Ol Kibung Intenesenel Long 2003
LONG Sarere, Oktoba 6, 2001, miting bilong olgeta yia bilong ol memba bilong Sosaiti Was Taua bilong Pennsylvania i kamap long Jersey City, New Jersey, long Amerika. Bihain long dispela miting, ol memba na ol man ol i singautim, ol i amamas long harim ol gutpela tok. Long de bihain, long ol narapela miting ol i wokim long fopela siti long Kanada na Amerika, ol memba bilong Gavening Bodi bilong ol Witnes Bilong Jehova i mekim dispela toksave bihain long laspela tok bilong program:
“Taim yumi tingim ol samting i laik kamap long bihain, em i bikpela samting tru olsem olgeta manmeri bilong God i no ken lusim pasin bilong bung wantaim. Aposel Pol i kirapim yumi long bung wantaim na strongim narapela narapela, na wok strong moa long mekim long taim yumi lukim bikpela de bilong Jehova i kam klostu. (Hibru 10:24, 25) Bilong bihainim dispela tok bilong Baibel, mipela laik wokim ol kibung distrik long olgeta hap bilong graun long yia [2002]. Na long yia 2003, sapos em laik bilong Jehova, ating rot bai op bilong mipela i ken wokim sampela ol bikpela kibung intenesenel long sampela hap bilong graun. Nau em taim bilong was gut na was i stap, na save olsem wanem ol samting bilong graun long nau i wok long senis.”
Wok bilong lain bilong God i mas go yet, maski pasin bilong tingting planti na ol hevi i go bikpela long dispela taim em pinis i wok long kam klostu. Yumi mas autim gutnius bilong Kingdom, na autim tok lukaut bilong Baibel long ol man bilong olgeta kantri, olgeta lain, na olgeta tok ples, na singautim ol long ‘pret long God na litimapim nem bilong em, long wanem, taim i kamap pinis bilong God i skelim pasin bilong olgeta man long kot.’ (KTH 14:6, 7) Olsem na mipela tingim laik bilong Jehova na stretim rot bilong wokim ol kibung intenesenel long sampela hap bilong graun long yia 2003.
Mipela tingting long wokim sampela kibung olsem long sampela siti long Not Amerika, na bihain liklik bai mipela wokim sampela long Yurop. Na long sampela mun bihain, tasol long 2003 yet, ol samting bai stret pinis bilong ol grup long i go long kibung intenesenel long sampela siti long Esia, na long pinis bilong yia, sampela grup moa bai go long Afrika, Saut Amerika, na long hap bilong Pasifik. Ol bai askim sampela brens long salim liklik grup tasol bilong i go long ol ples ol i makim ol kibung long kamap long en. Olsem na bai ol i no inap singautim olgeta long i go. Tasol sapos i gat ol liklik grup bilong ol narapela narapela kantri long ol dispela hap ol kibung intenesenel bai kamap long en, narapela bai strongim narapela.
Klostu nau ol kongrigesen bilong ol Witnes Bilong Jehova bai kisim toksave long ol dispela kibung. Ol brens ofis i stap long hap bilong ol dispela grup em ol i singautim bilong i go, ol bai toksave long wanem taim stret na wanem siti ol kibung bai kamap long en. Olsem na mipela laik askim yupela long no ken rait o ring long mipela long nau bilong painimaut ol dispela samting.
Ol dispela lain ol i makim bilong i go long ol kibung intenesenel em ol Witnes i dediket na baptais pinis, na ol bai stap gutpela piksa na mekim pasin sori long ol brata sista bilong dispela kantri ol i go long en. Na tu, rot bai op long ol dispela brata sista long tok welkam na mekim gut long ol lain i kam long hap bilong ol. (Hibru 13:1, 2) Na dispela i mekim na narapela bai strongim bilip bilong narapela. (Rom 1:11, 12) Ol brens em ol i askim ol long salim ol grup i go long wanpela kantri o long sampela kantri, ol bai toksave moa long dispela samting long bihain.
Ol tripela de kibung distrik bilong yia 2003 bai kamap long planti kantri olsem bipo. Taim yumi bung wantaim, bai rot i op long yumi olgeta i ken harim tok, kisim save, na kisim strong. (Lo 31:12; 1 Korin 14:31) Dispela bai opim rot na olgeta manmeri bilong God i ken ‘traim na lukim na save olsem Bikpela i gutpela tru.’ (Song 34:8) Long olgeta kibung intenesenel na long planti narapela kibung distrik, ol misineri bai stap na sampela bai insait long sampela hap bilong program.
Long dispela yia 2002, yumi amamas long “Ol Man Bilong Givim Bel Long Autim Tok Bilong Kingdom” Kibung Distrik, dispela kibung bai kirapim yumi long mekim bikpela wok moa bilong autim tok. Taim yumi mekim olsem, laik bilong lukim samting Jehova i redim bilong yumi long yia antap bai i go bikpela moa. Dispela bai helpim yumi long ‘was gut, was i stap, na redi’ long dispela taim bilong bikpela hevi na taim bilong wetim ol bikpela senis.—Matyu 24:42-44.