Buk-Stadi Bilong Kongrigesen i Save Skulim Yumi
1 Buk-Stadi Bilong Kongrigesen i save mekim bikpela wok long skulim yumi ol lain bilong Jehova. Ol buk-stadi i stap nabaut nabaut long teritori na bai yumi olgeta i no hatwok long i go long en. Na taim yumi singautim ol nupela man i kam long buk-stadi, ating bai ol i amamas long kam, long wanem, buk-stadi i klostu tasol long haus bilong ol.
2 I no gat planti manmeri insait long grup, olsem na brata i lukautim stadi inap helpim gut olgeta wan wan bilong grup. Sampela i save lain hariap na sampela i lain isi isi. Sapos sampela i redim gut ol tok bilong stadi, tasol ol i hatwok yet long kisim gut wanpela hap tok, orait taim stadi i pinis, ating brata i lukautim stadi em i ken toktok moa wantaim ol long dispela samting. Grup i liklik tasol, olsem na yu inap bekim planti askim na kaunim sampela skripsa. Olsem wanem? Oltaim yu save bekim tok na helpim dispela stadi? Yu traim bekim tok long toktok bilong yu yet? Sapos yu amamas long mekim sampela tok insait long stadi, dispela bai helpim yu yet na ol narapela tu. Taim yu redim ol tok bilong stadi, skelim gut ol tok bilong en na bai yu inap save olsem wanem yu inap bihainim sampela tok bilong stadi.—Hi 5:14.
3 Sapos yu tingim pasin em brata i lukautim buk-stadi i mekim wok long en bilong lainim ol man, bai yu kisim save long ol samting yu ken mekim na bai yu inap skulim gut ol Baibel-stadi bilong yu na kirapim tingting bilong ol na bai ol i amamas long stadi. Wanpela brata i save gut long kaunim tok em i ken kaunim ol paragraf, na taim em i kaunim pinis, brata i lukautim stadi em i ken kamapim askim bilong en. Em i save kirapim olgeta long grup long toktok strong. Sapos i gat taim, em i save kirapim ol brata sista long stori liklik long ol skripsa em paragraf i no kamapim tok bilong en—em i laik helpim yumi long save olsem wanem yumi inap bihainim ol tok bilong ol dispela skripsa. (Lukim Nehemia 8:8.) Sampela taim ating em i ken mekim liklik tok bilong em yet bilong kamapim klia ol tok. O em i ken kamapim sampela askim moa bilong stiaim tingting bilong yumi na bai yumi bekim stret na kisim gut ol bikpela tok. O em i ken kamapim wanpela stori o tok piksa bilong helpim yumi long save olsem wanem ol dispela tok inap helpim yumi.
4 Long sampela Buk Stadi Bilong Kongrigesen, planti insait long grup ol i no go long stadi. Olsem wanem? Oltaim yu save go long stadi? Sapos nogat, yu lus long wanpela bikpela samting Jehova i givim long yumi. Buk-stadi em i wanpela rot i kamapim klia olsem Jehova i tingim yumi. (1 Pi 5:7) Em i laik bai yumi kisim gutpela tingting na sampela save moa na bai yumi ken stap strong long ol samting bilong spirit. Tasol Satan i laik pasim yumi na bai yumi no wok long kamap strong long ol samting bilong spirit—em i laik bai yumi slek na bai Jehova i no ken mekim bikpela wok long yumi insait long oganaisesen bilong Em. Yu no ken larim em i mekim olsem! Yu mas pilim tru gutpela pasin sori bilong ol brata sista insait long grup bilong yu, na larim dispela i kirapim yu long wok yet long litimapim nem bilong Jehova.—Lukim Song 111:1.
5 Ating ples bilong buk-stadi em i ples tu bilong ol pablisa i ken bung bilong i go autim tok. Ating grup i ken bung namel long wik o long Sarere Sande o long apinun. Brata i lukautim buk-stadi i mas stretim rot na bai teritori i ken inap long ol, na bai i gat wanpela brata i stap em i ken lukautim grup i go autim tok. Grup i ken bung inap 10 o 15 minit, no ken kalapim ol dispela minit. Sapos teks bilong de i stori long wok autim tok bilong yumi, orait sapos brata i laik, em i ken stori liklik long dispela teks. Na em i ken kolim stret wanpela o tupela tok ol brata i ken mekim wok long en long taim ol i autim tok o em i ken mekim sotpela soim long pasin bilong tilim samting bilong mun.
6 Brata i lukautim buk-stadi i ken stretim rot bilong wok wantaim ol narapela narapela brata sista bilong grup bilong em, na em i ken givim sampela tok i stret long ol bilong strongim na skulim ol.—Lukim Mak 3:14; Luk 8:1.