God i Skulim Yumi Long Rot Bilong Ol Gutpela Kibung
LONG nau ol man i kamapim planti save tru long ol kain kain samting na yumi inap harim long redio o televisen na kaunim long ol buk o lukim long kompyuta. Tasol sik na dai i painim yet ol man, na pasin raskol na hangre i stap long olgeta hap, na planti man i stap rabis. Na sik bilong bel hevi i go bikpela tru long nau. Maski ol man i kamapim planti save tru, dispela i no inap stretim ol dispela hevi bilong graun. Bilong wanem em i no inap? Long wanem, ol man i givim baksait long ol tok bilong God i gat gutpela tingting long en.
Olsem na i stret tru ol kibung bilong ol Witnes Bilong Jehova nau i kamap i gat nem olsem “God i Skulim Yumi.” Ol tok i kamap long kibung i kirapim ol man na ol i pilim tru olsem ol tok bilong Baibel tasol inap helpim ol man long painim rot bilong i stap laip.
Namba wan kibung i kamap long Yuniondel long Nu Yok, long Fonde, Jun 3. Bihain long dispela i gat ol narapela kibung i kamap long ol narapela narapela biktaun long planti kantri, na ol laspela kibung i kamap long Afrika na Saut Amerika.
Belo Bek Long Namba Wan De
I gat as tok bilong olgeta wan wan de na i makim wanpela rot God i skulim yumi long en. As tok bilong namba wan de em “Kisim Save Long Tok i Kam Long God.” (Jon 7:17) Ol i kamapim planti tok bilong dispela samting long namba wan de.
Ol i mekim wanpela singsing na beten, na bihain siaman bilong kibung i mekim tok, “God i Skulim Yumi na Yumi Bung Wantaim.” Em i tok, lain bilong Jehova i kisim save long pasin bilong em na long bihainim rot bilong em, na dispela i mekim na ol i pas gut wantaim. (Maika 4:1-5) God i skulim ol na dispela i strongim pasin wanbel bilong ol. Ol man i kam long kibung ol i harim olsem ol i mas amamas long ol i pas gut wantaim na i stap wanbel.—Song 133:1-3.
Bihain liklik long apinun, ol i mekim wanpela tok i gat 3-pela hap bilong en na i stori long ol miting bilong kongrigesen. Nem bilong en “Ol Miting i Skulim Yumi Long Ol Pasin Bilong Jehova.” Man bilong mekim namba wan hap em i tok, taim yumi bung wantaim yumi givim biknem long Jehova na em i mekim gut long yumi. Man bilong mekim namba 2 hap em i tok, yumi mas bekim tok long miting. Taim yumi mekim olsem, yumi litimapim nem bilong Jehova namel long ol man, na yumi kamapim bilip bilong yumi, na yumi strongim bilip bilong ol narapela. Man bilong mekim namba 3 hap em i toktok long yumi mas bihainim ol samting yumi bin lainim long miting. Olsem Baibel i tok: “Dispela tok yupela i kisim, em yupela i mas bihainim. Yupela i no ken harim nating tasol.”—Jems 1:22.
Bihain long en ol i mekim wanpela tok long ol singsing i save litimapim nem bilong Jehova. Singsing em i wanpela hap wok bilong yumi long lotuim Jehova. Nau ol i kamapim as tok bilong kibung, em “God i Skulim Yumi na Dispela i Kamapim Gutpela Wok.” Em i gutpela as tok tru! Man bilong mekim tok em i tok, ‘Jehova i As bilong nambawan gutpela skul ol man inap kisim.’ Em i stori liklik long kru bilong man i gutpela samting tru olsem mirakel, na bihain em i tok: “Yumi mas wokim strong tingting bambai yumi inap kisim gutpela na stretpela save i kam long Jehova.” Dispela tok i stret tru!
Moningtaim Long Namba Tu De
As tok bilong namba 2 de em “Oltaim Givim Biknem Long Tok Bilong God.” (Taitus 2:10) Dispela i kamap klia long tok, “Tok Bilong God i Pait Long Tok Bilong Ol Spirit Nogut.” Em nau, ol spirit nogut tu ol i skulim ol man. (1 Timoti 4:1) Tasol tok bilong God i kamapim long ples klia ol bilip giaman na ol trik na pasin hait bilong Satan, na dispela i daunim ol “save giaman” bilong Satan. Olsem na inap olsem 4,500,000 Kristen i gat gutpela bel ol i no kalabus moa long tudak bilong Satan.—Jon 8:32.
Tasol yumi mas wok yet long sakim Satan. Ol i kamapim strong dispela samting long wanpela tok, “Yu Sakim Spirit Bilong Dispela Graun?” Tingting bilong dispela graun i save bagarapim man. Em i save kirapim ol man long mekim pasin pamuk, na bikhet long ol man i gat namba long bosim ol, na mangal long mani kago. Long olgeta taim Kristen i mas skelim bel bilong em. Em i save tingim yet ol stretpela lo em i mas bihainim taim em i lukim na harim na kaunim ol samting? Man bilong mekim tok em i tok olsem: “Mipela laik tokim yupela ol brata sista na ol yangpela, yupela i mekim gutpela wok long sakim spirit o tingting bilong dispela graun.”—1 Jon 2:15-17.
I gat wanpela samting i mekim na i hatwok long sakim tingting bilong dispela graun. Em wanem samting? Yumi olgeta i gat sin. Tru, Jisas i bin dai bilong tekewe sin bilong yumi, tasol yumi mas wok strong yet long daunim ol laik nogut em sin i kirapim long bel. Dispela i kamap klia long wanpela tok, “Daunim Strong Bilong Sin Long Bodi Bilong Yu.” Man bilong mekim tok em i tok, yumi inap daunim sin sapos yumi kisim nupela pasin na abrusim olgeta samting i save kirapim ol laik nogut bilong sin i stap long bel bilong yumi.
Nem bilong narapela tok, em “Bihainim Tru Olgeta Tok Bilong God.” Sampela i save tingting oltaim long lukautim skin bilong ol na bai ol i ken i stap strong long skin. Tasol bikpela samting moa em yumi mas tingting long i stap strong long spirit. Man bilong mekim tok em i tok, yumi mas tingim gut ol wok bilong spirit yumi mas mekim. Na em i mekim gutpela tok long ol meri Kristen, olsem: “Yumi save pilim tru gutpela wok ol lapun sista na ol yangpela sista i mekim, em ol i givim bel long mekim wok bilong God, tasol ol i lukautim gut ol wok bilong ol long haus tu.” Na yumi olgeta i tok tenkyu long Jehova long ol gutpela tok yumi kisim na i mekim yumi i stap narapela kain long ol man bilong dispela graun.
Laspela tok bilong moningtaim em “God i Skulim Yumi Long As Bilong i Stap Bilong Yumi.” Man bilong mekim tok em i tok: “Planti man i save askim olsem: ‘Yumi stap bilong mekim wanem?’ ” Em i kamapim klia olsem God tasol inap bekim stret dispela askim. Na em i tok, ol gutpela tok promis bilong God i helpim yumi long save, i stap bilong yumi i gat as bilong en. Ating planti long kibung ol i tingting, ‘Sapos ol man long teritori bilong mi ol inap harim dispela tok, em bai helpim gut ol.’ Lain Bilong Bosim Ol Witnes ol tu i ting olsem. Taim dispela tok i laik pinis, ol i tokaut long nupela buklet, Yumi Stap Bilong Mekim Wanem? Ol i amamas tru long kisim! Taim ol i malolo long belo ol i lukim ol tok bilong en.
Belo Bek Long Namba Tu De
Namba wan tok long belo bek em “Putim Olgeta Hevi Bilong Yu Long Han Bilong Jehova.” Planti samting i save mekim na yumi bel hevi. Tasol Baibel i tok, yumi mas putim olgeta hevi bilong yumi long Jehova. (1 Pita 5:6, 7) Sampela hevi i save stap longtaim, tasol man bilong mekim tok em i tok: “Yu mas wetim Jehova. Yu mas bilip tru olsem sapos yu bihainim ol lo na tok bilong Baibel, dispela bai helpim yu tru. Sapos yumi givim bel long Jehova, orait bel isi God i save givim long yumi bai mekim yumi i stap bel isi tru.”—Filipai 4:6, 7.
Fopela tok i kam bihain i soim yumi olsem ol famili tu i mas bihainim ol tok God i skulim yumi long en. Namba wan tok, em “Mekim Marit i Stap Gutpela.” Long ai bilong Jehova marit i no wanpela samting yumi ken brukim nating, olsem planti man bilong graun i ting ol inap mekim. Yumi mas bihainim ol tok bilong Jehova na bai marit bilong yumi i ken stap gutpela. Em yet i bin wokim yumi. Olsem na Baibel i gat ol gutpela tok tru bilong helpim ol marit.
Narapela tok, em “Wok Strong Bilong Helpim Famili Long Kisim Laip.” Em i toktok long bikpela wok bilong lukautim famili nau long dispela taim nogut. (2 Timoti 3:1) Ol papamama i save skulim ol pikinini long i stap klin long skin, na mekim gutpela pasin, na mekim wok, na givim samting long ol man na tingim ol. Tasol bikpela samting tru, em papamama i mas skulim ol pikinini long givim bel long Jehova na kamap wokman bilong em.—Sindaun 22:6.
Narapela tok em “Ol Papamama, Tingim Gut Olgeta Wan Wan Pikinini.” Man bilong mekim tok i tokim ol papamama, taim pikinini i mekim gutpela pasin, ol i mas amamas na tokaut long dispela, tasol taim pikinini i mekim pasin kranki, ol i no ken larim em. Papamama i mas lukim pasin bilong ol, nogut ol i laik kisim pasin olsem giaman, o laikim tumas ol samting bilong skin, o tingim ol yet tasol.
Ol yangpela i putim gut yau long tok, “Ol Yangpela, Yupela i Bihainim Tok Bilong Husat?” Long nau i hatwok long ol yangpela Kristen long i stap gut. I no hatwok long bihainim pasin bilong dispela graun, tasol dispela rot i bringim man long i dai. Ol yangpela i mas i gat strongpela bel na bai ol i ken bihainim ol tok God i skulim yumi long en, tasol ol bai kisim ol gutpela samting long nau, na bihain ol bai kisim laip i stap oltaim.—1 Timoti 4:8.
Laspela samting long program bilong namba 2 de em wanpela gutpela pilai bilong Baibel, nem bilong en, Ol Yangpela Nau Ol i Save Tingim Man i Bin Wokim Ol. Bilong kirapim tok, man bilong bosim pilai i tok, ol yangpela insait long oganaisesen bilong God i olsem wanpela ami bilong God i givim bel long mekim wok bilong Jehova na King em i makim, em Krais Jisas. Na em i tok, “Tru tumas, ol yangpela bilong yumi ol i mekim gutpela wok!” Dispela pilai i kamapim klia olsem, sapos papa o mama i skulim gut pikinini, dispela bai helpim em long sanap strong taim em i go bikpela na em i mekim wok bilong Jehova.
Moningtaim Long Namba Tri De
As tok bilong namba 3 de em “Wok Yet Long Skulim Ol Man Bilong Olgeta Lain.” (Matyu 28:19, 20) Ol brata sista i harim sampela gutpela tok long wok autim tok. Wanpela tok i gat 3-pela hap bilong en, nem bilong en “Amamas na Mekim Tru Wok Bilong Autim Tok na Lainim Ol Man.” Dispela tok i strongim ol long mekim yet wok bilong autim tok. Namba wan hap i stori long taim yumi autim tok long man long namba wan taim, na namba 2 hap i stori long mekim gobek, na namba 3 hap i stori long mekim Baibel-stadi. Long sampela kibung i gat sampela misineri i stap, em ol i bin kam bek long ples bilong kisim malolo, na sampela i insait long dispela hap bilong program. Ol manmeri i amamas long harim stori bilong ol gutpela samting wok bilong ol i kamapim. Narapela tok, em “Autim Tok Bilong Kingdom Long Olgeta Man.” Em i toktok long ol gutpela samting i kamap long wok bilong autim tok long kain kain taim na ples.
Laspela tok bilong moningtaim em tok bilong baptais. Long planti kibung, bikpela lain ol i dediket nupela long Jehova na ol i sanap long ai bilong ol man long kibung na ol i tok ‘Yes’ long tupela askim ol i givim long ol, na nau ol i kisim baptais. Dispela i kamapim klia gutpela samting i kamap taim God i skulim yumi!
Belo Bek Long Namba Tri De
Bilong kirapim program bilong belo bek, ol i kamapim wanpela strongpela tok bilong Baibel. Ol Witnes i save long ol tok bilong Matyu sapta 24 na Luk sapta 21, na ating sampela i ting ol i no inap kamapim sampela nupela save long ol dispela sapta. Tasol ol i popaia stret! Tupela tok i kamap, em “Wanem Samting Bai Makim Yu Kam Bek i Stap?” na “Yu Tokim Mipela, Wanem Taim Ol Dispela Samting Bai i Kamap?” Ol i skelim gut ol hap tok bilong dispela tupela sapta na ol i kamapim sampela nupela save long sampela ves. Taim program bilong dispela de i pinis, ol brata sista i wok long skelim ol tok ol narapela narapela i bin raitim na bai ol i ken save, ol i bin kisim gut ol dispela tok o nogat. Bihain Wastaua bai kamapim dispela tok, na ating em bai bekim planti askim bilong ol.
Nem bilong narapela tok, em “Gutpela Bekim Bilong Ol Askim Bilong Yu Long Baibel.” Bihain long en i gat narapela kain tok i kamap. Yia 1993 em namba 50 yia bilong Baibel Skul Bilong Gileat. Wanpela tok, em “Fifti Yia Bilong Skul na Wok Bilong Ol Misineri,” i kamapim klia bikpela wok i bin kamap insait long dispela 50 yia. Sosaiti i bin singautim ol misineri long go bek long ples na bai ol i ken go long kibung wantaim famili na ol pren bilong ol. Sapos i gat sampela misineri long kibung taim ol i mekim tok, “Wok Bilong Autim Gutnius i Kamap Gutpela Long Olgeta Hap,” ol i singautim ol long go antap long pletfom na kamapim sampela gutpela stori long wok bilong ol. Ol man i amamas tru long harim stori bilong ol!
Narapela tok, em “Bilong Wanem Ol Witnes Bilong Jehova i Was Gut.” Em i stori long ol Kristen i bin was i stap, kirap long taim bilong ol aposel na i kam inap long nau. Narapela tok, em “Ol Man Bilong Autim Tok Bilong Kingdom i Mekim Wok Long Olgeta Hap Bilong Graun.” Brata i mekim tok em i kamapim wanpela bikpela buk na em i tok: “Mi amamas long tokaut long nupela buk yumi inap kisim, nem bilong en, Jehovah’s Witnesses—Proclaimers of God’s Kingdom.” Buk i mekim bikpela tok long wok bilong ol Witnes Bilong Jehova long nau. Em i stori long pasin bilong ol long sanap strong na karim hevi, na ol gutpela samting i kamap long dispela wok; buk i kamapim klia tru olsem spirit bilong Jehova i stap long ol wokman bilong em.
Moningtaim Long Namba Foa De
Em nau, laspela de bilong kibung. As tok bilong de em “Larim Tok God i Skulim Yumi Long En i Helpim Yumi.” (Aisaia 48:17) Em i makim olsem i gat sampela gutpela tok tru bilong pinisim program bilong kibung. Long moningtaim wanpela tok i kamap, i gat 3-pela hap bilong en na i kamapim ol strongpela tok. Nem bilong en “Toksave Bilong Jeremaia—Bilong Bipo na Bilong Nau.” Ol i kamapim olgeta wan wan ves bilong Jeremaia sapta 23, 24, 25. Ol dispela sapta i gat ol strongpela toksave tru! Ol Israel long taim bilong Jeremaia i no stap gut long Jehova na ating ol i guria taim ol i harim ol strongpela toksave bilong em i kam long Jehova. Tasol taim truim bilong ol dispela toksave i kamap, olgeta man bilong graun i guria moa yet. Orait, yu ting ol samting i narapela kain long nau? Nogat tru! Ol Witnes Bilong Jehova i strongim bel na ol i autim strongpela tok long kot bilong Jehova bai painim ol man. Bihain strafe bilong Jehova bai painim olgeta samting bilong dispela graun em Satan i bosim na olgeta manmeri bilong en, na ol bai bagarap.
Bilong pinisim program bilong Sande long moningtaim, i gat namba tu pilai i kamap, nem bilong en Nogut Ol i Giamanim Yu o Yu Laik Trikim God. Em i kamapim klia olsem ol tok God i skulim yumi long en inap lukautim yumi na yumi no larim ol video na musik nogut i pulim yumi, na yumi no mekim ol samting i bagarapim pasin wanbel bilong ol brata Kristen. Long pinis bilong pilai, siaman i kamapim tok bilong wanpela man insait long pilai, em i tok: ‘Sapos yumi no sakim pasin bilong dispela graun, em inap bagarapim yumi. Na samting yumi bin planim, dispela yet bai mekim na yumi inap i stap gut wantaim Jehova o nogat.’ Dispela tok i stret tru!
Belo Bek Long Laspela De
Klostu long pinis bilong kibung wanpela brata i mekim pablik-tok, nem bilong en “Gutpela Tok Bilong Skulim Yumi Long Dispela Taim Bilong Planti Hevi.” Em i kamapim klia sampela bikpela hevi i save painim yumi long nau, na em i toktok long olsem wanem ol tok God i skulim yumi long en inap helpim i stap bilong yumi. Em i tok, sapos yumi bihainim ol tok bilong Baibel long nau, bai yumi inap bihainim oltaim oltaim long nupela taim Jehova bai kamapim.
Bihain long en ol i kamapim sampela stori bilong stadi Wastaua, na nau laspela tok i kamap. Man bilong mekim tok em i kamapim ol bikpela samting bilong ol tok i bin kamap long kibung na em i tokaut gen long ol nupela buk samting ol inap kisim. Na em i tok, liklik taim ol inap kisim namba 2 bilong ol video-kaset The Bible—A Book of Fact and Prophecy. Na video-kaset The Bible—Mankind’s Oldest Modern Book, nau yumi inap kisim long tok Inglis. Na em i kamapim ripot bilong ol brata i stap long ol hap i gat bikpela pait, olsem Bosnia na Hetsagovina. Na bilong pinisim tok, em i kolim tok bilong Saveman 12:13, i tok: “Bilong pinisim olgeta toktok, mi laik tok olsem, namba wan samting long laip bilong yumi man i olsem: Yumi mas aninit long God tasol na bihainim ol lo bilong em.”
Em nau, yumi mas wetim dispela taim em olgeta lain bilong graun bai litimapim nem bilong dispela Nambawan Tisa, Jehova, na bihainim olgeta tok em i skulim yumi long en.
[Ol Piksa long pes 24, 25]
Ol “God i Skulim Yumi” kibung long Mosko na Kiev i kamapim bikpela amamas tru
[Ol Piksa long pes 26, 27]
1. Planti ol i kisim baptais bilong makim olsem ol i dediket pinis long God
2. Wanpela man long kibung i gat 100 krismas em i amamas long kisim wanpela nupela buk
3, 4. Ol i pilim tru ol tok bilong tupela pilai bilong Baibel
5. Long kibung ol misineri i stori long wok bilong ol na dispela i kamapim klia ol gutpela samting i kamap taim God i skulim yumi