Mekim Gutpela Wok Long Ol Olpela Buk
1 Long olgeta hap bilong graun, ol man i bungim bungim planti milion olpela buk long ol laibreri. Tasol olsem wanem, ol dispela buk i helpim ol manmeri inap long olgeta taim bihain? (Sav 12:12) Ol buk i stori long Kingdom bilong God na ol samting dispela Kingdom bai mekim long ol manmeri, ol i gutpela tru bilong helpim ol man. Ating sampela kongrigesen i gat yet ol narapela narapela buk em Sosaiti i bin daunim pe bilong ol. Planti bilong ol dispela buk long tok Hiri Motu i stap yet, tasol klostu olgeta olpela buk long tok Pisin i pinis long nau na ol kongrigesen i no inap kisim moa. Long Janueri yumi laik wok strong long tilim ol dispela olpela buk bilong 25 toea na 50 toea long tok Hiri Motu. Yumi ken tilim long ol Baibel-stadi, ol gobek, na ol narapela man i amamas long harim tok. Yumi ken tilim tu buk Stap Oltaim long tok Hiri Motu, tok Pisin, o tok Inglis long K2.00.
2 Ol Inap Helpim Tru Ol Man: Ating sampela bilong yumi bai ting olsem ol dispela buk i olpela taim yumi skelim wantaim ol nupela buk bilong yumi, tasol yumi mas tingim olsem ol dispela buk i gat ol tok i tru bilong Baibel long en. Ol tok bilong Kingdom em ol dispela buk i kamapim em inap helpim yet ol man long nau, na sapos ol i bihainim, ol inap kisim laip. (Jo 17:3) Olsem na yumi mas wok strong long mekim gutpela wok long ol dispela olpela buk.
3 Bilong save long gutpela wok ol olpela buk inap mekim, yumi ken tingim stori bilong wanpela meri em i bin kisim ol olpela buk na magasin bilong Sosaiti Was Taua long tumbuna mama bilong em. Wanpela Witnes i askim em, em i save long wok tru bilong ol dispela buk. Meri i tok: “Mi no save long wok tru bilong ol, tasol mi inap save olsem wanem?” Dispela meri i orait long stadi long Baibel, na em i kam insait long tok i tru, na i no longtaim na em i laikim tumas ol dispela buk bilong tumbuna mama bilong em. Man! Ol dispela olpela buk em i kisim long tumbuna mama bilong em ol i bin kamapim gutpela samting tru!
4 Tilim Ol Dispela Buk: Yumi ken tilim ol olpela buk long taim yumi autim tok long ol haus, na tu long taim yumi mekim gobek long ol man i laik kaunim ol buk bilong yumi, na yumi ken tilim tu long ol man i kisim sabskripsen bilong Wastaua na Kirap!, na long ol man i save kisim ol nupela magasin long olgeta taim. Yu ken tilim sampela olpela buk long ol Baibel-stadi bilong helpim ol long kisim sampela save moa long tok i tru. Sapos yu nogat ol dispela buk long laibreri bilong yu orait no ken lusim tingting long kisim sampela bilong yu yet. Long dispela rot, yu bai bungim ol gutpela buk bilong Baibel, na yu ken mekim wok long ol dispela buk long mekim stadi bilong yu yet i kamap gutpela moa.
5 Nogut yumi larim ol olpela buk bilong yumi i stap nating, nogat; yumi mas mekim gutpela wok long ol bilong kirapim ol man long “aninit long God tasol na bihainim ol lo bilong em.”—Sav 12:13.