Ol Witnes Bilong Jehova Bai Mekim Ol Kibung Intenesenel
Lain Bilong Bosim Ol Witnes Bilong Jehova ol i laik mekim ol kibung intenesenel long 1998. Ol brata i amamas tru long harim dispela toksave taim ol i bung long miting bilong olgeta yia bilong Sosaiti Was Taua Bilong Pensilvenia, long Haus Kibung Bilong Jesi Siti long Sarere, Oktoba 5, 1996.
Sampela kibung intenesenel bai kamap long hap bilong Not Amerika namel long yia 1998, na i gat ol kibung distrik tu. Ol i ting ol dispela kibung bai pulim planti handet tausen Witnes bilong planti hap bilong graun long i kam bung wantaim. Sosaiti i laik bai i gat sampela bilong planti planti kantri i kam long ol dispela kibung, olsem na Sosaiti bai makim hamas manmeri ol 100 brens-ofis bilong Sosaiti Was Taua i ken salim i go long ol wan wan kibung intenesenel long Not Amerika.
Ating planti i gat laik long i go long Not Amerika, tasol bai ol i no inap i go. Tasol ating planti tausen ol inap i go long wanpela kibung intenesenel klostu long kantri bilong ol, o long kantri bilong ol yet. Sosaiti i wok nau long stretim rot bilong ol i ken mekim ol kibung intenesenel long tupela o tripela kantri long Yurop, na sampela long hap bilong Afrika, Esia, Latin-Amerika, Saut Pasifik, na Karibian.
Bihain, ol brens-ofis bilong Sosaiti bai toksave long ol kongrigesen long ol kibung ol i ken go long en. Ol bai kolim det bilong ol kibung na rot bilong makim husat husat inap go long en. Sapos man i gat laik long putim nem bilong em long i go long dispela kain kibung, orait gutpela sapos nau em i kirap na bungim sampela hap mani bilong em.
Ol Witnes Bilong Jehova long olgeta hap bilong graun ol inap wetim ol samting i kamap long ol dispela kibung intenesenel bilong 1998. Ol kibung distrik long olgeta kantri bai kamapim wankain program.