Ol Wasman i Go Pas Long Wok—Wasman Bilong Wok Autim Tok
1 Wasman bilong wok autim tok i save lukautim na stretim olgeta samting i insait long wok bilong autim tok bambai wok autim tok long ol teritori bilong kongrigesen i ken kamap gutpela. Olsem na em i save mekim bikpela wok tru bilong helpim yumi long mekim gut wok bilong yumi bilong autim gutnius. Em wanpela man bilong givim bel long autim tok, olsem na em i save go pas long ol samting bilong mekim wok autim tok. Em i wanpela gutpela tisa, olsem na em inap helpim olgeta wan wan pablisa long kamap gutpela moa long mekim wok autim tok.—Ef 4:11, 12.
2 Wasman bilong wok autim tok i bosim wok bilong ol wokman i lukautim ol litresa, ol magasin, na ol teritori. Em i gat wok long stretim ol samting bambai long olgeta mun i mas i gat planti buk, na magasin, na fom samting bilong mekim wok long en. Wanpela taim long olgeta yia, em i save lukim fail bilong teritori i gat lista bilong olgeta haus em ol man i bin tok ol i no laik bai yumi go lukim ol, na em i save makim sampela brata i gat save long mekim gut dispela kain wok long i go lukim ol dispela man.
3 Em wok bilong wasman bilong wok autim tok long bosim ol narapela narapela wok bilong autim tok, olsem autim tok long ol ples bisnis, long ol rot, o long rot bilong telefon. Em i stretim ol samting bilong mekim wok autim tok namel long wik, na tu long taim bilong ol bikpela de bilong malolo. Em i save tingim tru wok bilong mekim ol Baibel-stadi. Em i save painim rot bilong helpim ol pablisa i slek o i lusim wok autim tok, bambai ol i ken kamap strong long ol samting bilong spirit. Em i tingim tru ol wok ol painia i mekim, na em i save lukautim wok, “Ol Painia i Helpim Ol Narapela.”
4 Em i insait tu long Komiti Bilong Lukautim Wok Bilong Kongrigesen, olsem na sapos i mas i gat sampela senis insait long ol grup bilong Buk-stadi Bilong Kongrigesen, bai em i tokim ol long ol i ken mekim wanem. Yu mas kam long Buk-stadi long taim em i kam lukim grup bilong yupela, na autim tok wantaim em.
5 Olgeta insait long kongrigesen i mas i gat laik long bihainim gut ol tok wasman bilong wok autim tok i givim long ol. Sapos yumi mekim olsem, wok bilong yumi long kamapim ol disaipel bai kamap gutpela na bai yumi kisim bikpela amamas long mekim wok autim tok.