Askim
◼ Sapos sampela i mekim bikpela rong, na i sot long ol elda bilong i stap olsem komiti bilong harim kot, ol i mas mekim wanem?
1 Pablisa i baptais pinis, sapos ol samting i kamap ples klia olsem em i bin mekim bikpela rong, orait, i mas i gat komiti bilong harim kot na ol i ken traim helpim dispela pablisa na lukautim kongrigesen na bai rong i no ken bagarapim.—1 Ko 5:6, 9-11; Ga 5:19-21.
2 I gutpela sapos komiti bilong harim kot i gat 3-pela o sampela taim 4-pela strongpela elda. Sapos kongrigesen i no gat 3-pela elda, ol i ken singautim sampela elda bilong narapela kongrigesen klostu sapos ol inap—em ol elda i gat save long mekim dispela wok. Sapos kongrigesen i stap longwe long ol narapela kongrigesen na i no inap kisim sampela ol narapela elda, orait, ol i ken kisim wanpela strongpela wokman bilong kongrigesen bilong inapim komiti. O sapos i no longtaim na wasman sekit bai kam, ating ol elda i ken wetim em na bai em wantaim ol i ken mekim dispela wok. Sapos i no inap tru long painim 3-pela o 4-pela elda, orait, tupela i ken harim kot na stretim dispela samting. (Mt 18:18-20) I mas i gat tupela elda o sampela elda moa insait long olgeta komiti bilong harim kot. Wanpela elda na tupela wokman bilong kongrigesen i no inap, na 3-pela wokman bilong kongrigesen tu i no inap.
3 Sapos bikpela rong i kamap insait long kongrigesen i gat wanpela elda tasol, o wanpela wokman bilong kongrigesen tasol, o wanpela elda helpim o wanpela wokman helpim tasol, orait, brata (o sista) i lukautim kongrigesen em i ken salim pas long brens-ofis na em i ken stori long dispela hevi, na brens-ofis yet bai toktok long pasin bilong stretim.
4 Long olgeta taim, sapos wanpela insait long kongrigesen em i mekim bikpela rong, ol strongpela brata i gat gutpela tingting na save ol tasol i ken i stap long komiti bilong harim kot na ol i ken stretim dispela hevi, long wanem, kongrigesen i mas bihainim gutpela lo tru bilong Jehova long stretim ol samting, na sapos sinman i tanim bel tru ol i ken marimari long em olsem Jehova i save mekim.
[Ol Askim]
1, 2. (a) Long wanem taim wanpela strongpela wokman bilong kongrigesen i ken stap insait long komiti bilong harim kot? (b) Kaunim Matyu 18:18-20. Komiti bilong harim kot i mas i gat hamas elda insait long en? (c) Husat i no inap kamap komiti bilong harim kot?
3. Wanem taim em brata o sista i mas toksave long brens-ofis long bikpela rong i bin kamap insait long kongrigesen?
4. Sapos i gat bikpela rong i kamap, wanem tupela as na ol strongpela brata i gat gutpela tingting na save ol tasol i ken i stap long komiti bilong harim kot?
This article is unique to PNG.