Buk-Stadi Bilong Kongrigesen
Namba 3 Hap: Ples Bilong Bung Bilong i Go Autim Tok
1 Sapos brata i orait long yumi bung long haus bilong em bilong mekim Buk-Stadi, ating bai yumi bung long dispela haus taim yumi mekim bung bilong i go autim tok tu. Kongrigesen i mas makim taim bilong autim tok i stret long olgeta pablisa long olgeta wan wan Buk-Stadi, na ol tok brata i mekim long taim em i lukautim bung bilong i go autim tok i mas strongim na helpim ol pablisa i laik autim tok.
2 Sapos elda i stretim gut taim bilong mekim Buk-Stadi na bung bilong i go autim tok, na olgeta samting i wok gut, dispela samting bai helpim ol pablisa long ol samting bilong spirit. Taim brata i stori long ol tok yumi mas mekim sapos man bilong haus i no laik harim tok bilong yumi, o ol tok yumi mas mekim bilong kirapim tok wantaim man, o ol tok yumi mas mekim taim yumi laik kirapim man long stadi Baibel, o ol tok yumi mas mekim taim yumi go bek lukim man, ol dispela kain tok i strongim yumi, a? Taim yumi toktok wantaim ol narapela pablisa o painia long ples yumi bung long en bilong i go autim tok, tok bilong ol i save helpim yumi.—Ga 6:9, 10.
3 Wok Bilong Brata i Lukautim Buk-Stadi: Em i mas go pas long wok bilong autim tok, na em i gat wok long stretim wok autim tok bilong grup. Em i mas makim taim bilong wok wantaim olgeta wan wan pablisa long grup. (1 Pi 5:2, 3) Sapos em i redi gut long mekim bung bilong i go autim tok, ol tok em i mekim bai helpim grup long redi gut long autim tok. Gutpela sapos olgeta wan wan grup i gat bung bilong ol yet bilong i go autim tok, nogut olgeta grup i bung wantaim. Tasol sapos tupela liklik grup i mas bung wantaim bilong i go autim tok, i no gat rong long dispela. Sapos kongrigesen i mekim Stadi Wastaua, na bihain ol i go autim tok, orait, olgeta wan wan brata bilong lukautim Buk-Stadi i mas lukautim grup bilong ol yet.
4 Sapos kongrigesen i makim wankain taim long olgeta wik bilong autim tok, dispela bai kirapim ol pablisa long autim tok long olgeta wik. Sapos kongrigesen i makim taim na ples bilong autim tok, na long olgeta wik ol i bung long dispela taim na ples, orait ol pablisa bai save long dispela, na ol i save, sapos ol i go long dispela hap bai i gat teritori bilong ol i autim tok long en na bai i gat sampela pablisa moa bilong ol i wok wantaim ol, dispela bai kirapim ol pablisa long givim bel long autim tok wantaim grup. (Lu 10:1) Sapos brata bilong lukautim grup em i no inap lukautim grup, em i mas redim hap teritori bilong grup i autim tok long en. (om-MP pes 44, 45) Sapos i no gat wanpela brata i stap bilong lukautim bung bilong i go autim tok, brata bilong lukautim Buk-Stadi em i mas makim wanpela sista bilong lukautim dispela bung bilong i go autim tok. (om-MP pes 77, 78) Sapos grup i bung long wankain taim na long wankain ples long olgeta wik, bai ol brata sista long dispela grup ol i no paul nabaut. Sapos i mas i gat sampela senis long taim na ples bilong autim tok, orait brata bilong lukautim grup em i mas toksave long dispela samting inap olsem wanpela wik paslain long taim senis i kamap.
5 Olgeta i Mas Wok Wantaim: Olgeta i mas tingting long insait long olgeta kain wok autim tok. Ol pablisa i ken tingting long mekim traim pasin bilong autim tok—sampela i ken kamapim askim samting ol man inap givim long ol taim ol i autim tok, na narapela i ken kamapim sampela tok bilong bekim dispela askim.—Snd 27:17.
6 Olsem wanem? Yu laik bai wanpela strongpela pablisa i helpim yu long mekim gut wok bilong autim tok na kamapim ol disaipel? Sapos olsem, orait yu go tokim brata i lukautim Buk-Stadi bilong yu. Ating em bai tokim wanpela strongpela pablisa long helpim yu. Na taim em i stretim rot pinis bilong narapela i helpim yu, yu mas bihainim gut tok bilong em na autim tok wantaim dispela pablisa em i bin makim bilong helpim yu.
7 Narapela i mas helpim narapela bambai yumi inap autim gut tok na kamapim disaipel. Pasin bilong graun i wok long i go nogut moa yet, olsem na yumi save yumi mas hariap mekim dispela wok bilong autim tok. Yumi mas tingim laip bilong ol man. Jehova i wok long hariapim wok bilong bungim ol man i kam long lain bilong em. (Ais 60:22) Taim yumi tingim dispela wok God i bin givim long yumi, bai yumi wok gut wantaim grup bilong yumi, na bai yumi inap mekim gut wok bilong yumi na strongim olgeta narapela brata sista i stap long grup bilong yumi.—Ro 12:6-8; 2 Ti 4:1, 2, 5.