Tilim Ol Buk na Nius na Kisim Kontribusen Tasol
1 Wok bilong tilim ol buk na nius samting na ol man bai givim mani long laik bilong ol yet tasol em bai kamap gutpela long Papua Niugini o nogat? Long planti kantri i bihainim dispela pasin, ol ripot i kamapim olsem ol i bin tilim planti buk na nius na sabskripsen samting. Mipela i bilip olsem dispela senis inap helpim tru ol man long teritori bilong yumi na bai planti man moa i gat rot long “kam na kisim wara bilong givim laip, em i olsem presen bilong God.”—KTH 22:17.
SAMPELA SAMTING BILONG TINGIM
2 Tasol yumi no laik givim nating nating ol buk na nius bilong yumi long ol man. Yumi save mekim gut wok long ol samting bilong yumi yet, olsem tasol olgeta wan wan pablisa i mas mekim gut wok long ol buk na nius ol i kisim long Sosaiti long rot bilong kongrigesen na Sosaiti i no singaut long pe bilong en. Tasol dispela i no makim olsem Sosaiti i no save lusim sampela mani bilong wokim ol dispela buk na nius na salim ol i go long olgeta hap. Yumi olgeta i mas pilim tru ol gutpela tok bilong ol buk na nius bilong helpim ol man i gat gutpela bel long kisim stretpela save long God Jehova na Pikinini bilong em Krais Jisas.—Jo 17:3.
3 Olsem wanem Sosaiti inap givim ol buk na nius long ol man na yumi no singaut long pe bilong en? Ol manmeri i save givim kontribusen bilong baim ol samting bilong wokim ol buk na nius na bilong salim ol i go long olgeta hap. Ol wokman bilong Jehova i dediket pinis, ol i nambawan lain bilong givim kontribusen bilong helpim dispela wok. Ol Witnes Bilong Jehova i no bin askim ol narapela manmeri long helpim ol long mekim dispela bikpela wok bilong autim tok bilong Kingdom. Long bipo na long nau tu, yumi no bin singaut long mani long ol narapela man bilong helpim wok bilong yumi. Tasol yumi amamas long kisim liklik kontribusen em ol man i gat laik tru long harim tok na ol man i pilim tru wok yumi mekim ol i givim long yumi long taim yumi autim tok. Olsem na i stret yumi mas redi long stori liklik long olsem wanem ol manmeri long olgeta hap i save givim sampela mani long laik bilong ol yet bilong helpim dispela wok.
OL KONTRIBUSEN I MEKIM WANEM WOK
4 Olgeta kontribusen Sosaiti i kisim, Sosaiti i save mekim wok long en bilong baim ol samting bilong mekim wok bilong autim tok bilong Kingdom nau long taim bilong yumi. Sosaiti i save wokim ol buk na nius samting na salim ol i go long olgeta hap, na tu, Sosaiti i save lukautim ol brens-ofis, ol haus Betel, skul bilong ol misineri na skul bilong lukautim wok bilong kongrigesen, ol misineri na painia salim, ol wasman bilong raun, na planti narapela samting i inapim wok Jisas i bin givim ol disaipel bilong em long mekim.—Mt 24:14; 28:19, 20.
5 Planti pablisa na famili bilong ol i save redim sampela mani long olgeta wik o mun bilong givim kontribusen bilong helpim wok autim tok long olgeta hap. (Skelim wantaim 1 Korin 16:1, 2.) Long dispela rot yumi helpim olgeta wok bilong Sosaiti, na wok bilong tilim ol buk na nius samting tu. Yumi no ken ting ol kontribusen yumi givim long laik bilong yumi yet bilong helpim wok bilong Sosaiti long olgeta hap i olsem pe bilong baim ol buk na nius samting.
6 Dispela nupela pasin bilong givim kontribusen tasol taim yumi kisim ol buk na nius samting i helpim olgeta man long save olsem wok bilong yumi long skulim ol manmeri long Baibel em i no wanpela wok bisnis. Em i save helpim yumi tu long tingim tru wok bilong autim gutnius bilong Kingdom na kamapim ol disaipel bilong Krais Jisas. Ol Witnes Bilong Jehova i narapela kain long ol narapela oganaisesen em ol i singaut singaut long mani bilong mekim sampela gutpela wok. Yumi laik bai olgeta manmeri i ken ritim ol buk na nius bilong yumi na ol i ken givim mani long laik bilong ol yet. Yumi no save askim ol man i no amamas long harim tok bilong yumi long givim mani long yumi bilong helpim wok bilong autim tok long olgeta hap. (Lukim Wastaua (tok Inglis), Disemba 1, 1990, p. 22, 23.) Sosaiti i save mekim wok long olgeta kontribusen bilong helpim wok bilong skulim ol manmeri long Baibel long olgeta hap. Olgeta wokman long oganaisesen ol i wok volantia na ol i no kisim pe o sampela kain winmani. Taim ol man i askim yumi o ol i kamapim olsem ol i amamas long wok bilong yumi, orait yumi ken stori wantaim ol dispela man tasol long pasin bilong givim kontribusen bilong helpim wok bilong autim tok long olgeta hap.
SKELIM GUT
7 Taim yumi go lukim ol man bilong haus na ol narapela bilong autim tok long ol, yumi mas redi long toktok wantaim ol long wanpela tok bilong Baibel. Sapos man i amamas long harim tok bilong Kingdom, orait pablisa i ken skelim olsem em bai tilim wanem buk o nius samting long em. Sapos yu lukim olsem man i no amamas tumas long harim tok na yu ting i no gutpela as long tilim wanpela buk o nius samting long em, orait long gutpela pasin yu ken pinisim toktok na i go long narapela haus. O yu ken lusim wanpela pepa bilong singautim ol man i kam long ol miting o wanpela liklik nius wantaim em sapos em i tok promis long ritim. No ken lusim tingting long raitim nem bilong ol man i amamas long harim tok bambai yu ken go bek lukim ol. Taim yumi bungim wanpela man i gat planti wok o yumi go lukim wanpela man long taim i no stret long em, orait yumi ken mekim olsem tu.
8 Taim yumi wok strong long mekim wok autim tok i go bikpela, na mekim gut wok long ol gutpela buk na nius samting bilong Sosaiti, Jehova bai wok yet long mekim wok bilong yumi i kamap bikpela. Taim yumi kamapim gut, i gat wanem as bilong wok autim tok bilong yumi, ol gutpela manmeri long olgeta hap ol i amamas long dispela na ol bai amamas long givim sampela mani long laik bilong ol yet bilong helpim wok bilong yumi.