Mekim Gutpela Wok Long Ol Buk na Nius Bilong Yumi
1 “Mi bin kirap ritim ol buk na nius bilong yupela kirap long 1965. Mi save skelim wantaim Baibel taim mi ritim, na olgeta tok i stap long ol buk na nius bilong yupela i stret wantaim tok bilong Baibel. Mi gat laik long kisim save long God na Jisas, na mi ken tok tru olsem mi wok long painim bekim bilong ol askim bilong mi long rot bilong ol buk na nius bilong yupela na Baibel.” Em ol tok bilong wanpela man husat i bin salim pas long hetkota bilong ol Witnes Bilong Jehova. Long dispela pas em i askim long stadi long Baibel.
2 Olsem dispela man, planti milion manmeri long olgeta hap i laikim tru ol buk samting bilong Baibel em lain “wokboi i gat gutpela tingting” i save redim. (Mt. 24:45) Long olgeta yia, ol i save wokim planti buk na nius bilong helpim ol man i gat gutpela bel na “bai ol i ken save long as bilong tok tru.” (1 Ti. 2:4) Olsem wanem yumi ken mekim gutpela wok long ol buk na nius bilong Baibel?
3 Kisim Inap Long Skel: Sapos yumi wok long kisim planti buk na nius, ating bai yumi no inap tilim olgeta. Yumi inap mekim wanem na bai yumi no kisim planti buk na nius na larim i stap nating? Yumi mas bihainim savepasin taim yumi kisim ol buk na nius. Yumi no ken kisim planti kopi bilong wanpela buk o nius bilong tilim, i gutpela yumi kisim wanpela o tupela tasol na taim yumi tilim pinis orait yumi ken kisim sampela moa. Long dispela rot yumi no inap larim ol buk o nius i hip i stap nating long haus. Na i wankain tu long ol magasin, sapos yumi gat planti i stap long haus em yumi no bin tilim, orait i gutpela yumi daunim namba bilong oda bilong yumi.
4 Planti Tumas Buk na Nius: Sapos kongrigesen i gat planti buk samting, orait litresa kodineta i mas sekim narapela kongrigesen i stap klostu, sapos ol i no gat orait ol i ken givim ol. Na tu, wasman sekit inap helpim long tilim ol buk na nius long ol narapela kongrigesen o grup i stap long sekit bilong em. Ol pablisa i ken tilim ol olpela buk samting long famili bilong ol, ol Baibel sumatin, na ol narapela. Ating ol nupela lain i bung wantaim kongrigesen ol bai i gat laik long kisim ol olpela nius bilong putim long laibreri bilong ol.
5 Yumi laik bai ol buk na nius bilong yumi i inapim wok bilong ol, em long helpim ol man i gat gutpela bel long kisim save long ol gutpela samting Jehova bai kamapim. Taim Jisas i wokim mirakel na givim kaikai long ol man, em i no bin larim hap kaikai i stap nating. Olsem tasol yumi tu i mas mekim gutpela wok long ol buk samting bilong Baibel em yumi kisim. (Jo. 6:11-13) Ol buk na nius bilong yumi i gat tok em inap helpim man long kisim laip. Tasol ol dispela tok i no inap helpim ol man sapos yumi larim ol i stap tasol long haus o long bek bilong yumi. Olsem na yumi mas bihainim savepasin taim yumi kisim ol buk na nius bilong tilim na mekim gutpela wok long en bilong helpim ol narapela.
[Askim Bilong Stadi]
1, 2. Planti manmeri i gat wanem tingting long ol buk na nius bilong yumi? Dispela i kamapim wanem askim?
3. Yumi ken mekim wanem na bai yumi kisim ol buk na nius inap long skel?
4. Sapos wanpela kongrigesen i gat planti buk samting, orait ol i ken mekim wanem?
5. Olsem wanem yumi ken soim olsem yumi laikim ol buk na nius bilong yumi?
This article is repeated in km 5/06, km 6/08.