Autim Gutpela Tok—Kirapim Stadi Taim Yu Autim Tok Long Man Long Namba Wan Taim
1 Jisas i tok yumi mas wok long “mekim olgeta lain manmeri i kamap disaipel.” (Mt 28:19) Bilong inapim dispela wok, yumi mas wok long kirapim Baibel-stadi wantaim ol man i laik harim tok. Na sapos yumi kirapim stadi wantaim man long namba wan taim yumi toktok wantaim em, bai yumi inap mekim hariap dispela wok bilong kamapim disaipel. Na ol man bai save bilong wanem yumi go long haus bilong ol.
2 Taim yumi traim kirapim stadi long namba wan taim yumi toktok wantaim man, yumi ken tok wanem? Yumi no ken mekim planti tok tumas. Ating yu ken tok olsem: “Mi laik helpim ol manmeri long kisim save long tok bilong Baibel, na mi laik stadi wantaim yu na famili bilong yu long ol tok bilong Baibel, no gat pe. Mipela inap mekim wok long Baibel bilong yu, tasol sapos yu no gat wanpela Baibel, mi inap kisim wanpela i kam na yu ken mekim wok long en.”
3 Narapela tok yu inap mekim, em olsem: “Mi kam lukim yu long nau, long wanem mi laik bai yu kisim save long ol tok bilong Baibel. Sapos yu mekim olsem, bai yu save long ol samting i kamap long graun long nau na ol samting God i tingting long mekim bilong helpim yumi. Bai mi amamas tru long helpim yu long save long rot bilong kisim save long ol gutpela tok i stap long Baibel bilong yu.” Sapos man bilong haus i orait, ating bai yu inap mekim wok long liklik nius nem bilong em Gutpela Sindaun Long Nupela Taim o buk Baibel Stori (Stori 115) o buk Stap Oltaim (pes 156-163).
4 Mekim Wok Long Ol Liklik Nius Bilong Baibel: Planti pablisa i mekim wok long ol liklik nius bilong kirapim stadi wantaim man long namba wan taim ol i toktok wantaim em. Taim yu paitim dua na man bilong haus i kam, opim dispela liklik nius nem bilong en Gutpela Sindaun Long Nupela Taim na givim long man bilong haus, na bai em inap lukim gut piksa i stap long en. Yu yet yu mas holim narapela nius olsem, na bai yu inap kaunim o stori long ol askim i stap long namba 1 na namba 2 paragraf bilong en. Stori long bekim bilong ol dispela askim, na kaunim wanpela o tupela skripsa i helpim tok bilong yu. Tokim man bilong haus, yu bin amamas long toktok wantaim em, na yu laik i kam bek lukim em long narapela taim. Stori liklik long pasin bilong mekim Baibel-stadi, no gat pe; na sapos rot i op, stretim tok long kam bek lukim dispela man bambai yu inap stori moa long tok bilong dispela nius em i holim.
5 Taim yu wok long stretim rot bilong i go bek lukim man, gutpela sapos yu stori long wanpela samting em man bilong haus bai amamas long save long en. Ating yu inap kamapim wanpela askim samting bilong yu ken bekim long bihain, na bai man bilong haus i amamas tru long yu kam bek lukim em na bekim dispela askim.
6 Buk Stap Oltaim em i gutpela buk tru. Tok bilong en i helpim yumi long save, God em i stap tru (pes 34-36). Na dispela buk i helpim yumi long save, yumi inap bilip tru olsem Baibel em i tok bilong God. Ol gutpela piksa i stap long sapta 19 na 20, bai pulim ai bilong ol manmeri i gat gutpela bel, na bai ol i gat laik long kisim save long tok bilong Baibel na ol samting Jehova i tok long mekim long bihain. Olsem na yumi olgeta i mas tingting long painim rot bilong kirapim stadi wantaim man long namba wan taim yumi toktok wantaim em, na long dispela rot bai yumi insait long wok bilong ‘kamapim ol disaipel.’—Mt 24:14; 28:19, 20; Mk 13:10.
[Ol Askim]
1. (a) Yumi mas mekim wanem bilong inapim tok bilong Matyu 28:19, 20? (b) Bilong wanem i gutpela sapos yumi traim kirapim stadi wantaim man long namba wan taim yumi toktok wantaim em?
2, 3. Stori long sampela tok yu inap mekim bilong kirapim stadi wantaim man long namba wan taim yu toktok wantaim em.
4, 5. (a) Olsem wanem yu inap mekim wok long liklik nius bilong kirapim stadi wantaim man long namba wan taim yu toktok wantaim em? (b) Olsem wanem bai yu stretim rot bilong mekim gobek?
6. I gat wanem ol gutpela samting i stap long buk Stap Oltaim em inap helpim yumi taim yumi autim tok na mekim Baibel-stadi?