Kam Long “Ol Man i Stap Olsem Lait” Kibung Distrik
“LUKIM. Ol blakpela klaut na bikpela tudak i karamapim olgeta arapela lain manmeri bilong graun.” (Aisaia 60:2) Ol dispela tok i makim stret ol manmeri long dispela taim nau! Tru tumas, ol lotu giaman i save pasim tingting bilong ol manmeri na i olsem ol i stap long tudak, olsem na ol i no save wanem kain pasin bilong lotu God i laikim. Bilong wanem ol i no save? Long wanem, Satan, em god bilong dispela graun, “em i bin pasim tingting bilong ol dispela man i no bilip.”—2 Korin 4:4.
Tru Satan i pasim tingting bilong ol man, tasol em i no bin mekim olsem long ol Witnes Bilong Jehova. Tok Jehova i mekim long maus bilong profet Aisaia i stret long ol olsem: “Mi Bikpela, mi kam long yu, na bikpela lait bilong mi i lait strong antap long yu.” (Aisaia 60:2) Ol i tenkyu long God long ol i bin lusim tudak na kam insait long gutpela lait bilong Em! Dispela lait em i lait bilong spirit, olsem ol tok i tru i stap long Baibel, em Tok bilong God, em i givim gutpela tingting na save long ol man. Na ol man i aipas tru ol tu ol inap “lukim” dispela lait—ol inap kisim save long tok i tru.
Tasol i mas i gat man bilong helpim ol. Sapos man i kaunim tasol Baibel, na em i no kaunim sampela buk o nius samting God i bin kamapim bilong helpim ol man long save long as bilong ol tok bilong Baibel, ating dispela man i no inap kisim gut dispela “lait.” Long dispela as God Jehova i bin kamapim lain ‘gutpela wokboi,’ olsem Matyu 24:45-47 i tok profet long en. Long nau Lain Bilong Bosim Ol Witnes Bilong Jehova i olsem maus bilong dispela ‘gutpela wokboi.’ Dispela lain i bosim wok bilong “Ol Man i Stap Olsem Lait” Kibung Distrik.
Ol i kamapim dispela kibung bilong helpim olgeta long lain bilong Jehova long i stap olsem gutpela lait, olsem Pol i tok long Filipai 2:15. Long dispela ves Pol i kirapim ol Kristen long i stap olsem “ol lait namel long ol lain manmeri bilong dispela graun.”—Matyu 5:14, 16.
Long Amerika ol bai kirap mekim ol dispela kibung distrik long Fraide, Jun 5. Sampela musik bai kamap long 10:20 long moningtaim bilong redim tingting na bel bilong ol manmeri i kam bung, na bai ol i ken tingim gut ol tok bilong Baibel em bai kamap bihain. I gat as tok bilong olgeta wan wan de, na as tok bilong Fraide em olsem: “Salim Lait na Tok Tru Bilong Yu i Kam.”—Buk Song 43:3.
Long Fraide long moningtaim, as tok bilong kibung bai kamap, nem bilong en: “Ol Man i Stap Olsem Lait—Bilong Mekim Wanem Wok?” Ol Kristen i no tingting long helpim ol yet na ol i stap olsem lait. Nogat. Ol i mekim dispela wok, long wanem, ol i laik autim tok i tru, na litimapim nem bilong Man i bin wokim ol. Long dispela as Krais Jisas, em Nambawan Man i Stap Olsem Lait, em i kam daun long graun. Na i stret Jisas i tok long em yet olsem: “Taim mi stap yet long dispela graun, mi yet mi lait bilong dispela graun.” (Jon 9:5) Olsem na Jisas i stap olsem gutpela piksa na yumi ken bihainim pasin bilong em. (1 Pita 2:21) Long belo bek long namba wan de bilong kibung, ol man bai harim wanpela tok na lukim wanpela pilai bilong Baibel i stori long King Josaia. Dispela tok na pilai bai helpim tru ol yangpela.
As tok bilong Sarere, em “Yupela i Olsem Lait Bilong Graun. . . . Lait Bilong Yupela i Mas Lait.” (Matyu 5:14, 16) Long moningtaim bai i gat 3-pela tok aninit long het-tok: “Lait Bilong Yupela i Mas Lait.” Na i gat taim bilong ol man i dediket pinis long Jehova ol i ken kisim baptais. Long belo bek, bai i gat 3-pela tok wantaim bilong helpim ol man long kisim save long taim bilong Krais i kam bek olsem King na taim bilong em i kamap ples klia.
Sande em namba 3 de na laspela de bilong kibung, na as tok bilong en em “Yupela i Mas Wokabaut Yet Olsem Ol Manmeri Bilong Lait.” (Efesus 5:8) Long moningtaim, bai i gat 3-pela tok wantaim i stori long wok bilong famili. Na tu, wanpela tok bai kamapim klia ol samting yumi mas mekim na bai yumi daun long God na Krais.
Bikpela tok bilong kibung bai kamap long Sande long belo bek, em pablik-tok. Dispela tok bai stori long ol tok bilong Jon 1:1-16 na olsem wanem i bikpela samting long yumi mas kisim save long tok bilong Baibel. Dispela tok bai kamapim klia olsem Krais Jisas em i lait bilong graun. Tok bilong pinisim kibung bai kirapim ol brata long wokabaut yet long lait.
Gutpela sapos yu mekim sampela samting bilong kamapim bel bilong yu olsem yu pilim tru dispela gutpela kaikai bilong spirit em Jehova i redim long rot bilong oganaisesen bilong em. Olsem na gutpela sapos yu stap long kibung long taim ol i mekim namba wan singsing long Fraide long moningtaim na i go inap long laspela beten long Sande long apinun. Putim gut yau long olgeta tok ol brata i mekim long pletfom. Raitim sampela hap tok long notbuk samting na bai tingting bilong yu i no ken wokabaut, na bihain yu ken lukim ol dispela tok. Na tu, gutpela sapos yu redi long mekim sampela wok volantia. Olsem bai yu amamas long ol samting yu kisim, na bai yu kisim bikpela amamas moa bilong man i givim samting.—Aposel 20:35.