Kisim Gutpela Helpim Long “Ol Man Bilong Givim Bel Long Autim Tok Bilong Kingdom” Kibung Distrik

¹ Program i Kirapim Tru Tingting: Yumi bin amamas tru long gutpela program bilong kirapim tingting em yumi bin harim long kibung distrik! I gat wanpela as tasol na yumi bin bung wantaim, em long kisim ol samting bilong helpim yumi long givim bel long autim tok long Kingdom bilong God. Yu inap tingim olsem wanem brata i mekim tok namba wan i kamapim insait bilong dispela tok “autim tok”? Long tok “Yumi No Ken Pret​—⁠Yumi Save Jehova i Stap Wantaim Yumi,” yu inap tingim wanem wok painimaut ol i bin kirapim yumi long mekim? Yu bin skelim pinis wanem ol stori bilong ol brata sista?

² Tok i gat tripela hap bilong en “Ol Kain Kain Hevi i Traim Strong Bilong Bilip Bilong Yumi” i kamapim tripela samting i olsem as na Jehova i larim ol man i mekim nogut long yumi. Yu inap stori long ol dispela samting? Wanem tok bilong Baibel i as bilong pasin Kristen bilong yumi long i no insait long ol samting bilong graun? Ol i bin kirapim yumi long mekim wanem bilong redi long taim ol hevi i painim yumi long pasin bilong i no insait long ol samting bilong graun? Olsem wanem pasin bilong yumi long sanap strong na karim hevi i litimapim nem bilong Jehova?

³ Wanem ol hap bilong drama “Sanap Strong Long Taim Bilong Planti Hevi” i bin strongim yu? Olsem wanem yumi inap bihainim pasin bilong Jeremaia?

⁴ Pablik-tok “Pasin Bilong Dispela Graun i Wok Long Senis,” i stori long wanem ol bikpela senis bai kamap paslain long bikpela de bilong God? Taim yu harim laspela tok, “Mekim Planti Gutpela Wok Olsem Man i Givim Bel Long Autim Tok Bilong Kingdom,” yu bin tingim olsem wanem ol tok ol i kamapim i bikpela samting long wok bilong yu yet long autim tok?

⁵ Ol Bikpela Tok Bilong Bihainim: Olsem tok “Yupela i Mas Soim Olsem Yupela i Save Tenkyu” i bin kamapim, olsem wanem yumi inap kamapim olsem yumi tenkyu tru long Jehova? As tok bilong kibung, “Pasin Bilong Givim Bel i Kirapim Ol Man Bilong Autim Tok Bilong Kingdom,” i bin kirapim yumi long bihainim pasin bilong husat long givim bel? Dispela tok i kirapim yumi long skelim wanem ol samting bilong yumi yet?

⁶ Tok i gat tripela hap bilong en, “Tok Profet Bilong Maika i Strongim Yumi Long Wokabaut Long Nem Bilong Jehova,” i kamapim klia wanem tripela samting yumi mas mekim na bai Jehova i ken orait long yumi? Yu ting yumi inap mekim ol dispela samting? (Mai. 6:⁠8) Olsem tok “Was Gut Long Bel Bilong Yu na Bai Yu Ken Bihainim Stretpela Pasin” i kamapim, yumi mas mekim wanem na bai yumi stap klin? Dispela tok “Was Gut Long Pasin Bilong Giaman” i tok lukaut long wanem ol samting em yumi mas was gut long en na bai yumi no larim ol man i giamanim yumi, na yumi no giamanim ol narapela?

⁷ Long tok i gat tripela hap bilong en “Ol Man Bilong Autim Tok Bilong Kingdom i Givim Biknem Long Wok Ol i Mekim,” yu kirap pinis long bihainim wanem ol tok i gutpela long helpim wok bilong yu long autim tok? Dispela tok “Toktok Long Ol Gutpela Samting Bilong Spirit Bai Strongim Yumi” i bin skelim tok bilong Filipai 4:⁠8. Olsem wanem dispela skripsa i helpim yumi long pasin bilong toktok long ol samting bilong spirit, na long wanem taim yumi mas mekim olsem?

⁸ Dispela tok “Bilip Tru Long Jehova Long Taim Bilong Hevi,” i stori long olsem wanem yumi inap karim ol bikpela hevi, hevi bilong mani, sik, famili, na hevi bilong ol laik nogut i stap long skin. Taim ol kain hevi olsem i painim yumi, olsem wanem yumi inap kamapim olsem yumi bilip long Jehova?

⁹ Ol Nupela Samting Bilong Spirit: Yumi bin amamas tru long kisim nupela buk Worship the Only True God, na long kisim toksave olsem yumi bai kisim dispela buk long Hiri Motu na Tok Pisin. Taim ol i mekim toksave i stori gut long wok bilong dispela buk, dispela i bin mekim wanem long yu? I gat wanem as na dispela namba tu buk bilong mekim wantaim Baibel-stadi bai helpim yumi long wok bilong kamapim ol disaipel?

¹⁰ Bihain yumi kisim buk Draw Close to Jehovah. Wanem sampela gutpela samting bilong dispela buk? Yu bin amamas long wanem ol piksa long dispela buk? Dispela buk i bin helpim yu long i go klostu moa long Jehova? Husat moa inap kisim helpim long dispela buk?

¹¹ Dispela “Ol Man Bilong Givim Bel Long Autim Tok Bilong Kingdom” Kibung Distrik i bin strongim yumi long ol samting bilong spirit na bai yumi inap sanap strong long dispela taim bilong planti hevi. Olsem na bilong dispela kibung i ken helpim gut yumi, i gutpela yumi wok strong tru long tingim ol tok i bin kamap, amamas long ol samting yumi bin kisim, na bihainim ol samting yumi bin lainim. (2 Pi. 3:14) Dispela bai strongim yumi long i stap gut long God, na bihainim pasin bilong Krais Jisas long givim bel long autim tok bilong Kingdom, na long dispela rot yumi litimapim nem bilong Jehova.​—⁠Fl. 1:​9-11.