Ol Kibung “Bihainim Rot God i Makim” i Bin Helpim Gut Yumi
1 Sampela mun i go pinis, yumi bin wok long redi long go long ol “Bihainim Rot God i Makim” Kibung Distrik na Kibung Intenesenel bilong 1998. Nau ol dispela kibung i pinis. Yumi bin amamas tru long kisim ol gutpela gutpela kaikai bilong spirit na bung wantaim ol brata sista long ol dispela gutpela bung i bin kamap long Lae, Pot Mosbi, Alotau, na Kiunga. Taim yumi lukim planti brata na sista bilong ol longwe hap ol i wok strong bilong kam long ol dispela kibung, dispela i bin strongim yumi tru. Taim ol dispela brata sista i ‘litimapim nem bilong Jehova namel long planti manmeri,’ dispela i strongim tru bilip bilong ol.—Sng 35:18, NW.
2 Yumi amamas tru, long wanem, inap olsem 108 brata na sista bilong Papua Niugini ol i bin go long ol kibung intenesenel long Vankuva, long Kanada, na Ostrelia. Long olgeta wan wan de i gat “Ripot Long Wok Bilong Bungim Kaikai” i kam long olgeta hap, na dispela i bin strongim yumi tru.
3 Ol Nupela Buk Samting: Laspela tok long Fraide i bekim wanpela askim em planti manmeri i no save long tok i tru ol i save kamapim, olsem: “I Gat Laip Bihain Long Taim Yumi Dai?” Long pinis bilong dispela gutpela tok, brata i tokaut long nupela buklet, What Happens to Us When We Die? long tok Inglis na tok Hiri Motu. Olsem wanem? Yu bin lusim sampela hap taim bilong kaunim na save long olsem wanem em i gutpela tru bilong helpim ol manmeri long kisim save long ol samting i painim ol man i dai pinis? Na long tokim ol manmeri long bilip bilong kirap bek na mekim gut bel bilong ol man em wanpela long famili i dai?
4 Laspela tok long program bilong Sarere apinun em, “Man Bilong Wokim Yumi—Wanem Ol Pasin Bilong Em.” Dispela tok i helpim yumi long save olsem wanpela Man bilong wokim yumi em i stap tru. Bilong helpim ol man long pilim tru dispela samting, brata i kamapim wanpela nupela buk, em Is There a Creator Who Cares About You? Dispela buk i strongim bilip bilong yumi yet long Jehova na helpim yumi long pilim tru ol pasin bilong em, tasol ol i wokim dispela buk bilong helpim ol man i kisim bikpela skul long ol samting bilong dispela graun, tasol ol i no bilip long God.
5 Wanpela Gutpela Tokaut: Laspela tok bilong kibung i strongim yumi olsem, yumi olgeta i mas “Wokabaut Yet Long Rot Jehova i Makim.” Em i stret tru long yumi wan wan i bin tokaut long ples klia olsem yumi laik bihainim yet, na tokaut yet olsem rot God i makim bilong yumi wokabaut long en em i nambawan tru! (Ais 30:21) Nau yumi mas wok strong long bihainim ol dispela tok. Tru tumas, taim yumi go long “Bihainim Rot God i Makim” Kibung Distrik, yumi bin kisim ol gutpela tok bilong strongim yumi long ol samting bilong spirit!