Askim

● Long olgeta taim yumi go lukim ol man, yumi mas tokim ol olsem yumi amamas long kisim kontribusen bilong helpim wok bilong Sosaiti long olgeta hap, o nogat?

 Nogat. Wanpela stori long Wok Kingdom bilong Ogas 1999 em i gat het-tok, “Bihainim Savepasin Long Tilim Ol Buk na Nius Bilong Yumi,” em i tok: “Sampela taim, ating bai i no gutpela tumas long toktok long pasin bilong givim kontribusen bilong helpim wok long olgeta hap.” Yumi mas tingting gut taim yumi laik toktok long dispela. Yumi laik bai ol man i save gut olsem yumi mekim tru wok bilong skulim ol man long Baibel na yumi no wok bisnis. Olsem na yumi no singaut singaut long mani. Tingim sampela tok hia.

 Long namba wan taim yumi tilim ol buk na nius long ol man i amamas long harim tok, i gutpela yumi stori gut olsem ol man i save givim mani long laik bilong ol yet bilong helpim wok bilong yumi. Sapos yumi tingim gut olsem yumi mas tilim ol buk na nius long ol man i laik harim tok o long ol man i tok ol i laik kaunim ol buk na nius bilong yumi, orait ol i save pinis long dispela samting.

 Sampela man i harim tok ol i laik givim mani long laik bilong ol yet taim yumi go lukim ol gen. Ating sampela narapela bai askim yu long pe bilong wanpela buk samting. Yu ken mekim sotpela tok olsem wok bilong yumi i no olsem wok bisnis, na yu ken stori olsem yumi tilim ol buk na nius long ol man i laik harim tok na yumi no singaut long pe. Na tu, yu ken tokim ol, man i laik helpim dispela wok long olgeta hap, em i ken givim sampela mani long laik bilong em yet. Sapos man yumi mekim gobek long em i no mekim olsem, orait, stori gen long em long pasin bilong givim mani long laik bilong em yet long helpim wok bilong Sosaiti long olgeta hap.

 Yumi mas tingim gut olsem maski yumi no singaut long pe taim yumi tilim ol buk na nius long ol man i laik harim tok, Sosaiti i tromoi bikpela mani bilong wokim ol buk na nius bilong yumi na salim ol i kam. Yumi bilip olsem spirit bilong Jehova bai kirapim ol wokman bilong em na ol man long teritori i laik harim tok, long givim kontribusen bilong inapim pe bilong olgeta samting bilong dispela wok long olgeta hap.