Askim

◼ Yumi mas putim wanem ol buk na nius samting long laibreri bilong Skul Bilong Wok Autim tok?

I gat planti buk na nius samting bilong spirit bilong helpim lain bilong God. Planti pablisa i no gat olgeta dispela buk na nius samting bilong ol yet, olsem na ol i ken mekim wok long laibreri bilong Skul long Haus Kingdom bilong mekim stadi samting. Sapos i gat, yupela i ken putim ol narapela narapela Baibel, na wanpela gutpela dikseneri. Putim ol nupela buk samting bilong Sosaiti, na olgeta wan wan Wok Kingdom, na tu, ol volyum bilong Wastaua na Kirap!, o ol wan wan Wastaua na Kirap! yupela i bungim long wanpela karamap. Ol kongrigesen i gat ol brata sista i save long tok Inglis, orait ol i ken putim ol volyum bilong Wastaua na Kirap! long tok Inglis na tu ol Watch Tower Publications Index. Ating long ol dispela kongrigesen sampela inap mekim gutpela wok long ol buk Encyclopedia, ol buk i gat mep, na sampela narapela buk bilong save gut long tok Inglis, na ol buk i stori long ol samting i kamap long bipo, tasol ol dispela buk i no bikpela samting tumas. Bikpela samting em yumi mas putim long laibreri ol buk na nius samting em lain “wokboi i gat gutpela tingting” i bin kamapim.​—⁠Mt 24:45.

I no stret sapos yumi putim ol buk i gat ol stori nating, ol buk i daunim tok bilong Baibel, o ol buk i kamapim ol tok nating i no gat as bilong en o posin marila samting. Laibreri bilong Skul Bilong Wok Autim Tok i mas i gat ol buk bilong helpim ol man i mekim wok long en long kamap strong long ol samting bilong spirit, ol narapela buk nogat.​—⁠1 Ti 4:⁠15.

Wasman bilong skul i mas lukautim ol samting bilong laibreri, ol i ken makim narapela brata long helpim em. Em i mas stretim ol samting bambai laibreri i gat ol nupela nupela buk na magasin long en, na taim yumi kisim ol nupela buk o magasin samting, em i mas putim hariap long laibreri. Long insait bilong karamap bilong olgeta buk yupela i mas raitim nem bilong kongrigesen. Long olgeta yia, skelim ol buk na stretim o senisim sampela sapos ol i olpela o bagarap pinis.

Olgeta brata sista i ken wok wantaim bilong lukautim laibreri. Yupela i mas was gut tru taim yupela i mekim wok long ol buk. No ken larim ol pikinini i pilai long ol buk, na ol brata sista i no ken makim ol buk bilong laibreri. Putim wanpela toksave olsem ol i no ken kisim ol buk bilong Haus Kingdom i go long narapela hap.

Sapos kongrigesen i no gat wanpela laibreri yet, o i no gat olgeta buk na magasin samting long en, orait yupela i mas wok wantaim bilong stretim dispela samting. Sampela pablisa i gat ol olpela buk samting bilong Sosaiti, ol i ken tingting long givim sampela long kongrigesen. Ating wasman sekit i ken helpim sampela kongrigesen long stretim laibreri bilong ol. Sapos ol narapela kongrigesen i gat tupela tupela buk samting na ol i tingting long givim sampela long ol narapela kongrigesen, orait wasman sekit i ken toksave long ol. Na tu, yupela i ken putim oda bilong ol volyum bilong Wastaua i stap long Lista Bilong Ol Buk Samting. Sosaiti i no wokim moa ol volyum bilong ol magasin long tok Pisin na Hiri Motu, olsem na yupela i mas bungim olgeta wan wan magasin bilong wanpela yia. Ating laibreri yet i mas i gat sabskripsen bambai olgeta wan wan magasin i stap long laibreri. Sapos yumi mekim ol dispela samting, laibreri bilong Skul Bilong Wok Autim Tok bai helpim tru yumi long kisim save long ol gutpela gutpela samting i stap long Baibel, em i givim gutpela tingting na save long yumi.​—⁠Snd 2:​4-6.