Ol Wasman i Go Pas Long Wok—Ol Wasman Bilong Buk-Stadi
1 Taim wanpela elda o wokman i gat save i mekim wok olsem wasman bilong Buk-Stadi Bilong Kongrigesen em i kisim wanpela gutpela wok tru. Bilong lukautim ol manmeri i save i go long grup bilong em long ol samting bilong spirit i bikpela wok tru. I gat 3-pela hap bilong dispela wok bilong em.
2 Skulim Gut Ol Man: Wasman bilong Buk-Stadi i mas redim gut ol tok bambai em i ken skulim gut ol manmeri i bung long Buk-Stadi long olgeta wik. Em i laik helpim ol brata sista long pilim tru tok ol i stadi long en. Nogut em yet i toktok tumas long taim bilong stadi, sapos i gat wok long mekim em bai kamapim sampela askim i stret bilong kamapim as tingting bilong stadi. Bikpela wok bilong em i bilong mekim stadi i kamap gutpela na skulim ol brata sista na helpim olgeta long bekim sampela tok insait long stadi. Bikpela tingting bilong em i olsem, em i laik helpim ol brata sista long kamap strong long spirit, na kamapim klia olsem wanem ol i ken bihainim ol tok bilong stadi, na em i mas putim dispela tok long tingting na bel bilong ol.—1 Te 2:13.
3 Helpim Ol Brata Sista: Wasman bilong Buk-Stadi i olsem “ples hait ol manmeri i ken go na hait long en long taim bilong bikpela win na ren.” (Ais 32:2) Em i save tingim tru olgeta wan wan i stap long grup bilong em na sapos wanpela long grup bilong em i gat hevi samting, orait em i save helpim em long ol samting bilong spirit.—Ese 34:15, 16; 1 Te 2:7, 8.
4 Givim Bel Long Autim Tok: Wasman bilong Buk-Stadi i save tingim gut ol brata sista na i save stretim rot bambai ol brata sista long grup bilong em i ken insait moa long autim tok. Em i save i go pas long autim tok, na em i save olsem taim em i amamas na givim bel long autim tok na em i autim tok oltaim, dispela bai kirapim ol brata sista long grup long bihainim dispela pasin. (Kl 4:17; 2 Te 3:9) Em i tingting strong long wok wantaim olgeta wan wan pablisa long grup bilong em long autim tok. Sapos yumi laik wok autim tok bilong yumi na wok bilong yumi long skulim ol man i kamap gutpela, orait wasman bilong Buk-Stadi inap helpim yumi long winim dispela mak.—1 Ti 4:16; 2 Ti 4:5.
5 Yumi kisim gutpela blesing tru long rot bilong ol dispela man, em ol i olsem presen na ol i save redi long helpim yumi long ol samting bilong spirit na laikim yumi na sambai long yumi. (1 Te 5:14) Taim yumi go oltaim long Buk-Stadi na givim bel long autim tok, bai yumi kamapim klia olsem yumi tenkyu long Jehova i givim ol dispela gutpela wasman long yumi.—Hi 10:25.