Buk-Stadi Bilong Kongrigesen
Namba 1 Hap: Wok Bilong Brata Bilong Lukautim Buk-Stadi
1 Buk-Stadi bilong kongrigesen i mekim bikpela wok long helpim yumi ol lain bilong Jehova long kamap strong long ol samting bilong spirit. Inap sampela mun bihain bai yumi skelim ol wok bilong Buk-Stadi na olsem wanem em inap helpim yumi. Wok Kingdom Bilong Yumi long dispela mun i stori long ol samting brata bilong lukautim Buk-Stadi i ken mekim na bai Stadi inap strongim bel na bilip bilong yumi.
2 Brata bilong lukautim Buk-Stadi em i mas redim gut Stadi pastaim na bai em inap lainim gut yumi. Em yet i mas stadi gut long Baibel na em i mas save long bekim bilong ol wan wan askim, tasol em i mas save tu bilong wanem ol dispela bekim i stret long ol askim bilong en. Na em i gat wok long helpim olgeta man i kam long Buk-Stadi long save bilong wanem ol dispela bekim i stret. (1 Pi 3:15) Ol dispela samting bai helpim ol man long pilim tru moa ol tok bilong Stadi.
OL MAK EM BRATA BILONG LUKAUTIM BUK-STADI I LAIK WINIM
3 Wanpela mak em i laik winim insait long Buk-Stadi em olsem: Em i laik mekim wok long ol tok bilong buk bilong strongim bilip bilong olgeta man i kam long Buk-Stadi na bai ol i gat laik long mekim bikpela wok moa bilong God. (Sng 110:3; 2 Te 1:3-5) Bilong mekim olsem, sampela taim brata i mas malolo liklik long toktok na bai ol bikpela tok bilong Stadi i ken go daun long bel bilong ol bilong strongim bilip bilong ol long Jehova na Tok bilong em na oganaisesen bilong em. Sapos i gat taim, em i ken kamapim sampela gutpela askim moa long sampela tok bilong paragraf em inap strongim bilip bilong ol.
4 Narapela mak em brata bilong lukautim Buk-Stadi em i laik winim em olsem: Em i laik helpim olgeta long save, olsem wanem ol inap mekim gutpela wok long ol dispela tok taim ol i autim tok long man, na bilong strongim ol brata sista, na ol nupela man, na famili bilong ol, na ol yet. Taim Brata bilong lukautim Buk-Stadi i redim ol tok bilong stadi, em i mas tingting long olsem wanem ol man i kam long Buk-Stadi ol inap mekim gutpela wok long sampela tok bilong Stadi.
5 Ating sampela tok inap helpim ol wanlain em ol i no bilip, o ol wanskul, o ol wanwok. Na ating sampela tok inap helpim ol Witnes em poroman marit bilong ol i no Witnes, o ol famili i no gat papa o mama i stap. Brata bilong lukautim Buk-Stadi i ken kamapim sampela askim bilong kirapim ol brata sista long kamapim tingting bilong ol bambai em inap helpim ol long pilim na skelim gut ol dispela tok na mekim wok long en. Brata bilong lukautim Buk-Stadi i mas kamapim ol askim na ol man i ken bekim, tasol i no dispela samting tasol em i mas mekim—em i mas mekim gutpela stadi bilong kirapim tingting bilong ol na bai ol i ken amamas long Buk-Stadi.—Lukim 1 Korin 14:9, 19.
TINGIM GUT OL MAN
6 Sapos brata bilong lukautim Buk-Stadi em i tingim gut olgeta wan wan long grup, orait em inap kirapim olgeta long bekim planti askim. Sapos sampela long grup i sem liklik, orait, paslain long stadi makim ol long kaunim sampela skripsa, o paslain long stadi givim wanpela askim long ol na bai ol i ken redim bekim bilong en. Olgeta i mas wok long bekim tok long tok bilong ol yet. Taim ol man i bekim tok, sapos brata bilong lukautim Buk-Stadi i putim gut yau, bai em inap save, husat ol i no save gut long bekim tok. Olsem na makim sampela brata long grup em ol i save gut long pasin bilong bekim tok, na ol i ken helpim ol dispela man.
7 Buk-Stadi bilong kongrigesen i helpim gut tru yumi. Em i gutpela rot bilong yumi ken bung long ol liklik grup na bai narapela i ken helpim narapela. Yumi no ken ting Buk-Stadi i olsem miting nating na ol narapela miting i winim Buk-Stadi, nogat. Brata bilong lukautim Buk-Stadi i tingim wok bilong em i bikpela samting—em inap mekim wok long Stadi na bai Stadi inap strongim bilip bilong yumi long Jehova, na em inap helpim yumi long pilim moa yet ol samting bilong spirit em God i bin givim long yumi.