Namba 2 Hap: Sampela Samting Bilong “Ol Man Bilong Laikim Pasin Bilong i Stap Fri” Kibung Distrik Yumi Mas Tingim
BAPTAIS: Ol bai makim ples sindaun bilong ol man i laik kisim baptais, olsem na gutpela sapos ol man i laik kisim baptais ol i sindaun long ol dispela sia taim program i no kirap yet long Sarere long moningtaim. Man i laik kisim baptais, em i mas kisim klos waswas na taul bilong em i kam long kibung. Klos bilong waswas i mas stret long ol Kristen i pasim. Taim brata i mekim pinis tok bilong baptais na beten, siaman bilong program bai givim sampela toksave long ol man i laik kisim baptais na bihain bai yumi mekim singsing. Taim ol i kirap mekim laspela hap bilong singsing, ol atendan bai tokim ol man i laik baptais, long wanem hap ol i mas i go long en bilong kisim baptais, o ol bai makim ka bilong kisim ol i go long dispela ples; ol narapela brata sista i mas i stap na mekim singsing i go inap long pinis bilong en.
WOK VOLANTIA: I mas i gat ol volantia bambai wok bilong kibung inap kamap gutpela. Maski yu inap mekim liklik wok tasol, ol brata bai amamas long dispela liklik wok yu mekim. Sapos yu inap mekim wok volantia, orait taim yu kamap long ples kibung, yu mas i go long Dipatmen Bilong Wok Volantia, na tokim ol yu laik mekim sampela wok. Ol pikinini i no winim yet 16 krismas, ol tu inap mekim sampela wok bilong helpim kibung, tasol ol i mas wok wantaim papa o mama bilong ol o narapela brata o sista i bikpela pinis.
KAT BILONG PASIM LONG KLOS: Taim yumi go i kam long kibung o taim yumi stap long ples kibung, gutpela sapos yumi pasim dispela kat long klos bilong yumi. Ol man i lukim dispela kat ol i ken luksave olsem yumi wanpela Witnes, na ating bai ol i laik save long kibung bilong yumi na bai rot i op bilong yumi ken autim tok long ol. Yumi mas kisim dispela kat long kongrigesen bilong yumi yet, long wanem bai yumi no inap kisim long kibung.
WAS GUT: Maski yu putim ka long wanem wanem hap, yu mas lokim gut ka long olgeta taim na yu no ken larim sampela samting i stap ples klia insait long ka na bai ol man inap lukim. Sapos yu laik larim sampela samting i stap long ka, putim long baksait long ples hait na bai ol man i no inap lukim, na yu mas lokim gut baksait bilong ka. Na lukautim gut ol samting bilong yu long ples kibung, long wanem, taim planti man i bung wantaim, ol raskol i save kam na ol i laik stilim samting. Olsem na yu no ken lusim sampela samting bilong yu long sia long ples kibung, nogut ol raskol i stilim. Was gut!
This article has been partly taken from km-E 5/91 “Arrange Now to Attend the 1991 ‘Lovers of Freedom’ District Convention,” box on p. 6. Part 1 is in km 11/91.