jisas i save, taim Kingdom bilong God i kamap nupela long heven bai ol i rausim Seten na ol spirit nogut. Tasol taim em i stap long graun na em i lukim ol man nating ol i rausim ol spirit nogut, nau em i save olsem dispela gutpela samting i mas kamap tru long bihain. Olsem na em i tok i olsem Seten i pundaun pinis long heven.—Revelesen 12:5, 7-10.
4. Wok bilong “bungim kaikai” em Jisas wantaim ol disaipel i mekim paslain long Naisan 14 long yia 33 C.E., dispela wok em bilong mekim wanem?
4 Taim Jisas i tok long bungim kaikai long gaden, em i no tok long kaikai tru; nogat; em i tok long bungim ol man, em ol man i kain olsem sipsip na ol i laik harim tok bilong Kingdom na bihainim. Dispela “kaikai” i kamap ples klia; em i redi pinis. Tasol Jisas wantaim ol disaipel bilong em ol i gat liklik hap taim tasol bilong bungim dispela “kaikai” paslain long Naisan 14 long yia 33 C.E. Olsem na wok ol i mekim em bilong kirapim tasol bikpela wok bilong bungim kaikai em i mas kamap bihain long taim Jisas i dai na kirap bek.—Lukim Sam 126:1, 2, 5, 6.
5. Wanem ol bikpela samting i kamap long De bilong Pentikos long yia 33 C.E.? Na dispela i mekim wanem long bikpela wok bilong “bungim kaikai” i kamap bihain?
5 De bilong Pentikos i kamap long yia 33 C.E. na 120 samting disaipel bilong Jisas ol i bung long Jerusalem. “Kwik tumas wanpela nois i kam long heven, em i olsem krai bilong strongpela win, na i pulapim tru dispela haus ol i sindaun long en. . . . Holi Spirit i pulap long olgeta dispela bilipman. Na ol i stat long mekim tok long kain kain tok ples, olsem Holi Spirit i mekim i kamap long maus bilong ol.” Nau bikpela wok bilong bungim kaikai i kamap! Ol i bungim planti kaikai! “Long dispela de God i skruim 3,000 manmeri long namba bilong ol bilipman.” (Aposel 1:15; 2:1-4, 41) “Olgeta ol i wanbel, na long olgeta de ol i go long tempel. . . . Oltaim ol i litimapim nem bilong God, na bel bilong olgeta manmeri em i gutpela long ol. Long olgeta de [Jehova] i wok long kisim bek sampela manmeri, na em i skruim ol long namba bilong ol bilipman.” (Aposel 2:46, 47) Bihain “planti manmeri moa yet i bilip long Bikpela, na ol i kam insait long lain bilong em.” Na bihain moa “tok bilong God i ran i go. Na planti manmeri moa ol i kamap disaipel long Jerusalem. Na planti pris tu ol i bilip.”—Aposel 5:14; 6:7.
6. Ol man i kirap biruaim wok bilong Kingdom na dispela i pasim wok bilong Kingdom o olsem wanem?
6 Tasol nau hevi i kamap—sampela man i kirap biruaim wok bilong Kingdom. Tasol yu ting dispela i pasim wok bilong Kingdom? Yu ting ol disaipel i no wok strong moa long “bungim kaikai”? Nogat tru! “Ol dispela manmeri i ranawe nabaut, ol i go long ol arapela arapela ples na ol i telimautim gutnius.” Filip i go long taun Sameria na autim tok; planti manmeri moa ol i harim tok bilong em; ol man i gat spirit nogut i stap long ol na ol man bun bilong ol i dai o lek bilong ol i nogut, olgeta i orait gen. Olsem na “bikpela amamas i kamap long ol manmeri bilong dispela taun.”—Aposel 8:1-8.
7. Ol disaipel i bihainim tok bilong Jisas long Aposel 1:8 i go inap long wanem mak?
7 Taim Jisas i kirap bek em i tokim ol disaipel bilong em: “Bambai yupela i autim tok bilong mi long Jerusalem, na long olgeta Judia, na long Sameria, na i go inap long olgeta hap graun.” (Aposel 1:8) Ol i gat bikpela wok tru, olsem na i mas i gat planti wokman moa bilong hariapim dispela wok! Planti disaipel moa bai kamap! Dispela wok i kirap pinis na spirit bilong God i bosim. Sol, em man bilong kilim i dai ol Kristen, em i tanim bel na bihain “long olgeta hap bilong Judia na Galili na Sameria sios i stap gut. I no gat pait samting, na sios i kamap strong. Ol i aninit long [Jehova], na Holi Spirit i strongim bel bilong ol. Na planti manmeri i kam insait long sios.” (Apose19:31) Wok bilong bungim ol dispela manmeri ol i kain olsem sipsip, dispela wok i kamap bikpela na ating planti taim ol disaipel bilong pastaim i tingim tok bilong Jisas, em i tok: “Yupela i mas beten long Papa bilong gaden, bai em i ken salim ol wokman i go bungim kaikai bilong em.” Olsem wanem? Jehova, em “Papa bilong gaden,” em i harim beten bilong ol? Tru tumas em i mekim! Olsem na Baibel i tok, ol i bin autim dispela tok “long olgeta manmeri i stap long graun.”—Kolosi 1:23.
Mas Hariapim Wok Moa Yet long Nau
8. Bilong wanem nau long dispela taim i mas i gat planti wokman moa yet?
8 Nau long dispela taim i mas i gat planti wokman moa yet, winim bilong bipo. Bilong wanem? Long wanem, nau yumi mas autim tok long olgeta hap bilong graun, na i gat planti “kaikai” moa yumi mas bungim. Dispela i truim tok bilong Jisas, em i tok ol disaipel bilong em bai mekim bikpela wok moa, em wok bilong autim tok, i winim wok bilong em.—Jon 14:12.
9. (a) Ol samting Jon i lukim olsem piksa na em i stori long en long Revelesen 7:1-3, olsem wanem dispela i helpim yumi long save yumi mas wok hariap long nau? (b) Revelesen 14:4 i stori long “namba wan lain” God i kisim bek ol na long dispela yumi save long wanem samting?
9 Ol samting Jon i lukim olsem piksa na em i stori long en long Revelesen sapta 7:1-3, dispela i helpim yumi long save yumi mas wok hariap long nau. Jon i lukim “4-pela ensel i sanap long 4-pela arere bilong graun. Ol i holimpas 4-pela win bilong graun.” Ol i mas holimpas dispela 4-pela win i go inap long wanem taim? Inap long taim ‘ol i putim pinis mak bilong God bilong mipela long pes bilong ol wokboi bilong em.’ Hamas mun o yia moa na bai ol i kisim mak pinis? Samting bilong helpim yumi long save long bekim bilong dispela askim, em olsem: Long Memorial long 15 Epril 1984 inap olsem 9,081 i tokaut olsem ol i bilong lain 144,000. Dispela liklik hap lain bilong ol manmeri em spirit holi i makim ol, olsem lain remnan, ol i laspela hap bilong dispela lain Revelesen 14:4 i tok “God i bin baim bek ol namel long ol manmeri bilong graun, na ol i stap olsem namba wan lain God i kisim bek bilong em yet wantaim Pikinini Sipsip.” I olsem God i bungim pinis planti bilong dispela “namba wan lain.” Sapos i gat “namba wan lain,” orait olsem wanem? Ating i gat narapela lain tu God i laik bungim? Tru tumas! Ol narapela kaikai ol Juda i save bungim long taim bilong Bikpela De bilong sindaun long ol haus win, ol dispela kaikai i olsem piksa na i makim gut dispela narapela lain God i laik bungim.—Diuteronomi 16:13-15.
10. Long taim bilong yumi ol i wok long bungim wanem tupela lain? Olsem wanem dispela samting i helpim yumi long save i mas i gat planti wokman moa long nau?
10 Olsem na nau yumi save, taim wok bilong bungim lain remnan i laik pinis, orait wok bilong bungim dispela narapela lain i mas kirap. Ol samting Jon i lukim bihain i kamapim long ples klia dispela samting. Jon i tok: “Dispela olgeta i pinis, orait mi lukluk gen, na mi lukim planti tumas manmeri ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man, na bilong olgeta graun, na bilong olgeta kain skin, na bilong olgeta tok ples.” Jon i harim tok olsem ol dispela manmeri i winim taim bilong “bikpela hevi.” (Revelesen 7:9, 14) Liklik hap taim tasol i stap yet bilong inapim wok bilong bungim dispela ‘bikpela lain manmeri.’ Taim ol ensel i lusim “4-pela win bilong graun” bai i no gat taim moa bilong bungim dispela lain. Taim pinis! Olsem na i mas i gat planti wokman moa bilong hariapim dispela wok na bungim ol dispela manmeri, a?
Planti Tausen Ol i Kirap Mekim Wok
11. (a) Ol “arapela sipsip” bilong Jisas i insait tru long wok bilong bungim kaikai o olsem wanem? (b) Yumi tingim bikpela lain i bung long taim bilong Memorial long 1984 na yumi save long wanem samting?
11 Jisas i tok i gat ol narapela sipsip tu em i mas bungim. Em i tok: “Mi gat arapela sipsip tu, na ol i no bilong dispela banis. Mi mas bringim ol dispela tu. Na bai ol i harim maus bilong mi. Na bambai i gat wanpela lain sipsip tasol na wanpela wasman tasol bilong ol sipsip.” (Jon 10:14, 16) Samting olsem 3 milion “arapela sipsip” ol i kirap pinis long mekim wok na makim olsem ol i bilong dispela “wanpela lain sipsip.” Long dispela lain inap olsem 179,421 ol i bin kisim baptais long sevis-yia bilong 1984! Tasol bikpela lain tru, inap olsem 7,416,974, ol i bung long taim bilong Memorial long 1984. Olsem na yumi save long wanem samting? Yumi save i gat planti manmeri ol i bin harim maus bilong Wasman bilong ol sipsip, tasol i gat sampela samting na ol i no kirap yet na bihainim singaut bilong Jisas, em i tok: “Yu kam bihainim mi.”—Luk 5:27.
12. 1 gat wanem ol bikpela askim yumi olgeta wan wan i mas tingim?
12 Orait, olsem wanem long yu na dispela bikpela wok bilong ‘bungim kaikai’ nau long “las de bilong dispela graun”? (Matyu 13:39) Yu insait long bikpela lain nau ol i kisim amamas long wok bilong bungim kaikai? O yu sanap lukluk yet na long tingting i olsem yu surik long bihainim singaut bilong Gutpela Wasman bilong ol sipsip, em i tok: “Yu kam bihainim mi”? Nogut yumi olsem dispela tripela man bilong Luk sapta 9 em yumi stori pinis long ol, em ol i painim rot bambai ol i no ken kirap kwik bihainim Jisas. Dispela tripela man i lus tru long planti samting—ol i no inap kisim bikpela amamas bilong mekim wok bilong Kingdom, na bilong rausim ol spirit nogut i stap long sampela man!—Luk 9:57-62; 10:17.
13. Olsem wanem bilip i gat bikpela wok long kirapim yu bambai yu givim bel long mekim wok bilong bungim kaikai?
13 Aposel Pol i tok: “Sapos man i laik i go klostu long God, dispela man i mas bilip long God i stap.” (Hibru 11:6) Tru tumas, yumi mas bilip long God bambai yumi inap lusim sampela samting yumi yet yumi laik mekim na long laik bilong yumi yet yumi dediket long God na insait long wok bilong bungim kaikai. Olsem: Ating yu gat bikpela sik long skin; o ating sampela famili bilong yu ol i birua tru long ol Witnes Bilong Jehova; o ating yu pilim olsem yu lapun tumas na yu no inap senisim pasin bilong yu; o ating yu yangpela yet na yu pilim olsem yu no inap karim ol hevi ol narapela yangpela long skul i putim long yu. Maski yu gat wanem kain hevi, tasol yu no ken lusim tingting olsem Jehova i save gut long hevi bilong yu, winim olgeta narapela man. Na tu, em i redi long i go klostu long yu na strongim yu sapos yu go klostu long em.—Sam 103:13, 14; Jems 4:8.
Bilip Inap Surikim ‘Maunten’
14. Wanem insait bilong tok bilong Jisas long Matyu 17:20?
14 Jisas i tok: “Sapos yupela i gat bilip inap olsem pikinini bilong mastet, orait bai yupela i tokim dispela maunten hia, ‘Yu kirap na yu go long hap,’ na bambai em i go. Na bai i no gat wanpela wok yupela i no inap long mekim.” Dispela samting i kamap tru long planti handet tausen manmeri ol i bihainim singaut bilong kisim planti wokman moa kirap long 1980 samting. Ol hevi bilong ol, em pastaim ol i pilim olsem ol dispela hevi i olsem bikpela ‘maunten,’ Jehova i helpim ol na ol i bin winim ol dispela hevi. (Matyu 17:20; 19:26) Tingim ol samting i bin painim ol dispela manmeri:
15, 16. Stori long olsem wanem wanpela yangpela man long Amerika na wanpela man marit bilong lain Katolik long Brasil i winim ol bikpela hevi i pasim ol long kisim baptais.
15 Wanpela yangpela man long Kalifonia, long Amerika, em i gat sik polio na bun bilong em i dai. Famili bilong em i no lukautim em gut. Tasol bihain wanpela Witnes Bilong Jehova i autim tok na em i bungim dispela yangpela man. Em i kirap lainim em long ol tok bilong Baibel. Tasol yangpela man hia i save sem na taim Witnes i kam bilong mekim Baibel-stadi, dispela yangpela man i save tanim wil bilong wilsia bilong em na i go haitim pes long kona bilong rum. Inap planti mun i lus pastaim na dispela yangpela man i winim dispela hevi bilong em. Tasol em i winim pinis na nau em i wanpela Witnes i baptais pinis na em i stap amamas.
16 Tupela marit long Brasil ol i bilong lotu Katolik, tasol ol i les long lotu bilong ol na bihain tupela i kirap lainim tok bilong Baibel wantaim ol Witnes Bilong Jehova. Nau ol i pilim olsem ol i stap gutpela long ol samting bilong spirit, tasol ol i gat wanpela bikpela hevi, olsem wanpela ‘maunten,’ em olsem: Man i save smok. Nem bilong em Antonio na olgeta taim em i smok. Inap 48 yia em i bin smok, kirap long taim em i gat 7-pela krismas tasol! Planti taim em i bin wok long lusim smok, tasol em i no inap. Nau em i winim pinis dispela hevi. Antonio i tok: “Mi kisim save olsem sapos mi laik bai God i amamas long mi na mi laik dediket long God na mekim laik bilong Em, orait mi mas lusim smok. Mi beten strong planti taim na bihain mi inap lusim.” Antonio i amamas tru em inap kisim baptais long wara bilong makim dediket bilong em!—Sam 66:19; Mak 11:24.
17. (a) Wanem samting nogut i wok long taim bilong Jisas na ol disaipel na i wok strong moa yet long nau? (b) Jisas na ol disaipel i mekim wanem long ol spirit nogut i stap long ol man long taim bilong ol? Yumi inap mekim wanem bilong sakim ol spirit nogut long nau?
17 Long taim bilong Jisas na ol disaipel bilong em, planti Juda i gat spirit nogut i stap long ol na dispela samting i givim hevi long ol. Long nau tu ol spirit nogut i wok strong, long wanem ol i rausim pinis Seten wantaim ol spirit nogut long heven i kam daun long graun. (Revelesen 12:7-9, 12, 17) Jehova i givim strong long ol Kristen bilong pastaim na ol inap rausim ol spirit nogut, tasol Jehova i no givim dispela strong long lain bilong em long nau. Tasol em i givim ol klospait bilong spirit long ol Kristen na dispela i lukautim ol na helpim ol long sakim ol spirit nogut, na ol inap mekim wok long ol dispela klospait bilong helpim ol narapela man bambai ol i no aninit moa long strong bilong ol spirit nogut. (Efesas 6:10-18) Ripot i kam long Gana, long Afrika, i tok: “Ol brata i wok strong na long dispela rot ol i helpim planti manmeri long lusim strong bilong ol spirit nogut.” Wanpela Witnes i autim tok na em i bungim wanpela meri. Taim Witnes i kirap toktok wantaim dispela meri long ol tok bilong Baibel, “meri i kirap long krai.” Wanem as bilong dispela? Witnes i stori olsem: ‘Wanpela spirit nogut i save stap long dispela meri na taim dispela spirit i stap long em, spirit i mekim na meri i krai, na olgeta mani i stap long em i go pinis.’ Witnes i kirap long lainim dispela meri long ol tok bilong Baibel na meri inap sakim dispela spirit nogut na i no bosim em moa. Nau dispela meri inap dediket long Jehova.—Jon 8:32.
18. Stori long ol samting i bin painim wanpela meri na yumi ken save, ol ensel i stiaim wok bilong autim tok.
18 Sapos kain hevi olsem ol dispela hevi i painim wanpela man o meri, ating long tingting bilong dispela man o meri dispela hevi bai kamap olsem wanpela ‘maunten’ na em i ting em i no inap winim, na ating bai em i tingting long kilim i dai skin bilong em yet. Wanpela yangpela meri long Nu Silan i tingting long mekim olsem. Witnes i toktok wantaim dispela yangpela meri long namba wan taim em i lukim em i tingting planti na i olsem tingting bilong em i paul nabaut. Bihain dispela meri i tokim Witnes: ‘Taim yu kam toktok wantaim mi long namba wan taim mi tingting long kilim i dai skin bilong mi yet, tasol pastaim mi beten askim God long helpim mi.’ Em i beten pinis na stret Witnes i kam paitim dua bilong haus bilong em. Dispela meri i tok: ‘Mi tenkyu long God, long wanem em i harim beten bilong mi.’ Yu ting dispela samting i kamap nating? Orait, bilong wanem planti taim kain samting olsem i save kamap? Jisas i bin tok wanem? Em i tok: “Bihain bai Pikinini Bilong Man i kam bek olsem king, na olgeta ensel wantaim em, . . . Na em bai i tilim ol [man] na i putim long tupela lain, olsem wasman i save tilim ol sipsip i go long hap na ol meme i go long hap.” (Matyu 25:31, 32; lukim tu Revelesen 14:6.) Ol ensel i helpim Jisas long mekim dispela wok bilong tilim ol man, na ol i bringim ol “wanwok” bilong Bikpela i go long ol dispela manmeri ol i singaut long Em bilong helpim ol.—1 Korin 3:6, 9; lukim Aposel 8:26-39; 16:9, 10.
19. Wanem samting i stap long olgeta hap bilong graun long nau? Orait, yumi mas mekim wanem?
19 Maski wanem wanem hap yumi stap long en long nau, tasol i gat planti tausen manmeri long ol dispela hap em ol i gat ol dispela hevi planti Witnes Bilong Jehova i winim pinis. Ating sampela ol i stap klostu long yu! Ol i sot tru long man bilong helpim ol. Yumi mas hariap helpim ol. Tru tumas, olsem Jisas i tok: “Planti tumas kaikai i redi pinis long gaden.” Yumi mas beten strong askim Papa bilong gaden long salim planti wokman moa i go bungim kaikai bilong em nau long yia 1986. Bel bilong yu i mas kirapim yu long bihainim dispela singaut, olsem: I Mas i Gat Planti Wokman Moa Bilong Hariapim Wok!
Sampela Askim Bilong Helpim Yu long Tingim Gen Ol Bikpela Tok
◻ Husat i Papa bilong gaden?
◻ Ol i wok long bungim wanem tupela lain?
◻ Bikpela wok Jisas i tok ol disaipel bilong em bai mekim na i winim wok bilong em, em wanem wok?
◻ Olgeta man i insait long wok bilong bungim kaikai, bilong wanem ol i mas i gat bilip?