Nupela Wok Bilong Lukautim Ol Laibreri Bilong Haus Kingdom
Inap planti yia nau, ol kongrigesen long olgeta hap ol i bin kisim gutpela helpim long rot bilong laibreri i stap long Haus Kingdom bilong ol, pastaim ol i bin kolim olsem laibreri bilong Skul Bilong Wok Autim Tok. Long bipo, olgeta wan wan kongrigesen i mas i gat laibreri bilong ol yet. Tasol long nau i gat tupela o tripela kongrigesen i yusim wanpela Haus Kingdom na i luk olsem dispela pasin bai kamap bikpela moa long bihain, olsem na i gutpela moa sapos i gat wanpela laibreri tasol bilong ol wan wan tok ples i save yusim wanpela Haus Kingdom. Na dispela laibreri i mas i gat ol nupela buk Sosaiti i wokim wantaim planti ol narapela buk bilong Sosaiti.
Dispela nupela pasin bai i mekim na i gat bikpela spes moa long Haus Kingdom, na bai i no gat wok long tromoi bikpela mani tumas. Na tu, laibreri bai kamap gutpela moa taim yupela i bungim tupela o tripela laibreri wantaim. Sapos i gat planti kopi bilong wanpela buk samting, orait putim ol i stap long wanpela hap na yusim bihain taim i gat nupela Haus Kingdom.
Long wan wan laibreri bilong Haus Kingdom, wanpela brata, na i gutpela moa sapos em wanpela wasman bilong Skul Tiokratik Bilong Autim Tok, em i mekim wok bilong lukautim laibreri. Oltaim em i mas putim ol nupela buk samting long laibreri, na em i mas raitim gut tok long ol bilong makim olsem ol i bilong laibreri bilong Haus Kingdom. I gutpela sapos wanpela taim long olgeta yia em i skelim ol buk samting bilong laibreri bilong save olsem i no gat wanpela i lus o i bagarap. No ken kisim ol buk na nius bilong laibreri i go ausait long Haus Kingdom.
Olgeta insait long kongrigesen ol i amamas long laibreri bilong Haus Kingdom. I gutpela yumi olgeta wan wan i soim olsem yumi amamas tru long dispela gutpela samting, na yumi ken mekim olsem taim yumi lukautim gut laibreri na yusim bilong kisim “save gut long God.”—Snd. 2:5.