Askim

◼ Wasman bilong wok autim tok i ken mekim wanem bilong bosim wok bilong ol wokman bilong kongrigesen em ol i gat wok long lukautim ol magasin na buk samting?

Wanpela taim long olgeta mun wasman bilong wok autim tok i save go lukim ol Buk-Stadi na em i stretim gut taim na ples bilong mekim bung bilong i go autim tok. Na tu, dispela elda i save givim bel long helpim kongrigesen long mekim ol samting na bai wok autim tok long teritori bilong ol i kamap gutpela.

Bai em i toktok wantaim ol brata i lukautim ol magasin na buk samting na tingim ol magasin na buk samting i stap olsem Wok Kingdom i makim, em inap o nogat, na ol dispela buk na magasin i no bruk na i gutpela bilong tilim. Bilong mekim olsem em i bosim planti wok bilong ol wokman bilong kongrigesen em ol i gat wok long lukautim ol magasin na buk samting.

Wasman bilong wok autim tok i lukim ol toksave long Wok Kingdom na tingim wanem ol buk samting Wok Kingdom i makim bilong tilim long bihain. Em wantaim brata i lukautim ol buk samting ol i wok gut wantaim na bai ol i oda long ol buk samting inap long kongrigesen, tasol ol i no ken oda long planti tumas. Long namba wan taim bilong tilim nupela buk, o sapos liklik taim na kongrigesen bai mekim wok long wanpela buk long Buk-Stadi, orait, ating ol i mas oda long planti liklik. Sapos bipo kongrigesen i bin tilim dispela buk, yu ken lukim ripot bilong dispela buk na bai yu inap save ol buk inap o nogat. Taim yu laik save hamas ol buk samting yu mas oda long en, tingim hamas pablisa bilong kongrigesen, na hamas painia haptaim na painia oltaim i stap. Ol i mas inap long kisim ol buk na magasin paslain long miting na bihain long miting. Lukautim gut ol katon i gat buk samting long en​—⁠nogut ol buk i bagarap.

Na wasman bilong wok autim tok bai toktok gut wantaim brata i lukautim ol magasin. Sampela taim dispela tupela brata i ken skelim hamas magasin kongrigesen i save kisim na hamas magasin ol pablisa i save tilim, nogut ol i sot, na nogut i gat planti tumas. Ating sampela pablisa i mas sotim oda bilong ol. Na nogut ol pablisa i putim nating i stap long haus bilong ol na ol i no mekim wok long en.

Wasman bilong wok autim tok i mas tingim ol dispela tok na em yet i mas skelim hamas ol buk samting kongrigesen i laik oda long en long pepa S-AB-14 (Literature Order). Em i ken givim dispela pepa long kuskus, na kuskus i ken lukim ol narapela tok long dispela pepa, i stret o nogat, olsem ol buk samting i gat lo bilong baim kwik.

Ol brata i lukautim ol buk na magasin ol i save raitim ol tok long sampela pepa, na sapos ol i laik save ol i raitim stret o nogat, kuskus i ken helpim ol.