Yu Save Tokim Ol Yu Laik Stadi Wantaim Ol Long Baibel?
1 Planti brata sista i bin tokim man ol i laik stadi wantaim em long Baibel na long dispela rot ol i bin kirapim Baibel-stadi. Inap tupela o 3-pela taim samting Witnes i tokim wanpela man long kisim buk samting, tasol man i no laik kisim, tasol taim Witnes i tokim em, em i laik stadi wantaim em long Baibel, man i amamas long stadi long Baibel. Em i tok: “Longtaim pinis mi laik stadi long Baibel.” Witnes i kirapim Baibel-stadi wantaim em na famili olgeta i kisim kwik save.
2 Yumi olgeta i mas tingting long kirapim ol man long stadi long Baibel. Sapos man i laik kamap disaipel bilong Krais em i mas i gat narapela bilong lainim em. (Mt 28:19, 20) Bilong mekim olsem, narapela i mas stadi wantaim em long Baibel. Sampela Witnes i save tokim man bilong haus ol i laik helpim em long save long pasin bilong kisim sampela save moa long Baibel na ol tok promis bilong God, na long dispela rot ol i bin kirapim planti Baibel-stadi. Wanpela brata i kirapim 5-pela stadi long liklik nius Gutpela Sindaun Long Nupela Taim. Em i no inap stadi wantaim planti man olsem long olgeta wik, olsem na em i givim ol dispela stadi long ol narapela pablisa.
3 Sapos i no hatwok long yumi long kirapim Baibel-stadi, orait yumi ken kisim ol narapela pablisa i go wantaim yumi na helpim ol tu long kirapim Baibel-stadi. O sampela stadi yumi kirapim pinis yumi ken givim long ol narapela long kongrigesen. Sapos yu gat laik long mekim Baibel-stadi, orait taim yu autim tok long ol man long haus, traim tokim ol yu laik stadi wantaim ol long Baibel. Wanpela pablisa i mekim gobek long wanpela yangpela meri em i no givim bel tumas long harim tok. Tasol pablisa i tokim em, em i laik stadi wantaim em long Baibel na em i tok, em i laik. Nau em i baptais pinis na brata bilong em na man bilong em, ol tu i go long ol miting.—Ga 6:6.
4 I no olsem olgeta man yumi kirapim Baibel-stadi wantaim ol bai stap gut long stadi. Nogat. Na i no olsem olgeta man i stadi long Baibel bai kam insait long tok i tru. Tasol sampela bai mekim. Sapos yumi kirapim planti Baibel-stadi, orait long dispela rot bai yumi inap helpim planti long kam insait long lain bilong Jehova na litimapim nem bilong em.
[Ol Askim]
1. Kolim wanpela rot bilong kirapim Baibel-stadi. Wanem samting i kamapim klia olsem dispela i gutpela rot bilong kirapim Baibel-stadi?
2. (a) Wanem skripsa i makim olsem yumi mas mekim Baibel-stadi wantaim man? (b) Bilong wanem i bikpela samting yumi stadi wantaim em long Baibel?
3. Kaunim Galesia 6:6. Yumi ken mekim wanem bilong kirapim Baibel-stadi?
4. Wanem samting bai strongim yumi long mekim yet wok bilong kirapim Baibel-stadi, maski sampela i no kam insait long tok i tru.
This article is repeated in km 9/97.