Yumi Mas Kamap Tisa, Yumi No Ken Autim Tok Tasol
1 Wanpela saveman i bin tok olsem “ol Witnes Bilong Jehova i bin autim tok bilong ol long olgeta hap bilong graun.” Olsem wanem ol i bin mekim dispela wok? Ol i no inap long mekim dispela wok long strong bilong ol man, nogat. Ol i mekim long strong bilong spirit bilong God em i stap long ol wokman bilong em. Ol i mekim wok long ol samting God i redim pinis bilong helpim ol long mekim wok bilong ol long autim tok na lainim ol man.—Sek 4:6; Ap 1:8.
2 Ol buk na nius i gutpela samting bilong helpim yumi long mekim wok autim tok. Inap planti yia nau ol Witnes Bilong Jehova i bin wokim na tilim planti milion buk na buklet na nius samting bilong helpim ol man long save long gutnius bilong Kingdom. Ol ripot long yiabuk bilong 1997 i kamapim klia olsem ol i wokim planti planti buk na magasin, winim ol narapela yia bipo. Inap long nau ol i bin wokim 91 milion Baibel New World Translation. Insait long wanpela yia namba bilong ol Wastaua na Kirap! ol i wokim long Yunaitet Stets i go bikpela moa inap 7.1 pesen. Long Jemani namba bilong ol nius ol i wokim i go bikpela moa inap 35 pesen. Planti magasin (33 pesen) ol i bin wokim long Jemani ol i wokim long tok ples Rasia.
3 Bilong wanem ol i mas wokim planti buk na magasin olsem? Long olgeta hap bilong graun ol brata sista i bin bihainim tok olsem yumi mas autim tok long ol ples ol man i bung long en. Planti bilong yumi i mekim wok autim tok long planti hap moa olsem long ples bung na long rot na long ol stua na ofis, olsem na yumi tilim planti buk moa long ol man i harim tok. Planti bilong ol dispela man ol i no bin harim yet tok bilong Kingdom o ol i bin harim wan wan taim tasol. Bilong helpim ol man olsem, ol kongrigesen i gat ol narapela narapela buk bilong helpim yumi long autim tok long kain kain rot.
4 I Gat Wanem As na Yumi Tilim Ol Buk? Yumi no laik tilim ol buk na magasin long ol man na em tasol, nogat. Wok bilong kamapim disaipel i gat tupela hap bilong en—wok bilong autim tok na wok bilong skulim ol man. Namba wan wok em olsem: Yumi gat gutpela wok bilong autim gutnius bilong Kingdom na helpim ol man long save olsem dispela Kingdom tasol inap stretim ol hevi bilong ol man. (Mt 10:7; 24:14) Ol buk na magasin bilong yumi i kamapim ol tok bilong Baibel na ol i helpim ol man inap planti yia pinis, na ol i gutpela samting bilong kirapim ol man long harim tok bilong Kingdom na helpim ol long kisim save long en.
5 Namba tu wok em olsem: Sapos yumi laik kamapim ol disaipel, yumi mas skulim ol long ol tok bilong Jisas. (Mt 11:1; 28:19, 20) Ol buk na magasin i helpim yumi tru long planim tok i tru long bel bilong ol sumatin na helpim ol long kamap disaipel.
6 Ol man i kisim ol buk na magasin ating ol i ‘harim dispela tok,’ tasol ol bai i no inap bihainim sapos i no gat man bilong helpim ol. (Je 1:22-25) Sapos i no gat man bilong skulim ol, sampela tasol bai kamap disaipel. (Ap 8:30, 31) Ol i mas i gat wanpela tisa bilong helpim ol long save olsem tok i tru i stap long Baibel. (Ap 17:2, 3) Yumi laik helpim ol long kamap strong na bai ol i dediket na kisim baptais, na yumi laik lainim ol bambai ol inap tru long skulim ol narapela.—2 Ti 2:2.
7 Yumi Mas Kisim Sampela Tisa Moa: Taim yumi autim tok, yumi tokaut long gutnius long planti man. Tasol taim yumi skulim man yumi lainim em i go i go. Wok bilong autim tok i helpim ol man long harim tok bilong Kingdom, tasol wok bilong skulim man i helpim em long kisim na bihainim gutnius. (Lu 8:15) Wok bilong tisa em i no bilong autim tok tasol, nogat. Em i stori gut na kamapim tru as bilong tok na em i stori long ol samting i truim tok bilong em na em i kirapim ol narapela long bihainim tok.
8 Yumi olgeta i mas kamap tisa, yumi no ken autim tok tasol. (Hi 5:12a) Wok bilong tilim ol buk na magasin em i wanpela bikpela hap wok bilong yumi, tasol bilong inapim namba tu wok bilong yumi, yumi mas mekim wok tisa. Maski yumi amamas taim yumi tilim ol buk na magasin, tasol bilong mekim tru wok bilong yumi, yumi no ken ting wok bilong tilim ol buk na magasin em i as tru bilong wok bilong yumi. (2 Ti 4:5) Wok bilong tilim ol buk na magasin em i gutpela rot bilong kirapim wok bilong lainim ol narapela long tok i tru.
9 Mekim Ol Gobek Bilong Kirapim Ol Baibel-Stadi: Ating yumi olgeta i tilim pinis planti buk na buklet na nius samting, na yumi kisim nem bilong ol man yumi ken mekim gobek long ol. Long olgeta wik yumi mas makim taim bilong yumi ken go bek bilong kirapim ol man long harim sampela tok moa. Taim yumi mekim gobek, i no bilong tilim sampela buk moa, nogat; yumi laik strongim ol man long kaunim na kisim ol gutpela samting long ol buk ol i kisim pinis. Yumi ken tingim yumi yet. Sapos no gat man i bin mekim gobek planti taim bilong helpim yumi long kisim stretpela save, ating yumi no inap kamap strong long spirit, a?—Jo 17:3.
10 Mekim gobek long olgeta man i bin harim tok na tingting long kirapim Baibel-stadi wantaim ol long buklet God i Laik Yumi Mas Mekim Wanem? o long buk Save i Bringim Man Long Laip Oltaim. Dispela buklet na buk i kamapim tok bilong Kingdom na i no hatwok long ol man i kisim save long en. Buklet Yumi Mas Mekim Wanem? em wanpela gutpela stadi kos i kamapim ol bikpela as tok bilong Baibel. Buk Save inap helpim yumi long skulim gut ol man long tok i tru na lainim ol insait long liklik hap taim tasol.
11 Olsem pepa yumi kisim wantaim Wok Kingdom Bilong Yumi bilong Jun 1996 i stori long en, dispela pasin bilong skulim ol man insait long liklik hap taim tasol, bai helpim tisa long skulim gut sumatin na helpim sumatin long lain gut. Putim dispela pepa long wanpela hap na bai yu inap painim kwik taim yu laik lukim gen sampela pasin bilong skulim ol man, em ol brata i traim pinis na i bin kamapim gutpela wok. Sampela tok bilong dispela pepa i olsem: Olsem wanem yumi ken tingim ol stadi wan wan, long wanpela stadi yupela ken stadi long hamas tok, yu mas mekim wanem samting sapos sumatin i kamapim askim i no bilong dispela tok yupela stadi long en, olsem wanem tisa na sumatin i ken redim stadi, na olsem wanem yumi ken helpim sumatin long save long oganaisesen bilong Jehova. Taim yumi bihainim ol dispela tok, sampela moa bilong yumi, na ol nupela brata na sista tu, bai yumi inap lukautim ol Baibel-stadi long kamap strong.
12 Ol Ripot i Makim Olsem Wok i Kamap Gutpela: Buklet Yumi Mas Mekim Wanem? na buk Save i bin helpim yumi tru long hariapim wok bilong kamapim ol disaipel. Taim wanpela brata long Bolivia i kisim buklet Yumi Mas Mekim Wanem?, wantu tasol em i mekim wok long en na em i kirapim stadi wantaim wanpela man. Bihain long fopela mun tasol, dispela sumatin i stap namel long ol man i amamas long kisim baptais long kibung distrik.
13 Taim ol man i stadi pinis long buk Save, planti bilong ol i laik dediket long Jehova. Long wanpela kongrigesen long Angola, namba bilong ol Baibel-stadi ol pablisa i lukautim i kamap bikpela moa, pastaim ol i gat 190 Baibel-stadi na bihain 260. Namba bilong ol man i kam long ol miting tu i kamap bikpela moa olsem dabol, pastaim 180 i bung na fopela mun bihain long taim ol i kirap long mekim wok long buk Save long dispela hap, 360 i bung. Na i no longpela taim bihain, ol i mas kamapim wanpela nupela kongrigesen.
14 Taim wanpela brata i kirapim namba wan stadi bilong em long buk Save, em i tok wok bilong lukautim stadi em i “no hatwok sapos yu kamapim tasol ol askim, na kaunim sampela skripsa i stret, na yu skelim gut olsem sumatin i kisim gut save o nogat.” Maski pastaim em i ting olsem ol pablisa i gat gutpela save tru, ol tasol i ken lukautim ol Baibel-stadi i kamap strong, na em yet em i no inap mekim, tasol nau em i luksave olsem em tu inap mekim, na em i tok: “Sapos mi inap mekim, ol narapela tu inap mekim.”
15 Wok bilong lukautim Baibel-stadi em i hap wok bilong yumi, na long dispela rot tasol yumi ken inapim wok bilong yumi long kamapim ol disaipel. Ol pablisa i wok long lain gut long pasin bilong lukautim ol Baibel-stadi ol i amamas tru na kisim planti gutpela samting. Gutpela sapos ol man i kolim yumi tu olsem man i ‘save autim tok bilong kingdom bilong God na man i skulim ol manmeri long tok bilong Bikpela Jisas Krais na i no pret long autim tok.’—Ap 28:31.