Planti Gutpela Samting Long “Ol Man i Stap Olsem Lait” Kibung Distrik
INAP 2,700 yia bipo profet Aisaia i tok: “Ol blakpela klaut na bikpela tudak i karamapim olgeta . . . manmeri bilong graun.” (Aisaia 60:2) Dispela tok i bin kamap tru! Tasol gutpela samting inap kamap, long wanem, Jehova i mekim lait i kamap. Long yia i go pinis, ol i singautim ol man i laikim lait bilong God long i go long “Ol Man i Stap Olsem Lait” Kibung Distrik.
Namba wan kibung i bin kamap long mun Jun long Not Amerika. Inap sampela mun bihain ol kibung i gat wankain program i bin kamap long hap bilong Isten na Westen Yurop, na Sentral na Saut Amerika, na Afrika, na Esia, na ol ailan bilong solwara. Planti milion manmeri i bin i go long ol dispela kibung na ol i amamas long kisim planti gutpela kaikai bilong spirit!
“Yupela Ol Man i Stap Olsem Lait, Mipela Laik Tok Amamas Long Yupela!”
Long planti hap ol dispela kibung i bin kirap long Fraide na i pinis long Sande long apinun. Ol man i kam long kibung ol i amamas long harim namba wan tok i kamap long Fraide long moningtaim i stori long olsem wanem lait bilong Jehova i bin kamap bikpela moa long taim bilong las de. Orait, nau siaman bilong kibung i stori gut olsem ol Kristen tru i gat wok long givim lait long ol man, na em i givim bel long tok olsem: “Yupela ol man i stap olsem lait, mipela laik tok amamas long yupela!” Ol tok bilong kibung bai helpim ol man long wok yet long kamapim lait bilong Jehova.
Brata i mekim as tok bilong kibung i kirapim tingting bilong ol man i kam bung, olsem lait bilong ol man i bin i dai longtaim bipo long gaden Iden. Kirap long dispela taim i kam inap long nau, Satan i bin pasim tingting bilong ol man na bai ol i no inap kisim lait bilong tok i tru. (2 Korin 4:4) Tasol Jisas i kam long graun ‘olsem lait bilong olgeta manmeri.’ (Aisaia 42:1-6) Em i kamapim long ples klia ol bilip kranki bilong ol lotu giaman, na em i makim wanem ol pasin nogut i bilong tudak, na em i stap gut long wok king bilong Jehova, na em i autim gutpela tok bilong Kingdom. Ol disaipel bilong Jisas i bin mekim olsem—na ol i mekim yet! (Matyu 28:19, 20) Brata i tok: ‘Yumi ken i stap olsem lait na givim dispela lait long ol narapela, olsem Jisas i bin mekim. I no gat wanpela wok long nau i bikpela wok moa, winim dispela. Na i no gat wanpela wok i gutpela moa winim dispela.’
Bilong pinisim namba wan hap bilong program, siaman i tokaut long 4-pela nupela liklik nius. Ol man i kirap nogut na mekim save paitim han, na bihain olgeta man long kibung i kisim wanpela wanpela bilong olgeta 4-pela liklik nius.
Namba wan na namba 2 tok long Fraide long belo bek i kamapim gutpela tok long ol samting ol Kristen i stap olsem lait ol i mas mekim na bai pasin bilong tudak i no ken pulim ol. Satan inap kamap olsem ensel bilong lait, olsem na yumi mas laikim ol samting bilong spirit na bai ol doti bilong dispela graun i no ken paulim yumi. (2 Korin 11:14) Pol i tok: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu.” (Rom 12:2) Ol man i kam bung i harim tok olsem wok bilong mekim pasin na tingting i kamap nupela em wanpela samting ol Kristen i mas wok long mekim long olgeta taim. Taim yumi stadi long Tok bilong God na bihainim ol samting yumi bin lainim, tingting bilong yumi i wok long senis na kamap klin. Long dispela rot bai yumi kamap moa yet olsem Jisas, em “marimari na pasin i tru i pulap long em.”—Jon 1:14.
Ol Yangpela i Olsem Man Bilong Lait
Laspela hap bilong program long Fraide i bilong helpim ol yangpela. Namba wan tok (“Yupela Ol Yangpela i Laik Mekim Wanem?”) i mekim gutpela tok amamas long ol yangpela Kristen i stap gut long Jehova. Tasol brata i tokim ol, Satan i tingting strong long pulim ol. Man i lain long pilai spot, maski em i save gut, i mas i gat man bilong lainim em, na olsem tasol ol yangpela i mas i gat papamama na kongrigesen bilong helpim ol na bai ol i wokabaut yet long lait.
Bilong kamapim klia dispela samting, ol i lukim wanpela pilai, nem bilong en Mekim Ol Samting i Stret Long Ai Bilong Jehova, na dispela i pinisim program bilong Fraide. Pilai i stori long gutpela King Josaia. Taim em i yangpela yet, em i tingting strong long mekim wok bilong Jehova. Em i stap namel long ol man nogut, tasol em i mekim pasin i stret long ai bilong Jehova, long wanem, hetpris Hilkia i soim gutpela rot long em na em yet i laikim tumas lo bilong God. Gutpela sapos ol yangpela Kristen long nau ol i bihainim pasin bilong em.
Larim Lait Bilong Yu i Lait
Long Sarere long moningtaim ol man i bung gen bilong harim sampela gutpela tok moa bilong Baibel. Ol i toktok long teks bilong de, na bihain long en wanpela tok i kamap i gat 3-pela hap bilong en, em i stori long kain kain rot em Kristen inap givim lait long ol man. (Matyu 5:14-16) Bikpela samting em Kristen i mas autim tok na bihainim gutpela pasin. Brata i mekim dispela tok em i tok, “sapos yumi autim tok long ol, ol bai save long bilip bilong yumi, tasol sapos yumi mekim pasin sori long ol, dispela i strongim tok yumi autim long ol.”
Bihain narapela brata i tokim ol man long wanpela gutpela samting bilong helpim ol long autim tok: ol liklik nius. Long Fraide ol i bin harim tokaut bilong ol nupela liklik nius na nau ol i harim sampela stori i kamapim klia olsem ol liklik nius i gat strong long mekim gutpela wok. Brata i kirapim ol long karim planti ol liklik nius i go wantaim ol long olgeta taim na bai ol i redi long mekim wok long ol long kain kain taim na ples.
Na nau narapela brata i stori long ol painia, em ol i autim tok bilong Kingdom long olgeta de na wok strong long givim lait long ol man. Yumi pilim tru bikpela wok ol i mekim! Na lain painia i go bikpela. Long ol kantri nau tasol gavman i orait long wok bilong yumi long autim tok, long ol dispela kantri tu lain painia i go bikpela. Brata i kirapim ol painia long tingim wok painia i olsem wanpela gutpela samting tru. Na em i kirapim ol brata sista i no painia na bai ol i ken tingting—ol yet inap mekim wok painia o olsem wanem. Ating ol tu inap stretim ol samting na bai ol inap givim lait long ol man olsem wanpela painia.
Sapos yu stap olsem lait, planti taim yu mas daunim laik bilong yu, na wanpela tok, nem bilong en “Daunim Laik Bilong Yumi na Mekim Wok Bilong Jehova” i kamapim dispela samting. Pol i tok: “Yupela i mas givim bodi bilong yupela long God olsem ofa.” (Rom 12:1) Ol man i stap strong taim narapela i mekim nogut long ol, ol i kamapim klia olsem ol i daunim laik bilong ol yet. Na long olgeta de ol painia i mas daunim sampela laik bilong ol na bai ol inap mekim yet wok painia. Tru tumas, olgeta Kristen tru i save daunim sampela laik bilong ol—ol i tingting long mekim wok bilong God na ol i no tingting long helpim ol yet tasol na long kisim mani kago samting. Jehova i save mekim gut long kain man olsem.
Bihain nau tok bilong baptais i kamap. Ol man i kisim baptais long kibung bai ol i no inap lusim tingting long dispela tok. Baptais i nambawan bikpela samting ol i mekim. Tok i kirapim tingting bilong ol, olsem ol i bihainim pasin bilong Jisas—taim em i gat 30 krismas em i kisim baptais. Na tu, ol man i laik baptais i tingim bek olsem ol i bin “lusim olgeta pasin bilong tudak” na ol i “wok strong oltaim . . . long mekim wok bilong [Jehova].” (Rom 12:11; 13:12) Ol i amamas long sanap na tok ‘Yes’ long tupela askim, na bihain ol i go long ples baptais. (Rom 10:10) Yumi beten askim Jehova long mekim gut long ol brata i kisim baptais long dispela kibung distrik, em i makim olsem ol i dediket pinis long Jehova.
Ol tok i kamap long Sarere long belo bek i kamapim sampela strongpela toksave. Nem bilong ol dispela tok em “Givim Baksait Long Pasin Mangal” na “Sampela i Wok Long Paulim Gutpela Pasin Bilong Yu?” na “No Ken Givim Bel Long Wanpela Samting na Em i Kamap Olsem God Bilong Yu.” Ol dispela 3-pela tok i kamapim klia ol samting Satan i mekim wok long en na bai Kristen i no stap strong moa. Judas Iskariot em i wanpela aposel, tasol em i mangal long mani na kamapim Jisas long ol birua. Yangpela Samuel i bin kamap bikpela long haus lotu bilong Jehova, tasol em i stap namel long ol man pasin bilong ol i nogut tru. (1 Samuel 2:12, 18-20) Pasin pamuk na pasin mangal i wankain olsem pasin bilong lotu long god giaman. (Efesus 5:5; Kolosi 3:5) Tru tumas, yumi mas givim baksait long ol pasin nogut olsem: Mangal na bung wantaim ol man nogut na lotuim god giaman.
Na nau wanpela tok i kamap i narapela kain liklik. Brata i mekim dispela tok i kamapim sampela askim bilong Baibel na bekim bilong en. Yu inap bekim ol dispela askim? Olsem: Ol manmeri i no bilip long tok i tru na ol i dai paslain long kirap bilong taim bilong bikpela hevi tru, bai ol inap kirap bek o nogat? Kristen i ken mekim wanem sapos em i no inap painim wanpela poroman i stret long em i ken maritim? Bilong helpim ol brata i kam bung long kisim planti save moa long Baibel, brata i kirapim ol long mekim bikpela wok long “Indeks” i stap long Wastaua bilong Disemba 15, em i gat lista bilong ol “Askim.”
Krais i Kam i Stap, na Em i Kamap Ples Klia
Bilong pinisim program long Sarere, wanpela tok i gat 3-pela hap bilong en i kamap, het-tok bilong en i olsem: “Yumi Kisim Save Long Taim Krais i Kam i Stap na Taim Em i Kamap Ples Klia.” Namba wan hap i helpim ol man long tingim sampela hap bilong “mak” em i kamapim klia olsem Krais Jisas i kam i stap. (Matyu 24:3) Namba 2 hap i stori long wok em ‘gutpela wokboi’ i mekim long nau. (Matyu 24:45-47) Kirap long yia 1919, dispela gutpela lain wokboi i bin i go pas long autim gutpela tok bilong Kingdom. Bihain, wanpela bikpela lain manmeri bilong olgeta kantri i bung wantaim ol Kristen em God i makim ol long spirit holi, na ol i helpim ol long kamapim lait bilong Jehova. Bilong pinisim tok, brata i tok: “Yumi mas helpim yet lain wokboi i gat gutpela tingting na i mekim gutpela wok, na sapos yumi mekim olsem, i no longtaim na bai yumi harim dispela King i tok olsem: ‘Yupela i gat blesing bilong Papa bilong mi. Em i laik mekim gut long yupela. Yupela kam kisim kingdom Papa i bin redim na makim bilong yupela pinis.’ ”—Matyu 25:34.
Brata i mekim namba 3 hap i kamapim insait bilong dispela tok ‘taim Krais Jisas i kamap ples klia.’ (1 Korin 1:7) Long dispela taim bai bikpela samting tru i kamap! Bikpela Babilon bai bagarap. Jisas na ol ensel bilong em bai pait wantaim lain bilong Satan, na ol pasin nogut bilong dispela graun bai pinis. Orait nau Jisas bai tromoi Satan long hul i no gat as na em bai i no inap mekim wanpela samting. Tasol taim Pikinini Sipsip i marit long heven na nupela taim i kamap long graun, lain bilong God bai kisim malolo. Brata i tokaut long nupela buklet, Tru God i Save Tingim Yumi? Dispela bai helpim gut ol man i gat pasin daun long save long gutpela Man bilong wokim yumi na long ol samting em i laik mekim bilong helpim yumi!
Ol Famili Kristen
Nau laspela de bilong kibung i kamap, em Sande, tasol planti gutpela tok moa i mas kamap. Ol i toktok long teks bilong de, na nau wanpela tok i kamap i gat 3-pela hap bilong en i stori long famili Kristen, het-tok bilong en i olsem: “Insait Long Famili Kristen Narapela Mas Lukautim Narapela.” Namba wan hap i helpim ol man long save, sapos ol i putim ol samting bilong spirit i go pas long ol narapela samting, dispela bai helpim famili long kamap strong long spirit. Namba 2 hap i kirapim ol famili long wok gut wantaim, olsem go wantaim long ol miting na autim tok na mekim famili-stadi na sampela kain amamas. Namba 3 hap i stori long gutpela wok bilong tingim na lukautim gut ol lapun. Brata i tok olsem: “Ol lapun brata sista i gutpela samting bilong kongrigesen.” Gutpela sapos yumi ken bihainim gutpela pasin bilong ol long holimpas bilip.
Na nau wanpela brata i stori long olsem wanem yumi ken “tingting gut.” (1 Pita 4:7) Man i tingting gut, em i save skelim stret ol samting. Em inap save wanem samting i stret na wanem samting i no stret, na wanem samting i tru na wanem samting i giaman. Na tu, em i wok long stap strong long spirit.
Laspela tok long Sande long moningtaim i stori long yumi mas daun long God na Krais. Brata i tok: “Dispela tok olsem yumi mas daun long God Jehova na Pikinini bilong em, Krais Jisas, em i bikpela samting.” Wanem samting bai helpim yumi long daun long ol? I gat 4-pela samting olsem: Yumi mas laikim tru Jehova na Krais Jisas, na yumi mas pret long mekim ol samting Jehova i no laikim, na yumi mas bilip, na yumi mas i gat pasin daun.
Sande Belo Bek
Orait, nau laspela hap bilong kibung i kamap. Long tingting bilong planti man i olsem kibung i kirap nau tasol, tasol sori tru, kibung i laik pinis.
Nem bilong pablik-tok em, “Bihainim Dispela Man Em i Lait Bilong Graun.” Brata i mekim dispela tok i stori long lait tru na wok bilong en long helpim olgeta samting i stap laip. Tasol lait bilong spirit i winim lait tru. Lait tru i helpim yumi long stap laip inap 70 o 80 yia samting, tasol lait bilong spirit inap helpim yumi long stap laip oltaim. Brata i stori long ol wan wan ves bilong Jon 1:1-16, i kamapim klia olsem Jisas i lait bilong graun. Nau, long pinis bilong las taim bilong dispela pasin nogut, yumi mas hariap na bihainim dispela Man em i lait bilong graun.
Bihain long stori bilong Stadi Wastaua, laspela tok bilong kibung i kamap. Brata i mekim dispela tok i tok yumi gat planti nupela samting bilong wetim. Em i tokaut long wanpela nupela odiokaset, em wanpela pilai, nem bilong en Givim Bel Long Mekim Laik Bilong God. Na tu, bai i gat ol nupela videokaset long tok Inglis, het-tok bilong en, The Bible—A Book of Fact and Prophecy, na nem bilong namba wan videokaset em The Bible—Accurate History, Reliable Prophecy.
Na nau brata i tokaut olsem long yia 1993 bai i gat ol kibung distrik i gat 4-pela de bilong en, na bai i gat ol kibung intenesenel tu long Afrika, na Esia, na Yurop, na Saut Amerika. Tru “Ol Man i Stap Olsem Lait” Kibung Distrik i laik pinis, tasol ol man i kam bung bai ol inap kirap long stretim rot bilong i go long ol kibung bilong 1993.
Orait, nau em taim bilong ol man i go bek long haus bilong ol. Ating ol i tingting strong long ol i mas wok yet long givim lait long ol man i stap tudak. Inap 3-pela de ol i bin kisim ol gutpela samting bilong spirit, na nau ol i tingim tok bilong Baibel em brata i mekim laspela tok i bin kamapim, olsem: “[Jehova] tasol em i God tru. Em i bin lukautim yumi gut. . . . Yupela tenkyu long [Jehova]. Em i mekim gutpela pasin long yumi. Em i save laikim yumi tru, na i save marimari long yumi oltaim.”—Song 118:27, 29.
[Piksa long pes 15]
Program bilong kibung long tok Rasia
[Ol Piksa long pes 16, 17]
Long planti kibung, sampela brata bilong Lain Bilong Bosim Ol Witnes ol i mekim tok
Sampela Japan i kam bung long Sen Pitasbek, Rasia
Wanpela pilai bilong Baibel i kamapim klia olsem yumi mas mekim ol samting i stret long ai bilong Jehova
Ol nupela man bilong lait i dediket pinis long Jehova ol i kisim baptais
Ol man i kam bung long Sen Pitasbek ol i putim gut yau long ol tok
[Piksa long pes 18]
Ol man i kam bung ol i amamas long kisim nupela buklet “Tru God i Save Tingim Yumi?”