Planim Pikinini Kaikai na Givim Wara Long En—Em Rot Bilong Kamapim Ol Disaipel
(Namba 1 Hap)
1 “Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap.” (1 Ko 3:6) Aposel Pol i kolim 3-pela hap wok bilong kamapim ol disaipel bilong Krais. Namba wan hap wok em wok bilong planim pikinini kaikai, na namba 2 hap wok em wok bilong givim wara long en, na tupela hap wok hia em i wanpela bikpela wok em ol wokboi bilong God i dediket na baptais pinis ol i mas mekim, na ol i mas ting olsem em i wanpela gutpela samting tru God i givim long ol.
2 Olsem na yumi mas autim tok long ol man long haus na long kain kain taim na ples na long ol narapela rot. Na isi isi yumi mas lainim ol man long bihainim olgeta tok Jisas i givim long yumi. (Mt 28:19, 20) Bilong mekim olsem yumi mas i go bek lukim ol man i laik harim tok, na yumi mas toktok gut wantaim ol long ol tok bilong Baibel, na stadi Baibel wantaim ol. Orait, olsem wanem long yu? Ol samting yu mekim i makim olsem yu kamap wanwok bilong Jehova i stap gut long em? Olsem: Yu save wok gut wantaim Jehova long wok bilong planim tok i tru long bel bilong man na go bek lukim em gen bilong givim wara long em na lukautim gut em?—1 Ko 3:9.
3 Pasin bilong laikim tru ol man i harim tok bilong Kingdom i mas kirapim yumi long stadi Baibel wantaim ol. Olsem Jehova, yumi tu mas tingim gut ol man na save olsem ol i mas kamap strong long ol samting bilong spirit bambai ol inap kisim laip oltaim. (1 Pi 2:2) Ol kaikai long gaden i mas i gat wara bambai ol inap kamap bikpela, na i wankain tu long ol man i harim tok bilong Kingdom long namba wan o namba 2 taim samting. Ating bai ol yet i no kirap long kam long ol miting bilong yumi—yumi mas stadi Baibel wantaim ol na olgeta taim stiaim ol i go long oganaisesen bilong God, na long dispela rot bai ol i kirap long i kam long ol miting.
4 Yumi tu yumi mas bihainim tok. Jisas i tok, olgeta man i bihainim tok i tru ol i save harim tok bilong em. (Jo 18:37) Em i tokim ol disaipel bilong em long ol i mas autim tok na lainim ol man, na em i skulim ol long mekim dispela wok. Jisas em i gutpela tisa na em i save tingim gut ol man na helpim gut ol, olsem na em i makim gutpela rot yumi ken bihainim bilong helpim ol narapela man. (Lu 6:40; Jo 13:13; 14:12) Sapos yumi mekim olsem, dispela inap helpim yumi yet wantaim ol Baibel-stadi bilong yumi long kisim laip oltaim.—1 Ti 4:16.
OL SAMTING BILONG HELPIM YUMI LONG KIRAPIM OL BAIBEL-STADI
5 Man bilong wokim ol samting olsem kamda samting i gat kain kain tul bilong mekim wok bilong em, tasol sapos em i laik mekim gut dispela wok, em i mas kisim ol tul i stret long mekim. Na i wankain tu long yumi ol tisa, yumi gat planti kain kain buk na buklet na liklik nius samting i olsem tul bilong helpim yumi long mekim gut dispela wok bilong putim tok i tru i go daun long bel bilong man, em ol i bilong kain kain sindaun na kain kain tingting.
6 Sampela pablisa i bin mekim gutpela wok long ol buklet na liklik nius bilong kirapim tok bilong Baibel, olsem: Liklik nius Gutpela Sindaun long Nupela Taim i gat 20 skripsa samting i stori long dispela nupela taim yumi wetim i kamap long bihain. Yumi ken mekim wok long ol dispela skripsa bilong kirapim tingting bilong man bilong haus na bai em i amamas long toktok wantaim yumi long tok bilong Baibel. Na ol buklet bilong yumi i gat planti gutpela piksa i gat kala kala na dispela i gutpela long pulim ai bilong man na em i amamas long lukim, na long dispela rot em inap kisim save long ol as tok bilong Baibel na bai em i gat laik long kisim sampela save moa.
7 Olsem wanem? Yu save long sampela man i no save gut long rit rait o ol i ai nogut? Yu traim pinis long mekim wok long buklet Stap Amamas na bai rot i op bilong yu ken toktok wantaim dispela kain man long tok bilong Baibel? Na yumi ken mekim wok long buklet “Harim!” tu, long wanem ol paragraf long kirap bilong buklet i gutpela tru bilong helpim man bilong haus long kisim save long ol samting God i tok promis long kamapim long bihain. Winim 1,700,000 manmeri i bin kisim baptais bihain long yia 1982, na buk Stap Oltaim ol i wokim long 1982 i bin mekim bikpela wok long helpim gut planti bilong dispela lain.
Planim Pikinini Kaikai na Givim Wara long En—Em Rot Bilong Kamapim Ol Disaipel
(Namba 2 Hap)
MEKIM GUT WOK BILONG YU LONG HELPIM GUT OL MAN I AMAMAS LONG HARIM TOK
1 Sapos yu laik save, yu bin helpim gut ol man long hap teritori bilong yu em ol i harim tok yu bin autim long ol, orait, yu mas lukim kat Ripot Bilong Pablisa (S-21) bilong yu (Congregation’s Publisher Record). Lukim hamas buk na buklet na magasin yu bin tilim insait long 12-pela mun i go pinis. Olsem wanem? Yu tilim ol buk samting na yu no mekim sampela wok moa long en? O yu bin go bek bilong givim wara long ol pikinini kaikai yu bin planim? Yu bin i go lukim gen hamas man bilong dispela lain ol i bin kisim sampela buk samting long yu? Yu bin i go bek lukim ol bambai yu inap save olsem dispela pikinini kaikai yu bin planim i kru o nogat? Yu bin go bek bilong givim wara long ol na bihain yu bin beten askim God long mekim ol i ‘kamap’?—Lukim Aposel 16:14 na 2 Tesalonaika 3:1.
2 Ating yu no mekim ol gobek, na yu no mekim wanpela Baibel-stadi, long wanem yu pilim olsem yu no inap long mekim dispela wok. Ating yu ting tasol yu no inap mekim, tasol yu inap. Jehova i givim dispela wok long lain bilong em, olsem na em bai inapim ol long mekim. Long rot bilong Baibel na oganaisesen bilong em, em i save redim yumi long mekim “olgeta kain gutpela wok.” (2 Ti 3:16, 17; 2 Ko 3:5, 6) Jehova i save inapim yumi long mekim dispela wok long ol kain rot olsem: spirit holi, na ol buk samting, na ol tok na soim i kamap long miting, na ol gutpela wokman i save gut long mekim wok ol i stap olsem gutpela piksa bilong yumi ken bihainim. Nogut yumi ting yumi mas winim bikpela skul olsem hai-skul samting bambai yumi inap mekim Baibel-stadi wantaim ol man. Nogat. Tasol yumi mas skul long ol samting bilong spirit em oganaisesen bilong Jehova i skulim yumi long en, em i winim ol skul bilong dispela graun.—Lukim Aposel 4:13.
3 Yu yet yu mas bihainim ol tok yu kisim long Wok Kingdom, na Skul Bilong Wok Autim Tok, na Miting Bilong Wok Autim Tok, na long ol narapela rot Jehova i skulim yu long en. Aposel Pol i tok stret long ol Kristen Hibru, olsem: “Yupela i kamap Kristen longpela taim pinis, na inap yupela i wok long skulim ol arapela long ol tok bilong God. Tasol nogat. Yupela i sot long tingting, na ol arapela man i mas skulim yupela gen long ol namba wan hap tru bilong tok bilong God.” (Hi 5:12) Sapos man i bin mekim wanpela wok olsem wok kamda samting inap planti yia pinis, ating em i save pinis long pasin bilong mekim gutpela wok long ol tul bilong em. Olsem tasol sapos yumi tingim gut man bilong haus na yumi wok strong long helpim gut em, dispela samting bai makim olsem yumi bin wok strong long lainim pasin bilong toktok gut wantaim man long ol tok bilong Baibel.—Snd 12:24; 22:29.
4 Taim yumi go bek lukim gen ol man i harim tok bilong Kingdom na yumi toktok moa wantaim ol long ol tok bilong Baibel, yumi mas lusim bikpela hap taim na strong bilong yumi. Tasol yumi mas save olsem, yumi stap insait long tok i tru long wanem Jehova i laikim tru yumi na em i marimari long yumi. Jehova i bin mekim olsem long rot bilong wanpela Witnes i bin lusim bikpela hap taim bilong em long helpim yumi, na long pasin isi em i bin lainim yumi long tok i tru. Olsem na pasin bilong laikim ol narapela i mas kirapim yumi long lusim bikpela hap taim liklik long mekim dispela bikpela wok bilong kamapim ol disaipel.—2 Ko 5:14, 15; Ef 5:15, 16.
5 Long hap i no gat planti raskol samting bilong bagarapim man, sampela kongrigesen i bihainim tok bilong Sosaiti na autim tok long apinun. Long apinun, taim i no tudak yet, em i gutpela taim bilong go bek lukim ol man i bin harim tok. Olsem na yumi mas i gat pepa bilong raitim nem na atres samting bilong ol dispela man, bambai yumi inap i go bek bilong kirapim tok bilong Baibel wantaim ol na bai ol i gat laik long harim sampela tok moa. Tasol yumi no ken putim dispela pepa namel long ol lip bilong wanpela buk o Baibel na yumi lusim tingting long en. Nogut yumi lusim tingting long i go bek lukim ol man na sampela wik bihain yumi raun gen long hap bilong ol, na nau yumi tingim gen ol. Yumi no ken mekim olsem, nogut ol wokman bilong Satan i go lukim ol. Ol wokman bilong Satan bai i amamas long tekewe ol gutpela tok yumi bin planim long bel bilong ol man. (Lu 8:12) Orait, olsem wanem long yu? Bai yu pasim dispela wok bilong Satan na kwiktaim go bek lukim gen ol dispela man? Sapos yu pilim tru dispela gutpela wok bilong yumi long helpim ol man, orait kwiktaim bai yu go bek lukim ol gen.—1 Ko 9:16, 23.
Planim Pikinini Kaikai na Givim Wara long En—Em Rot Bilong Kamapim Ol Disaipel
(Namba 3 Hap)
1 I no hatwok tumas bilong kirapim wanpela Baibel-stadi. Sapos yu askim ol man bilong haus ol i laik stadi Baibel wantaim yu, ating bai sampela i gat laik long mekim. Tasol sampela pablisa i ting i no gutpela long kolim dispela tok ‘stadi.’ Pastaim ol i save toktok gut wantaim ol man long sampela tok bilong Baibel bilong kirapim tingting bilong ol na bai ol i gat laik long stadi long Baibel.
2 Yu mas laikim tru ol man na yu mas i gat bikpela laik long helpim tru ol. Yu mas redi gut tu. Olsem na taim yu laik go bek lukim man, yu mas lukim gen ol samting yu bin raitim long not-buk bilong yu (o long pepa ol i kolim House-to-House Record), em ol samting yu bin toktok wantaim dispela man long en, na bai yu inap tingim wanem wanem tok yu laik kamapim long em. Tingim ol bikpela tok yu laik kamapim long em. Bai yu mekim wanem? Bai yu kamapim sampela skripsa moa bilong skruim ol tok yu bin toktok wantaim man long en bipo? O bai yu opim liklik nius o buk yu bin tilim long em na stori long sampela tok i stap long namba wan paragraf na namba 2 paragraf samting? Yu ken stori long ol samting em i bin amamas long harim long namba wan taim yu bin toktok wantaim em. Taim yu go bek lukim em long namba wan taim, toktok wantaim em inap 10 o 15 minit tasol. Na long namba 2 o namba 3 taim samting yu go bek lukim gen dispela man, orait yu ken pulim ol minit i go bikpela liklik inap long skel bilong em—em i gat bikpela laik long harim tok i tru o olsem wanem. Yu yet mas skelim gut ol samting na bai yu inap save long gutpela rot bilong helpim dispela man, na bai yu ken save tu long hamas minit i gutpela bilong i stap na toktok wantaim em.
3 Bilong mekim gutpela Baibel-stadi, gutpela sapos yu bihainim pasin em brata bilong lukautim Buk-Stadi i save mekim. Tasol Sosaiti i no makim hamas paragraf bilong mekim taim yu stadi wantaim man, olsem na yu yet yu mas makim hamas paragraf yu laik stadi long en inap long skel bilong dispela man. Na wasman bilong wok autim tok na ol pablisa na painia i save gut long pasin bilong mekim Baibel-stadi, ol bai amamas long i go wantaim yu bilong soim yu long pasin bilong mekim gutpela Baibel-stadi.
4 Yumi save olsem Jehova i mekim bikpela wok bilong helpim yumi long helpim ol narapela, olsem na yumi mas beten askim Jehova long helpim yumi long painim man i laik stadi Baibel wantaim yumi. Tasol yumi mas beten tu long Jehova i helpim ol nupela man yumi painim pinis na bai ol i ken kamap strong long tok i tru. Tingting bilong yumi i mas wankain olsem aposel Pol taim em i autim tok long King Agripa na em i tok: “Maski sotpela taim o longpela taim, mi [beten] long God olsem, yu wantaim ol dispela lain nau i harim tok bilong mi, yupela olgeta i ken kamap wankain olsem mi.” (Ap 26:29) Pol i gat laik long ol man i harim tok bilong em ol i kamap disaipel tru bilong Krais, maski em i mas helpim ol inap sotpela o longpela taim.
5 Wok bilong stadi Baibel wantaim ol man i helpim yumi long “pinisim dispela wok [yumi] bin kisim long Bikpela Jisas. Dispela wok em bilong autim tok long gutnius bilong marimari bilong God.” (Ap 20:24) Ating yumi inap helpim bikpela lain manmeri moa long lusim tudak na i kam long lait, na lusim strong bilong Satan na i kam long God. (Ap 26:18) Yu wokboi bilong Jehova i dediket na baptais pinis, yu mas mekim wok bilong planim tok i tru long bel bilong ol man na bihain givim wara long ol long rot bilong toktok wantaim ol long ol tok bilong Baibel na stadi wantaim ol long olgeta taim. Olsem na taim yu lukim ol Baibel-stadi bilong yu i wok long kamap disaipel na wok wantaim yu long helpim ol narapela i kamap disaipel bilong Krais, bai yu kisim bikpela amamas.
[Questions for Part 1]
1, 2. (a) Kolim 3-pela hap wok bilong kamapim ol disaipel? God i givim wok long husat bilong planim pikinini kaikai na givim wara long en? (b) Yumi olgeta wan wan i mas mekim wanem bilong makim olsem yumi stap wanwok bilong Jehova i stap gut long em?
3. (a) Olgeta wan wan i mas mekim wanem bambai ol inap kisim laip oltaim, olsem 1 Pita 2:2 i tok? Yumi ken mekim wanem bilong helpim ol? (b) Wanem samting i save kirapim ol man long i kam long ol miting long Haus Kingdom?
4. (a) Bilong bihainim tok bilong Jisas, yumi mas mekim wanem wok? (b) Kolim sampela tok bilong Baibel na yumi save Jisas i makim gutpela rot yumi ken bihainim bilong helpim ol narapela man.
5. Man bilong wokim ol samting olsem kamda samting na ol gutpela tisa i wankain olsem wanem?
6, 7. Ol gutpela tisa inap mekim gutpela wok long wanem ol samting? Wanem taim i gutpela long mekim wok long ol dispela samting?
[Questions for Part 2]
1. (a) Bilong wanem i gutpela sapos yumi olgeta wan wan i lukim kat Ripot Bilong Pablisa bilong yumi? (b) Lukim pinis, orait yu ken givim wanem ol askim long yu yet?
2. (a) Kaunim 2 Timoti 3:16, 17 na 2 Korin 3:5, 6. Kolim tupela samting Jehova i save givim long yumi bilong inapim yumi long helpim gut ol man i harim tok. (b) Yumi mas skul long wanem ol samting bambai yumi inap mekim gutpela wok autim tok na mekim Baibel-stadi? (c) Yumi no ken ting yumi mas kisim wanem kain skul bambai yumi ken mekim Baibel-stadi?
3. (a) Sapos man i bin mekim wanpela wok olsem wok kamda samting inap planti yia pinis, ating em i save pinis long wanem samting? (b) Tasol olsem wanem long ol Kristen Hibru? (c) Yumi mas mekim wanem na bai yumi no bihainim pasin bilong ol?
4. (a) Pasin bilong laikim ol narapela i mas kirapim yumi long mekim wanem? (b) Kaunim 2 Korin 5:14, 15. Krais Jisas i laikim tru yumi, olsem na em i redi long mekim wanem?
5. (a) Nogut yumi mekim wanem na bai yumi helpim wok bilong Satan, olsem Luk 8:12 i tok? (b) Pol i gat wanem tingting long wok bilong em long autim tok, olsem 1 Korin 9:16, 23 i tok?
[Questions for Part 3]
1, 2. (a) Ol pablisa i mas mekim wanem ol samting na bai ol inap mekim gutpela Baibel-stadi? (b) Bilong wanem ol pablisa i mas tingting gut taim ol i stadi Baibel wantaim man long namba wan o namba 2 taim samting?
3. Husat inap helpim yu long mekim gutpela Baibel-stadi?
4. (a) Taim Pol i mekim wok autim tok, em i gat wanem laik? (b) Yumi tingim ol nupela Baibel-stadi bilong yumi, na yumi mas beten askim Jehova long wanem samting?
5. (a) Ol wan wan pablisa i gat wanem wok? (b) Sapos yumi mekim gut dispela wok, bai yumi kisim wanem amamas?