Husat Ol i Bihainim Dispela Man Em i Lait Bilong Graun?
“Yupela i stap olsem lait namel long ol lain manmeri bilong dispela graun.”—FILIPAI 2:15.
BAIBEL i tok, Jisas i olsem “bikpela lait,” na em i olsem “lait i kamap long ol” man bilong dispela graun. (Aisaia 9:2; Jon 8:12) Tasol i no planti ol i laik bihainim em taim em i bin stap long graun. Planti ol i bihainim ol samting bilong tudak. Baibel i kolim ol olsem ol “giaman aposel na giaman wokman. Ol i save senisim pasin bilong ol bilong mekim ol man i ting ol i stap aposel tru bilong Krais. . . . Yumi save, Satan yet i save senisim pasin bilong en na kamap olsem ensel bilong lait. Olsem na sapos ol wokman bilong Satan tu i senisim pasin bilong ol na i mekim olsem ol wokman bilong stretpela pasin, yumi no ken kirap nogut long dispela. Bihain ol bai i kisim pe inap tru long dispela ol pasin ol i bin mekim.”—2 Korin 11:13-15.
2 Maski lait i gutpela, planti man bai i no laikim. Jisas i tok: “As bilong kot bilong ol i olsem: Ol man i laikim tumas tudak. Ol i no laikim lait, long wanem, ol i man bilong mekim pasin nogut. Olgeta man i save mekim pasin nogut, ol i birua long lait. Ol i no laik bai pasin bilong ol i kamap ples klia. Olsem na ol i no save kam long lait.”—Jon 3:19, 20.
Ol i Laikim Pasin Bilong Tudak
3 Taim Jisas i stap long graun, God i bin givim strong long em na bai em i ken wokim ol mirakel na ol man i ken save em i Mesaia. Long de Sabat em i oraitim wanpela aipas na em inap lukluk gen. Em gutpela pasin marimari Jisas i bin mekim! Tasol “sampela Farisi i tok, ‘Yumi save, God i no bin salim dispela man i kam, long wanem, em i no save bihainim lo bilong de Sabat.’ ” (Jon 9:16) Ol i gat tingting nogut! Jisas i bin mekim wanpela gutpela samting, na nau ol man i ken amamas long dispela aipas em i no aipas moa na Jisas i bin oraitim em, tasol ol dispela bikman bilong lotu giaman ol i bel nogut long Jisas, na ol i toknogutim em! Olsem na ating ol i tok nogut long spirit holi bilong God, em i bin strongim Jisas long wokim dispela mirakel. Jisas i tok, “man i mekim tok nogut long Holi Spirit, God bai i no inap lusim sin bilong dispela” man.—Matyu 12:31, 32.
4 Bihain ol i bungim dispela man bipo em i aipas, na em i tokim ol: “Dispela man [Jisas] i mekim ai bilong mi i op, na yupela i tok, yupela i no save, em i kamap we. Yumi save, God i no save harim tok bilong ol man bilong mekim sin. Tasol sapos wanpela man i save lotu long God na i bihainim laik bilong God, orait God i save harim tok bilong em. Long bipo tru na i kam inap nau i no gat stori bilong wanpela man em i stap aipas long taim mama i karim em, na bihain wanpela man i opim ai bilong em. Sapos God i no bin salim dispela man i kam, orait em i no inap mekim wanpela samting.” Ol Farisi i tokim em: “Sin i pas tru long yu . . . na yu laik skulim mipela, a? Na ol i rausim em i go.” Ol i no gat pasin sori. Jisas i tok, ol i save long ol samting bilong graun, tasol ol i no save long ol samting bilong spirit.—Jon 9:30-41.
5 Na taim Jisas i bin wokim narapela mirakel na kirapim Lasarus long matmat, planti man i bilip long em, tasol ol pris na Farisi i bung na i tok: “Bai yumi mekim wanem? Dispela man i save wokim planti mirakel. Sapos yumi larim em i mekim dispela kain pasin, orait bai olgeta manmeri bai i bilip long em. Na ol Rom bai i kam na bagarapim tempel bilong yumi wantaim ol lain bilong yumi.” (Jon 11:47, 48) Ol i tingting tumas long namba bilong ol na long amamasim ol Rom, na God nogat. Olsem na ol i “wokim toktok bilong painim rot bilong kilim Jisas i dai.”—Jon 11:53.
6 Na ol i mekim sampela pasin tudak moa. “Ol bikpris i wokim toktok long kilim Lasarus tu i dai, long wanem, planti Juda i ting long samting Jisas i bin mekim long Lasarus, na ol i lusim ol bikpris na ol i bilip long Jisas.” (Jon 12:10, 11) Em ol bikpris nogut! Ol i tingting tasol long holim yet biknem na bikpela namba bilong ol, tasol lain bilong ol i bin bikhet long gavman bilong Rom, olsem na long yia 70 C.E. ol Rom i kam na bagarapim ples bilong ol na sindaun bilong ol na kilim ol i dai!—Aisaia 5:20; Luk 19:41-44.
Pasin Sori Bilong Jisas
7 Long nau tu i olsem. I no planti man i laik save long tok i tru, tasol i gat sampela i laik tru long save long dispela lait. Ol i laik bai God i stap King bilong ol, na ol i laik bai Jisas i lainim ol long dispela lait bilong tok i tru na bai ol i ken bihainim em. Taim Jisas i stap long graun, ol man i gat pasin daun ol i bin mekim olsem, na “ol Farisi i lukim” na ol i tok, “Olgeta manmeri i go bihainim em.” (Jon 12:19) Ol man i gat pasin daun ol i bin laikim Jisas, long wanem, em yet i gat dispela pasin. Tasol ol Farisi i tingting long ol yet tasol, na ol i gat pasin antap, na ol i laik bosim ol samting. Jisas i tok: “Ol i save pasim karamap i hevi tumas na putim antap long . . . ol man, na ol man i hatwok tru long karim. Tasol ol yet i no laik . . . helpim ol man long karim. Olgeta samting ol i save mekim, em ol i mekim bai ol man i ken lukim.”—Matyu 23:4, 5.
8 Tasol Jisas i no olsem. “Em i lukim ol . . . manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Em i tokim ol: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela.” (Matyu 11:28-30) Jisas i mekim olsem Aisaia 61:1, 2 i kolim: “God [Jehova] i . . . makim mi bilong i go bringim gutpela tok . . . long ol rabisman. Na em i salim mi i kam long pinisim bel hevi bilong ol man . . . , na long tokaut . . . olsem, taim i kamap pinis bilong God . . . i laik mekim gut long ol manmeri . . . na mekim save long ol birua bilong ol. Na em i salim mi long strongim bel bilong ol manmeri i sori na i krai.”
Bungim Ol Man Bilong Lait
9 Taim Jisas i go bek long heven em i mas wetim God i givim strong bilong Kingdom long em na bai em i ken brukim ol man i go tupela lain, olsem lain “sipsip” na lain “meme.” (Matyu 25:31-33; Song 110:1, 2) Dispela taim i kamap long yia 1914, em taim bilong “las de” i kirap long dispela yia. (2 Timoti 3:1-5) Long dispela taim em i kisim namba olsem King bilong Kingdom bilong God, na em i kirap bungim ol man i laik bihainim lait na em i orait long ol. Bihain long Namba Wan Pait dispela wok i go bikpela hariap.
10 Jisas i bosim wok bilong bungim ol man, na dispela wok i kamap gutpela tru. Planti manmeri bilong olgeta lain ol i kisim save na ol i kam bung wantaim na lotu tru long God. I no gat wanpela taim bipo dispela samting i bin kamap. Orait, long nau husat ol i bihainim lait i kam long God na Krais? Husat ol i “stap olsem lait namel long ol lain manmeri,” na ol i singautim ol man long “kam na kisim wara bilong givim laip”?—Filipai 2:15; KTH 22:17.
11 Ol lotu bilong dispela graun ol i holim nem Kristen ol i no mekim olsem, a? Ol i bruk bruk na ol i no stap olsem lait bilong ol man. Ol i wankain olsem ol hetman bilong lotu long taim bilong Jisas. Ol i no kamapim lait bilong God na Krais long ol man. Inap 33 yia bipo, wanpela nius bilong lotu (Theology Today) i tok: “Mipela mas tokaut olsem, dispela lait i no kamap strong insait long Misin. Misin i . . . bihainim ol pasin bilong ol lain em i stap namel long ol. Misin i no stap olsem lait bilong graun, nogat. Em i kisim ol lait em dispela graun yet i kamapim, na em i givim long ol man.” Na long nau pasin bilong ol dispela lotu i go nogut moa yet. Dispela “lait” em i kamapim i no lait tru—em tudak tasol, long wanem, Satan wantaim lain bilong em ol inap givim tudak tasol long ol man. Tru tumas, i no gat lait bilong tok i tru long ol dispela lotu, em tok bilong narapela i pait wantaim tok bilong narapela na ol i bihainim ol pasin bilong dispela graun.
12 I gat as na yumi ken tok, lain Witnes Bilong Jehova i stap olsem lait tru bilong dispela graun. Olgeta long dispela lain—ol man, meri, ol yangpela—ol i stap wanbel na wok gut wantaim long givim lait bilong Jehova na Krais long ol man. Long yia i go pinis, long klostu olsem 70,000 kongrigesen bilong ol Witnes Bilong Jehova i stap long olgeta hap, winim 4 milion manmeri ol i stap olsem lait na ol i tokim olgeta man long God na ol samting em i laik mekim. Na long olgeta yia planti manmeri moa ol i wok long i kam bilong kisim lait bilong tok i tru. Inap planti handet tausen ol i kisim baptais taim ol i stadi long Baibel na kisim save long tok i tru. Tru tumas, “God i laik kisim bek olgeta [kain] manmeri, bai ol i ken save long as bilong tok tru.”—1 Timoti 2:4.
13 Jehova i givim lait long yumi na dispela i wankain olsem samting i bin painim lain bilong em long bipo, taim ol i lusim Isip. “Long san [Jehova] i stap insait long bikpela klaut na i go pas bilong soim rot long ol. Na long nait em i stap insait long bikpela paia na i go pas bilong givim lait long ol. Olsem na ol inap wokabaut long san na long nait.” (Kisim Bek 13:21, 22) Ol i save, oltaim dispela klaut long san na paia long nait em bai stap bilong helpim ol. I wankain tu long san—God i wokim bilong givim lait long yumi na yumi save, bai yumi kisim lait bilong en long olgeta de. Na olsem tasol yumi ken save, Jehova bai givim lait bilong spirit bilong soim rot long ol man i laik painim tok i tru nau long dispela taim nogut bilong las de. Sindaun 4:18 i tok: “Rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.”
Kamapim Lait Bilong Kingdom
14 Jehova yet i As bilong lait, na Jisas i Nambawan Man bilong kamapim dispela lait, tasol ol disaipel bilong em tu i mas kamapim dispela lait. Em i tokim ol: “Yupela i olsem lait bilong graun. . . . Lait bilong yupela i mas lait long ai bilong ol manmeri.” (Matyu 5:14, 16) Wanem namba wan bikpela tok bilong dispela lait ol disaipel i mas givim long ol man? Ol i mas lainim ol man long wanem samting? Jisas i no tok ol i mas autim tok long wanpela kain gavman ol man i eleksen long en, o narapela kain gavman olsem komyunis samting, o long lotu na gavman i mas pas wantaim, o ol narapela samting bilong dispela graun. Long Matyu 24:14 em i tok, maski ol man i birua long lain bilong em, “bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Olsem na long nau ol man i stap olsem lait ol i tokim ol man long Kingdom bilong God, em bai pinisim ol lain bilong Satan na kamapim stretpela nupela taim.—1 Pita 2:9.
15 Ol man i laikim lait ol i no ken larim sampela tok o tingting o wok bilong ol man bilong graun i paulim tingting bilong ol. I no longtaim na bai ol dispela tok na tingting na wok bilong ol i pinis olgeta. Ol man i laikim tru stretpela pasin ol i mas givim bel long gutpela tok bilong Kingdom ol man i stap olsem lait ol i givim long ol man long olgeta hap. Em dispela lain Kamapim Tok Hait 7:9, 10 i tok long ol, olsem: “Mi lukim planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. . . . Ol i singaut strong olsem, ‘God bilong yumi . . . na Pikinini Sipsip [Krais Jisas], tupela tasol i save kisim bek yumi na mekim yumi i stap gut.’ ” Na ves 14 i tok, ol dispela manmeri i bin winim taim bilong “bikpela hevi.” Ol bai abrusim bagarap long pinis bilong dispela taim nogut na bai ol i ken i stap long nupela taim, na ol bai stap gutpela olgeta aninit long Kingdom.
Nupela Taim
16 Long nupela taim dispela lait bilong tok i tru bai i pulap long olgeta hap. Tingim ol samting bai kamap long de bihain long taim dispela pasin bilong nau i pinis. Satan na ol spirit nogut na ol gavman na bikpela bisnis na lotu, em ol i stap aninit long Satan, olgeta bai i pinis! Bai i no gat sampela samting moa bilong Satan bilong grisim ol man. Olsem na bihain long Armagedon bai i no gat wanpela nius o buk moa i kamapim ol tok bilong helpim dispela pasin nogut bilong nau. Na bai i no gat ol tok moa long televisen na redio bilong paulim tingting bilong ol man. Olgeta samting nogut bilong dispela graun bilong Satan bai pinis olgeta—wantu tasol!—Matyu 24:21; KTH 7:14; 16:14-16; 19:11-21.
17 Em nau, olgeta hevi bai pinis! Kirap long dispela taim, gutpela lait bilong spirit i kam long Jehova na Kingdom bilong em, dispela bai bosim na stiaim gut ol man. Olsem Jehova i tok long Aisaia 54:13: “Bai mi yet mi skulim ol . . . na bai ol i gat gutpela sindaun tru.” Bai ol samting i kamap olsem Jehova i bin tok promis long en long Aisaia 26:9—bai olgeta manmeri i lain long bihainim “stretpela pasin.”
18 Kwiktaim ol senis bai wok long kamap bilong helpim tingting bilong ol man long kamap gutpela, na helpim ol long i stap gutpela long ol samting bilong spirit. Pasin nogut na pasin sem i stap nau na i mekim yumi i stap bel hevi, ol dispela samting bai pinis. Olgeta manmeri long dispela nupela taim bai ol i lain long tok i tru bilong God na long ol laik bilong em. Ol samting bai kamap tru olsem Aisaia 11:9 i tok profet long en, olsem: “Olgeta samting long graun bai i save tru long [Jehova]. Dispela save bai inapim olgeta hap graun olsem solwara i inapim mak bilong en olgeta.”
Hariap Bihainim Dispela Man Em i Lait Bilong Graun
19 Nau long las taim bilong dispela pasin nogut bilong nau, yumi mas hariap na bihainim dispela Man em i lait bilong graun. Na yumi mas was gut, long wanem, ol man i bosim dispela tudak, em Satan na ol spirit nogut na ol lain bilong em long graun, ol i wok strong long pasim rot bambai yumi no ken wokabaut long dispela lait. Olsem na aposel Pita i tok: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.”—1 Pita 5:8.
20 Ol man i laik i kam long lait, Satan bai putim kain kain samting bilong pasim rot bilong ol na bai ol i no ken lusim tudak. Ating ol wanblut o ol pren bilong pastaim, em ol i birua long tok i tru, bai ol i putim hevi long ol. O ating tok bilong ol lotu giaman o bilong ol man i no bilip long God, dispela i paulim tingting bilong ol na ol i gat tupela tingting long Baibel. O ating sin i stap long skin bilong ol i mekim na ol i hatwok long bihainim ol lo bilong God.
21 Olsem wanem? Yu laik i stap long dispela nupela taim i no gat pasin raskol o pasin i no stret o pait, na ol man i no ken i stap rabis moa? Yu laik i stap oltaim long gutpela ples paradais long graun, no gat sik samting? Sapos olsem, orait yu mas bilip tru long Jisas em i lait bilong graun, na yu mas putim yau long tok ol disaipel bilong em i autim, em ol i holimpas “tok i gat laip” na ol i “stap olsem ol lait namel long ol lain manmeri.”—Filipai 2:15, 16.
Bai Yu Bekim Olsem Wanem?
◻ Ol bikman bilong lotu i mekim wanem na ol i kamapim klia olsem ol i laikim tudak?
◻ Jisas i gat wanem tingting long ol man?
◻ Olsem wanem long wok bilong bungim ol man bilong i stap olsem lait?
◻ Wanem ol bikpela samting tru bai kamap liklik taim?
◻ Bilong wanem yumi mas hariap na bihainim dispela man em i lait bilong graun?
[Askim Bilong Stadi]
1. Baibel i tok wanem long lait giaman bilong ol lotu?
2. Wanem samting bilong ol man na Jehova bai skelim ol long dispela?
3, 4. Olsem wanem ol hetman bilong lotu long taim bilong Jisas ol i kamapim klia olsem ol i no laik bihainim lait?
5, 6. Wanem ol samting ol hetman bilong lotu i bin mekim na i kamapim klia olsem ol i laikim tudak?
7. Ol man i laikim tumas tok i tru, bilong wanem ol i bin i kam long Jisas?
8. Jisas i gat wanem tingting long ol man nating na i narapela kain long tingting bilong ol hetman bilong lotu?
9. Wanem ol bikpela samting i bin kamap long yia 1914?
10. Husat ol i mekim wok bilong Jisas long bungim ol man?
11. Olsem wanem long lait bilong spirit na ol lotu bilong graun ol i holim nem Kristen?
12. Long nau wanem lain ol i stap olsem lait tru bilong ol man?
13. Dispela lait i kam long Jehova, yumi ken skelim wantaim wanem samting?
14. Wanem bikpela tok ol man i stap olsem lait ol i mas autim long ol man?
15. Ol man i laik kisim dispela lait ol i mas mekim wanem?
16. Long taim bilong Armagedon wanem samting bai painim dispela graun bilong Satan?
17, 18. Stori long pasin bai stap long graun taim ol lain bilong Satan i pinis?
19, 20. Ol man i laik bihainim lait, bilong wanem ol i mas was gut?
21. Ol man i laik i stap long nupela taim God bai kamapim, ol i mas mekim wanem?
[Piksa long pes 14, 15]
Ol Farisi i no gat sori liklik, na ol i rausim dispela man pastaim em i aipas tasol Jisas i oraitim em