Ol Painia i Helpim Ol Narapela

¹ Jisas i tok: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i ken salim ol wokman i go bungim kaikai bilong en.” Long taim bilong ol aposel, ol man bilong kisim kaikai, olsem autim tok, ol i no planti, na i gat planti hap ol i mas autim tok long en, olsem na Jisas inap salim ol i go wanpela wanpela bambai ol inap autim gutnius long planti man moa. Tasol em i no mekim olsem, em i bin “salim ol i go tupela tupela.” (Lu 10:​1, 2) Bilong wanem em i salim ol tupela tupela?

² Ol disaipel i nupela long wok, na ol i no gat bikpela save. Taim ol i wok tupela tupela olsem, narapela inap lainim na strongim narapela. Olsem Solomon i tok, “sapos tupela man i stap wantaim, em i gutpela.” (Sav 4:​9, 10) Maski God i kapsaitim spirit holi long Pentikos long yia 33 C.E., bihain long en Pol, Barnabas, na sampela moa, ol tu i bin wok wantaim ol narapela wanbilip bilong ol long autim tok. (Ap 15:35) Long sampela em ol i bin kisim helpim long ol kain man i gat bikpela save long mekim wok, ating em wanpela gutpela samting tru long ol!

³ Wanpela Gutpela Rot Bilong Lainim Wok: Wankain olsem bipo, lain Kristen long nau i wanpela oganaisesen bilong mekim wok autim tok. Na tu, dispela oganaisesen i save skulim yumi long mekim wok. Yumi wan wan i mas i gat bikpela laik long mekim gut wok bilong autim gutnius. Bilong helpim planti moa pablisa long kamap gutpela moa long mekim wok autim tok, Sosaiti i redim wanpela rot bilong helpim ol.

⁴ Long Skul Bilong Wok Kingdom i no longtaim i go pinis, Sosaiti i bin toksave long wanpela wok em ol painia bai mekim bilong helpim ol narapela long wok autim tok. Olsem wanem? I gat wok long mekim olsem? Yes, i gat. Insait long 3-pela yia i go pinis, winim wan milion pablisa i bin kisim baptais, na planti bilong ol i mas kisim helpim bilong kamap gutpela moa long mekim wok autim tok. Husat inap helpim ol long mekim olsem?

⁵ Ol painia inap helpim ol. Oganaisesen bilong Jehova i save givim planti gutpela tok bilong skulim ol. Long Skul Bilong Wok Painia, inap tupela wik ol painia i save kisim skul i stret bilong helpim ol wan wan. Ol i save kisim sampela gutpela tok taim ol i bung wantaim wasman sekit na wasman distrik, na tu ol elda i save givim sampela gutpela tok bilong helpim ol. Tru, i no olgeta painia i gat bikpela save olsem Pol na Barnabas, tasol ol i bin lainim sampela gutpela samting em ol i amamas long skulim ol narapela long en.

⁶ Husat Bai Kisim Dispela Helpim? Olsem wanem? Ol nupela pablisa o ol pablisa i baptais nupela, ol tasol i mas kisim dispela helpim? Nogat! I gat ol yangpela na ol lapun em ol i bin stap long tok i tru inap sampela yia pinis, tasol ol bai amamas long kisim sampela save bilong helpim ol long mekim gut sampela hap bilong wok bilong autim tok. Sampela i save mekim gutpela wok bilong tilim ol buk na nius samting, tasol ol i no save gut long mekim ol gobek na kirapim ol Baibel-stadi. Sampela i no hatwok long kirapim ol Baibel-stadi, tasol ol i luksave olsem ol sumatin bilong ol i no kamap strong hariap. Wanem samting i pasim ol sumatin long kamap strong? Ating ol painia i gat save ol inap helpim ol brata sista long ol dispela samting. Sampela painia i save mekim gutpela wok bilong helpim ol man long harim tok, kirapim Baibel-stadi, na stiaim ol sumatin i kam long oganaisesen. Save bilong ol dispela painia bai helpim gut ol pablisa i insait long dispela nupela program.

⁷ Olsem wanem? Sampela wok i mekim na yu no save insait long ol bung bilong wok autim tok bilong kongrigesen olsem yu laik mekim? Wanpela painia inap wok wantaim yu long taim ol narapela pablisa i no stap.

⁸ Mas Wok Gut Wantaim: Tupela taim long wanpela yia, ol elda bai stretim rot bambai ol pablisa i gat laik long ol painia i ken helpim ol, ol i ken insait long dispela program, Ol Painia i Helpim Ol Narapela. Sapos yu orait long wanpela i helpim yu, bung wantaim painia ol i bin makim bilong helpim yu na bai yutupela i wokim wanpela gutpela sedyul bilong mekim wok autim tok, na yupela i mas bihainim gut ol tok yutupela i pasim. Taim yutupela i wok wantaim, bihainim ol gutpela rot bilong mekim gut wok bilong autim gutnius. Skelim bilong wanem sampela pasin bilong mekim wok autim tok inap kamapim gutpela samting. Tingim ol gutpela tok painia i givim yu bilong helpim yu long mekim wok bilong yu i kamap gutpela moa. Taim yu wok long bihainim ol tok yu lainim, wok bilong yu bai kamap gutpela, na yu yet na ol narapela inap luksave long en. (Lukim 1 Timoti 4:​15.) Planti taim liklik yutupela i mas wok wantaim, na insait long kain kain rot bilong wok autim tok, olsem autim tok long kain kain taim na ples, tasol tingting strong long lainim wok em yu yet i mas kamap gutpela moa long en.

⁹ Wasman bilong wok autim tok i amamas long lukim yupela i kamap strong. Sampela taim em bai toktok wantaim wasman bilong Buk-Stadi Bilong Kongrigesen bilong save dispela skul i wok long helpim yu o nogat. Wasman sekit tu bai helpim yu taim em i kam lukim kongrigesen.

¹⁰ Jehova i laik bai ol manmeri bilong em i mas lain na “redi long mekim olgeta kain gutpela wok.” (2 Ti 3:17) Tingim dispela program, Ol Painia i Helpim Ol Narapela i olsem wanpela gutpela rot tru bilong helpim ol pablisa em ol i gat laik long kamap gutpela moa long mekim wok autim tok. Sapos yu insait long dispela gutpela wok, yu mas tenkyu na amamas na bihainim pasin daun.