Ol Miting Bilong Wok Bilong Disemba

Wik i Kirap long Disemba 2

Singsing 69 (olpela 81)

(10 min) Ol toksave bilong kongrigesen.

(20 min) “Taim Famili i Wok Gut Wantaim Gutpela Samting i Painim Ol.” Wanpela elda i gat meri pikinini em i ken lukautim dispela hap. Makim wanpela brata long kaunim paragraf, na bihain kamapim askim.

(15 min) Sampela Stori long Wok BIlong Kingdom. Wanpela brata i ken lukautim dispela hap. Gutpela sapos em i wokim gutpela mep long blekbot, na bai ol brata sista inap save ol dispela kantri i stap we.

Polan na Hangari: Long Me 19, 1991, gavman long Polan i orait long ol Witnes Bilong Jehova i rejista long gavman, na long Jun 27, 1991, gavman long Hangari i orait long ol Witnes Bilong Jehova i rejista long gavman.

Meksiko: Long olgeta mun, inap 67 mun pinis, lain pablisa long Meksiko i go bikpela bikpela. Long mun Me, inap olsem 274,599 pablisa i autim tok​—⁠dispela lain i go bikpela inap 16 pesen. Ol i mekim planti Baibel-stadi tu, inap olsem 425,328, em winim olgeta mun bipo.

Spen: Long mun Me, inap olsem 77,828 pablisa i autim tok, na dispela lain i bin i go bikpela inap olsem 9 pesen. Em namba 8 taim long dispela yia bilong wok em lain pablisa i bin i go bikpela.

Swiselan: Inap olsem 17,897 pablisa i bin autim tok long mun Me, em bikpela lain tru, winim olgeta mun bipo.

Sambia: Long mun Me, lain pablisa i go bikpela inap 9 pesen, winim olgeta mun bipo​—⁠inap olsem 70,700 pablisa i bin autim tok. Ol i mekim planti Baibel-stadi tu, inap olsem 97,743.

Ol Ailan Fero: Ol dispela ailan Fero (Faeroe) i stap long hap bilong not bilong Solwara Atlantik. I gat liklik lain i autim tok long dispela hap, na ol i save wok strong long painim ol man i laik harim tok, maski ol i mas i go long ol liklik ailan i stap longwe. Ol i mekim planti Baibel-stadi long dispela hap, winim yia i go pinis inap olsem 39 pesen.

Wanpela meri bilong ol Ailan Fero i bin kisim baptais long dispela yia i go pinis, nem bilong em Elisabet. I no gat wanpela Haus Kingdom long dispela ailan em i stap long en. Taim em i laik i go long miting, em wantaim sampela manmeri moa ol i mas kalap long ka na bihain ol i mas kalap long sip. Em i kisim baptais, na bihain liklik wanpela wanblut bilong em i laik traim em na i tok, em i mas autim tok long ol manmeri long as ples bilong em yet. Wanblut i ting em bai pret long mekim. Olsem na em i strongim bel, na em i kisim 20 magasin na i go autim tok long ol wanples bilong em. Taim em i kam bek long haus, em i amamas tru. Em i bin tilim klostu olgeta magasin bilong em, na tupela tasol i stap. Nau sampela tambu bilong em i kam, na ol i kisim dispela tupela magasin i stap yet.

Singsing 73 (olpela 77) na beten.

Wik i Kirap long Disemba 9

Singsing 17 (olpela 18)

(10 min) Ol toksave bilong kongrigesen.

(20 min) Askim. Strongpela elda i mas lukautim dispela hap sapos inap. Kaunim paragraf pastaim, na nau kamapim askim, na bai ol i ken harim olgeta tok.

(15 min) Olsem Wanem Yumi Inap i Stap Wanbel Wantaim Ol Brata Long Olgeta Hap? Wanpela strongpela brata i ken toktok wantaim kongrigesen long ol tok i stap long buk Lo, pes 156, paragraf 1 i go inap long pes 157, paragraf 1.

Singsing 35 (olpela 15) na beten.

Wik i Kirap long Disemba 16

Singsing 220 (olpela 19)

(10 min) Ol toksave bilong kongrigesen. Ripot bilong ol akaun.

(20 min) “Autim Gutpela Tok—Kirapim Stadi Taim Yu Autim Tok Long Man Long Namba Wan Taim.” Paslain long miting makim wanpela brata i save gut long kaunim tok na bai em i ken redi long kaunim paragraf. Kaunim pinis paragraf, orait kamapim askim bilong en. Taim yu stori pinis long ol tok bilong paragraf 3 na 4, mekim soim long pasin bilong kirapim stadi long taim yu autim tok long man long namba wan taim. Mekim wok long buk Stap Oltaim o buk Baibel Stori o liklik nius nem bilong en Gutpela Sindaun Long Nupela Taim. Taim yu autim tok, sapos yu traim kirapim stadi wantaim man long namba wan taim yu toktok wantaim em, bai yu inap save, em i laik tru long harim tok o nogat. Helpim ol brata long save, ol i mas i go bek lukim olgeta man i bin harim tok, maski ol i bin kisim sampela magasin o buk samting o nogat. Kirapim olgeta brata sista long traim kirapim stadi taim ol i autim tok long man long namba wan taim.

(18 min) “Sampela Samting Bilong ‘Ol Man Bilong Laikim Pasin Bilong i Stap Fri’ Kibung Distrik Yumi Mas Tingim.” Wanpela brata i stori long ol dispela tok. Kirapim olgeta brata sista long redi nau bilong i go long kibung distrik.

Singsing 100 (olpela 51) na beten.

Wik i Kirap long Disemba 23

Singsing 190 (olpela 107)

(10 min) Ol toksave bilong kongrigesen. Stori long sampela tok i stap long ol nupela magasin. Kirapim ol pablisa long autim tok long dispela Sarere Sande. Stori long ripot bilong kongrigesen.

(20 min) “Buk-Stadi Bilong Kongrigesen—Namba 3 Hap.” Tupela brata i save lukautim Buk-Stadi ol i ken stori long dispela hap, na stori long olsem wanem dispela tok i stret long kongrigesen bilong ol. Kamapim klia olsem taim ol pablisa i autim tok wantaim ol grup, na ol i mekim long taim kongrigesen i makim, narapela inap helpim narapela. Taim yumi bung long haus bilong wanpela brata bilong i go autim tok, yumi mas tingim gut dispela haus na ol samting bilong dispela brata, na lukautim gut. Sapos kongrigesen i save bung long haus bilong sampela brata bilong mekim Buk-Stadi, tokim ol dispela brata ol i mekim gutpela wok. Long sampela sampela taim, yumi mas bung long narapela narapela hap bilong i go autim tok, olsem na sapos wanpela brata i orait long yumi bung long haus bilong em, gutpela sapos em i tokim wasman siaman o brata i lukautim wok autim tok long dispela samting. Wasman bilong wok autim tok em inap helpim na strongim ol pablisa bambai ol inap winim mak ol i laik winim long autim tok.

(15 min) Sapos Yumi Bihainim Stretpela Pasin, Dispela Bai Helpim Yumi? Lukim ol tok i stap long buk Yangpela, sapta 22, paragraf 14-22 na mekim dispela tok.

Singsing 38 (olpela 65) na beten.