Askim

◼ Yumi ken skelim wanem ol samting bilong save sapos yumi inap lusim buk o nius long man o nogat?

Bikpela samting yumi mas skelim em olsem man i gat laik long harim tok o nogat. Sapos em i amamas long harim tok na em i gat laik long kisim save, orait yumi ken lusim 2-pela magasin, o buklet, o buk long em. I stret long mekim olsem maski yumi luksave olsem em i no gat mani o em i gat mani bilong givim olsem kontribiusen bilong helpim wok long olgeta hap. (Jop 34:19; Rev. 22:17) Tasol yumi no laik lusim nating ol gutpela buk na nius bilong yumi long ol man husat i no gat laik long harim tok.—Mat. 7:6.

Olsem wanem yumi ken save man bilong haus i gat laik long harim tok? Sapos em i amamas long toktok wantaim yumi. Na em i putim gut yau taim yumi toktok, bekim ol askim, na kamapim tingting bilong em long samting yumi stori long en, dispela i soim olsem em i amamas long toktok wantaim yumi. Taim yumi ritim ol skripsa na em i putim gut yau dispela i soim olsem em i gat rispek long Baibel. Na tu i gutpela long askim man olsem em bai ritim nius yumi tilim long em o nogat. Ol pablisa i mas skelim gut olsem man i gat laik long harim tok o nogat. Olsem: Taim yumi autim tok long rot, yumi no ken givim nating magasin, o buklet, o buk long ol man i go i kam. Sapos i hatwok long luksave olsem man i gat laik long harim tok, orait yumi ken givim em liklik nius.

Olsem tasol pablisa i mas kisim ol buk na nius inap long em bai mekim wok long en long autim tok, na i no long hamas kontribiusen em i gat long putim, nogat. Ol kontribiusen em ol man i givim i no bilong baim ol buk na nius, nogat, em i bilong helpim olgeta wok bilong autim tok long olgeta hap bilong graun. Maski yumi maniman o rabisman, pasin bilong pilim tru ol gutpela samting yumi kisim long Jehova bai kirapim yumi long givim olgeta samting yumi inap givim bilong sapotim wok bilong Kingdom, na yumi no givim sampela samting tasol. (Mak 12:41-44; 2 Kor. 9:7) Na tu, dispela bai kirapim yumi long kisim tasol ol buk na nius inap long yumi mekim wok long en, na yumi no kisim planti na westim mani em Sosaiti i bin tromoi bilong wokim ol buk na nius.

[Rait long pes 3]

Ol pablisa i mas skelim gut olsem man i gat laik long harim tok o nogat