“Ol Man Bilong Givim Bel Long Autim Tok Bilong Kingdom” i Amamas Long Bung Wantaim
OL PASIN nogut, na hevi bilong mani na wok politik i wok long bagarapim dispela graun. Maski ol dispela hevi i stap, ol Witnes Bilong Jehova i bin bung wantaim inap 3-pela de long ol “Ol Man Bilong Givim Bel Long Autim Tok Bilong Kingdom” Kibung Distrik. Kirap long Me 2002 na i go, ol dispela kibung i bin kamap long olgeta hap bilong graun.
Ol kibung i taim bilong bikpela amamas tru. Yumi stori liklik long ol tok em Baibel i as bilong en i bin kamap long ol dispela kibung.
De Namba Wan i Stori Long Pasin Bilong Jisas Long Givim Bel
Tim bilong namba wan de em “Bihainim Pasin Bilong Bikpela Bilong Yumi Jisas, Long Givim Bel.” (Jon 2:17) Dispela tok “Amamas Long Bung Wantaim Olsem Ol Man Bilong Autim Tok Bilong Kingdom” i kirapim ol man long insait long dispela amamas i save makim ol kibung bilong lain bilong God. (Lo 16:15) Bihain ol i mekim inteviu long ol pablisa i givim bel tru long autim gutnius.
Dispela tok “Yu Mas Amamas Long Jehova” i stori long wan wan ves bilong Buk Song 37:1-11. Em i kirapim yumi long “no ken wari” taim i luk olsem ol samting ol man nogut i mekim i kamap gutpela tasol. Maski ol man nogut i mekim ol tok bilong bagarapim nem bilong yumi, bihain Jehova bai kamapim klia husat ol i lain tru bilong em. Dispela tok “Yupela i Mas Soim Olsem Yupela i Save Tenkyu” i bin stori long olsem wanem yumi inap tenkyu long God. Olgeta Kristen i mas “givim biknem” long Jehova. (Hibru 13:15) Pasin bilong yumi long tenkyu long God na sindaun bilong yumi bai makim hamas aua yumi lusim bilong mekim wok bilong Jehova.
As tok bilong kibung em “Pasin Bilong Givim Bel i Kirapim Ol Man Bilong Autim Tok Bilong Kingdom.” Dispela tok i kamapim olsem Krais Jisas i nambawan gutpela piksa bilong man i givim bel long God. Taim Kingdom bilong God i kamap pinis long 1914, ol Kristen tru i mas i gat pasin bilong givim bel long God bambai ol inap autim gutnius. Brata i mekim tok i stori long kibung i bin kamap long Cedar Point, Ohio, Amerika, long 1922 na em i kirapim yumi long tingim dispela bikpela singaut: “Autim tok long King na Kingdom bilong em”! Bihain, isi isi pasin bilong givim bel long God i kirapim ol gutpela wokboi bilong em long autim ol gutpela tok i tru bilong Kingdom long olgeta lain man.
Dispela tok “Yumi No Ken Pret—Yumi Save Jehova i Stap Wantaim Yumi,” i kamap long belo bek bilong namba wan de, i kamapim klia olsem lain bilong God i stap olsem abus tru bilong Satan. Maski ol man i birua long yumi, taim yumi tingim pasin bilong bilip bilong ol man Baibel i stori long ol na ol brata sista long taim bilong yumi, dispela i save strongim yumi long winim ol traim na hevi na yumi no pret.—Aisaia 41:10.
Bihain yumi bin harim tok i gat tripela hap bilong en i stori long “Tok Profet Bilong Maika i Strongim Yumi Long Wokabaut Long Nem Bilong Jehova.” Brata i mekim namba wan hap i stori long olsem wanem pasin bilong ol man long taim bilong Maika long lusim ol stretpela lo, tromoi lotu i tru, na givim bel long kisim planti mani kago, i wankain long pasin bilong ol man long taim bilong yumi. Em i tok: “Yumi bai kisim samting yumi wet long en sapos yumi kisim pasin bilong bihainim tok na bihainim pasin holi na givim bel long mekim ol wok bilong God—na yumi no lusim tingting olsem dispela de bilong Jehova bai i kam.”—2 Pita 3:11, 12.
Brata i mekim namba tu hap i stori long Maika i tokaut long pasin nogut bilong ol hetman Juda. Ol i daunim ol manmeri i stap rabis na i no gat helpim. Tasol Maika i tok profet olsem lotu i tru bai i win. (Maika 4:1-5) Jehova i strongim yumi long rot bilong spirit holi na yumi tingting strong long autim dispela gutpela tok bilong samting yumi wetim i kamap bihain. Tasol olsem wanem sapos yumi pilim olsem sik o sampela narapela samting i pasim yumi long mekim olsem? Brata i mekim namba tri hap i tok: “Ol samting Jehova i tok yumi mas mekim i no hatwok, na yumi inap tru long mekim.” Em i stori moa long ol narapela narapela tok bilong Maika 6:8. Dispela hap i tok: ‘Bikpela i laik bai yumi mekim pasin olsem. Yumi mas bihainim stretpela pasin na laikim tru ol arapela na daunim tingting bilong yumi yet na stap wanbel wantaim God.’
Pasin pamuk bilong dispela graun inap pundaunim ol Kristen, olsem na yumi bin kisim gutpela helpim tru long rot bilong tok “Was Gut Long Bel Bilong Yu na Bai Yu Ken Bihainim Stretpela Pasin.” Olsem: Taim yumi bihainim stretpela pasin, dispela bai helpim yumi long i stap amamas taim yumi marit. Yumi ol Kristen i no ken tingting liklik long mekim pasin pamuk.—1 Korin 6:18.
Dispela tok “Was Gut Long Pasin Bilong Giaman” i kamapim olsem yumi mas bihainim gutpela tingting na kisim tingting olsem ol tok bilong ol man i bin tromoi lotu i tru i olsem marasin nogut, em ol paul tok, na pasin bilong putim liklik tok giaman insait long tok, o pasin bilong mekim tok i giaman olgeta. (Kolosi 2:8) Olsem tasol, yumi no ken giamanim yumi yet na ting pasin bilong inapim ol laik bilong skin i no inap nogutim yumi.
“Lotuim Dispela Wanpela God Tru” em i het-tok bilong laspela tok bilong namba wan de. Ol pasin bilong dispela graun i wok long i go nogut moa yet, tasol klostu nau Jehova bai kamapim nupela taim i gat stretpela pasin tasol long en na dispela i strongim tru bel bilong yumi! Husat bai stap long dispela nupela taim? Em ol manmeri i lotuim Jehova tasol. Bilong helpim yumi yet, ol pikinini, na ol Baibel-stadi long winim dispela mak, brata i mekim tok i tokaut long nupela buk bilong stadi em Worship the Only True God. Yumi bin amamas tru long kisim dispela nupela buk!
De Namba Tu i Stori Long Givim Bel Long Bihainim Gutpela Pasin
Tim bilong namba tu de em “Givim Bel Long Bihainim Gutpela Pasin.” (1 Pita 3:13) Brata i stori long teks bilong de, em i kamapim klia olsem pasin bilong ritim na skelim gut teks bilong de inap strongim pasin bilong yumi long givim bel long autim tok.
Bihain yumi harim tok i gat tripela hap bilong en “Ol Man Bilong Autim Tok Bilong Kingdom i Givim Biknem Long Wok Ol i Mekim.” Namba wan hap i stori long yumi mas autim stret tok bilong God. (2 Timoti 2:15) Taim yumi mekim gutpela wok long Baibel, dispela i save opim rot long dispela tok i ken “wok strong” long i stap bilong ol man. (Hibru 4:12) Yumi mas stiaim tingting bilong man i go long Baibel na stori gut long ol tok bilong en. Namba tu hap i kirapim yumi long mekim gobek planti taim long man i gat laik long harim tok. (1 Korin 3:6) Bilong mekim kwik ol gobek, yumi mas redi gut pastaim na no ken pret. Namba tri hap i kirapim yumi long tingim olsem olgeta man yumi bungim inap kamap disaipel, na taim yumi kirapim Baibel-stadi long namba wan taim yumi bungim man, yumi inap kisim amamas bilong helpim man long kamap disaipel.
“Bilong Wanem Yumi Mas ‘Beten Oltaim’? ” em i het-tok bilong tok i kamap bihain. Baibel i tokim ol Kristen long larim God i stiaim ol long olgeta samting ol i mekim. Yumi mas makim taim bilong yumi yet i ken toktok wantaim God. Na tu, yumi mas beten long olgeta taim, long wanem, ating sampela taim Jehova inap larim yumi i beten planti taim inap longtaim liklik, na bihain em i kamapim klia olsem em i harim beten bilong yumi.—Jems 4:8.
Dispela tok “Toktok Long Ol Gutpela Samting Bilong Spirit Bai Strongim Yumi” i kirapim yumi long mekim wok long presen bilong yumi, em pasin bilong toktok, long helpim yumi yet na ol narapela man tu. (Filipai 4:8) Ol poroman marit na ol pikinini tu i mas toktok long sampela gutpela samting bilong spirit long olgeta de. Bilong mekim olsem, famili olgeta i mas bung wantaim na kaikai wanpela taim long olgeta wan wan de na dispela bai opim rot long ol i ken toktok wantaim long ol samting bilong strongim ol.
Laspela tok bilong program bilong moningtaim em “Olsem Wanem Dediket na Baptais i Opim Rot Long God i Kisim Bek Ol Man.” Ol lain bilong kisim baptais ol i bin kisim save, bilip, tanim bel, givim baksait long ol pasin nogut, na dediket long God. Brata i mekim tok i kamapim olsem taim ol i baptais pinis, ol i mas wok yet long kamap strong long ol samting bilong spirit na holimpas pasin bilong givim bel long autim tok na mekim gutpela pasin.—Filipai 2:15, 16.
Long belo bek, dispela tok “Mekim Pasin Daun na Mekim Ai Bilong Yumi i Stap Gutpela” i bin kamapim tupela bikpela samting. Pasin daun i makim olsem yumi gat stretpela tingting long ol samting yumi no inap mekim na yumi stap olsem wanem long ai bilong God. Pasin daun i save helpim ai bilong yumi long i stap “gutpela”—em i lukluk stret long Kingdom bilong God, na i no long ol samting bilong skin. Sapos yumi mekim olsem, yumi no inap tingting planti, long wanem, Jehova bai lukautim yumi long ol samting yumi mas kisim.—Matyu 6:22-24, 33, 34.
Narapela brata i stori long as na yumi mas “Bilip Tru Long Jehova Long Taim Bilong Hevi.” Olsem wanem yumi inap karim hevi bilong ol pasin kranki bilong yumi yet na hevi bilong mani o sik samting? Yumi mas askim Jehova long givim gutpela tingting long yumi na askim ol narapela tu long helpim yumi. Yumi no ken larim pasin bilong pret o bel hevi i daunim yumi, nogat, yumi mas strongim bilip bilong yumi long God long rot bilong ritim Baibel.—Rom 8:35-39.
Laspela tok i gat tripela hap bilong en bilong dispela kibung i gat het-tok “Ol Kain Kain Hevi i Traim Strong Bilong Bilip Bilong Yumi.” Namba wan hap i kirapim yumi long tingim olsem ol birua bai mekim nogut long olgeta trupela Kristen. Dispela i opim rot bilong autim tok long ol man, na i strongim bilip bilong yumi, na i givim rot long yumi long kamapim olsem yumi stap gut long God. Tru, yumi no save larim bagarap i painim yumi nating, tasol yumi no inap mekim wanpela samting i no stret wantaim tok bilong Baibel bilong abrusim hevi bilong ol man i mekim nogut long yumi.—1 Pita 3:16.
Brata i mekim namba tu hap em i stori long ol askim i save kamap long pasin bilong i no insait long ol samting bilong graun. I no olsem ol Kristen bilong bipo ol i bilip olsem olgeta kain pait i no stret, nogat, tasol ol i save olsem nambawan samting em ol i mas daun na stap gut long God. Olsem tasol long nau, ol Witnes Bilong Jehova i strong long bihainim dispela tok: “Yupela i no man bilong dispela graun.” (Jon 15:19) Ol samting bilong traim yumi long pasin bilong i no insait long ol samting bilong dispela graun inap kamap wantu tasol, olsem na ol famili i mas makim taim bilong skelim gen ol tok Baibel i mekim bilong stiaim yumi long dispela samting. Olsem namba tri hap bilong dispela tok i kamapim, i no olsem Satan i laik kilim yumi i dai, tasol em i laik subim yumi na bai yumi no ken i stap gut long God. Taim yumi sanap strong na karim hevi i kamap long rot bilong ol man i tok bilas, subim yumi long insait long pasin pamuk, o yumi bel hevi, na sik samting, yumi litimapim nem bilong Jehova.
Dispela singaut “Go Klostu Tru Long Jehova” i het-tok bilong laspela tok bilong dispela de. Taim yumi kisim save long ol bikpela pasin bilong Jehova, dispela i mekim na yumi laik i go klostu moa long em. Em i save mekim wok long bikpela strong bilong em long lukautim lain bilong em, na em i lukautim ol moa yet long ol samting bilong spirit. Stretpela pasin bilong God i no kirapim em long mekim hatpela pasin, nogat, em i kirapim God long givim rot long olgeta man i bihainim stretpela pasin long kisim laip oltaim. Gutpela tingting na save bilong God i kamap ples klia long pasin em i bihainim long mekim wok long ol man em ol i no gutpela olgeta long raitim Baibel. Nambawan gutpela pasin bilong God em pasin sori—dispela pasin i bin kirapim em long stretim rot bilong kisim bek ol manmeri long rot bilong Jisas Krais. (Jon 3:16) Bilong pinisim tok, brata i mekim tok i tokaut long nupela buk Draw Close to Jehovah.
De Namba Tri i Stori Long Pasin Bilong Givim Bel Long Mekim Ol Gutpela Wok
As tok bilong namba tri de em “Wanpela Lain i Givim Bel Long Mekim Ol Gutpela Wok.” (Taitus 2:14) Long kirap bilong program bilong moningtaim, wanpela famili i toktok wantaim long teks bilong de. Bihain yumi harim tok “Yu Save Bilip Strong Long Jehova?” Ol lain manmeri bilong dispela graun i bilip long save na strong bilong ol yet. Tasol ol wokboi bilong Jehova ol i no pret na ol i amamas long bilip strong long Jehova maski ol bikpela hevi i painim ol.—Song 46:1-3, 7-11.
Dispela tok “Ol Yangpela—Tingting Long Mekim Ol Samting Wantaim Oganaisesen Bilong Jehova” i bekim dispela askim: Olsem wanem yangpela inap i stap amamas tru? I no long rot bilong kisim planti mani, planti samting bilong skin, na biknem. Man bilong wokim yumi i tokim ol yangpela long tingim em taim ol i stap yangpela yet. Brata i mekim tok i mekim inteviu long sampela em ol i bin wok strong long mekim wok Kristen taim ol i yangpela yet, na yumi inap lukim olsem ol i amamas tru. Yumi bin kisim gutpela samting tru bilong helpim yumi, em nupela nius, Ol Yangpela—Yupela Bai Mekim Wanem Long Laip Bilong Yupela? Ol i bin wokim dispela nius bilong helpim ol yangpela Witnes long mekim ol samting bilong helpim ol long stap oltaim wantaim oganaisesen bilong Jehova!
Bihain yumi bin putim tingting olgeta i go long drama bilong Baibel “Sanap Strong Long Taim Bilong Planti Hevi.” Drama i kamapim sampela stori long wok Jeremaia i mekim kirap long taim em i yangpela yet i go inap long taim Jerusalem i bagarap—em dispela bagarap em i bin givim bel long tok profet long en. Jeremaia i pilim olsem em i no inap mekim wok God i givim em, tasol maski ol man i birua long em, em i pinisim dispela wok na Jehova i helpim em long abrusim bagarap.—Jeremaia 1:8, 18, 19.
Bihain long drama, yumi bin harim tok “Bihainim Pasin Bilong Jeremaia—No Ken Pret Long Autim Tok Bilong God.” Planti taim ol nius samting i save kamapim ol tok i no stret bilong giamanim ol man na bai ol i kisim tingting nogut long ol man bilong autim tok bilong Kingdom long nau. (Song 109:1-3) Tasol olsem Jeremaia, yumi inap daunim bel hevi long rot bilong amamas long Tok Bilong Jehova. Na yumi bilip tru olsem ol man i pait long yumi ol i no inap win.
Pablik-tok, “Pasin Bilong Dispela Graun i Wok Long Senis” i kamap long taim stret. Planti bikpela senis tru i kamap nau long taim bilong yumi. Baibel i bin tok profet long ol kain samting olsem, na dispela tok olsem “nau em i gutpela taim tru. Yumi stap gut,” em bai kamap pastaim na bihain long en bikpela de bilong kot bilong God bai kamap. (1 Tesalonaika 5:3) Dispela bikpela de bai kamapim ol gutpela senis—em bai pinisim tru olgeta pait, pasin raskol, kros pait, na ol sik. Yumi no ken bilip long pasin bilong graun, nogat, nau em i taim bilong bihainim pasin bilong givim bel long God na holimpas stretpela pasin.
Taim yumi harim pinis stori bilong Wastaua, yumi harim laspela tok bilong kibung, “Mekim Planti Gutpela Wok Olsem Man i Givim Bel Long Autim Tok Bilong Kingdom.” Brata i mekim tok i kamapim klia olsem wanem program bilong kibung i bin kirapim yumi long tingim ol samting bilong spirit na bilip long Jehova. Kibung i bin kirapim yumi long i stap klin, mekim pasin sori, na givim bel tru long autim tok bilong Kingdom.—1 Pita 2:12.
Olsem ol wokboi bilong Jehova long taim bilong Nehemia, yumi bin amamas tru long ol gutpela samting bilong spirit yumi kisim long “Ol Man Bilong Givim Bel Long Autim Tok Bilong Kingdom” Kibung Distrik. (Nehemia 8:12) Olsem wanem? Ating dispela kibung i bin mekim yu i belgut na i strongim tingting bilong yu long wok strong yet olsem man i givim bel long autim tok bilong kingdom, a?
[Blok/Piksa long pes 23]
Nupela Buk Bilong Stadi!
Long pinis bilong namba wan de bilong kibung, ol manmeri i bung ol i bin amamas tru long harim toksave bilong nupela buk Worship the Only True God. Ol i wokim dispela buk bilong stadi long en wantaim ol man i stadi pinis long buk Save i Bringim Man Long Laip Oltaim, na dispela buk bai strongim bilip bilong ol man “bel bilong ol i gutpela tru . . . bilong kisim laip i stap gut oltaim.”—Aposel 13:48.
[Kredit Lain]
Image on book cover: U.S. Navy photo
[Blok/Ol Piksa long pes 24]
Rot Bilong Go Klostu Moa Long God
Brata i mekim laspela tok long namba tu de bilong kibung i bin tokaut long nupela buk long tok Inglis Draw Close to Jehovah. Dispela buk i gat 4-pela bikpela hap, wan wan hap i stori long ol bikpela pasin bilong Jehova—bikpela strong, stretpela pasin, gutpela tingting na save, na pasin sori. Wan wan hap i gat sapta i stori long olsem wanem Jisas Krais i bin mekim ol samting i kamapim klia ol pasin bilong God. Nambawan as bilong dispela buk i bilong helpim yumi yet na ol Baibel-stadi bilong yumi long pas gut wantaim God Jehova na mekim dispela pasin i kamap strong moa.
[Blok/Ol Piksa long pes 26]
Samting Bilong Stiaim Ol Yangpela Long Ol Samting Bilong Spirit
Long namba tri de bilong kibung, yumi bin kisim nupela nius, nem bilong en, Ol Yangpela—Yupela Bai Mekim Wanem Long Laip Bilong Yupela? Dispela nius i bilong helpim ol yangpela Witnes long makim samting i stret ol bai mekim, na i kamapim ol tok bilong Baibel long ol samting bilong helpim ol long mekim wanpela wok i no gat pinis bilong en, em wok bilong Jehova long olgeta de.