Tingim Yet Dispela Bikpela Wok Bilong Kamapim Ol Disaipel
1 Paslain long Jisas i lusim graun, em i tokim ol disaipel bilong em long “mekim olgeta lain manmeri i kamap disaipel.” Bilong mekim olsem, ol i mas mekim bikpela wok bilong autim tok na skulim ol man na mekim dispela wok i go inap long olgeta hap bilong graun. (Mt 28:19, 20; Ap 1:8) Olsem wanem? Ol i tingim dispela wok i olsem wanpela hevi na em i hatwok tumas long ol i mekim? Aposel Jon i no ting olsem. Bihain long em i bin mekim wok olsem man bilong kamapim disaipel inap 65 yia, em i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”—1 Jo 5:3.
2 Baibel i stori long wok ol Kristen bilong pastaim i bin mekim na i kamapim klia olsem ol i bin wok strong tru long kamapim ol disaipel bilong Krais Jisas. (2 Ti 4:1, 2) Ol i no mekim dispela wok, long wanem, em wanpela wok ol i mas mekim, nogat; ol i mekim, long wanem, ol i gat laik long litimapim nem bilong God na long helpim ol narapela long bilip olsem God inap kisim bek ol. (Ap 13:47-49) Ol manmeri i kamap disaipel, ol tu i kamap man bilong kamapim ol disaipel, na long dispela as kongrigesen Kristen long taim bilong ol aposel i bin go bikpela hariap.—Ap 5:14; 6:7; 16:5.
3 Wok Bilong Kamapim Ol Disaipel i Go Bikpela Hariap: Long taim bilong yumi, bikpela wok bilong kamapim ol disaipel i wok long kamap, winim olgeta taim bipo! Inap long nau, planti milion manmeri i bin kisim save long gutnius na ol i bihainim tok bilong en. (Lu 8:15) I gat sotpela taim tasol i stap bilong pasin nogut bilong dispela taim, olsem na “wokboi i gat gutpela tingting” i bin givim yumi ol tul bilong helpim ol man i gat gutpela bel long kisim save hariap long tok i tru.—Mt 24:45.
4 Long 1995 yumi bin kisim buk Save i Bringim Man Long Laip Oltaim, na long 1996 yumi kisim buklet God i Laik Yumi Mas Mekim Wanem? Wastaua bilong Janueri 15, 1996, pes 14, i stori long buk Save, olsem: “Ol man inap stadi long dispela buk i gat 192 pes insait long liklik hap taim tasol, na ol man em ‘bel bilong ol i gutpela tru . . . bilong kisim laip i stap gut oltaim’ ol inap lain long ol samting na ol i ken dediket long Jehova na kisim baptais.”—Ap 13:48.
5 Pepa yumi kisim wantaim Wok Kingdom bilong Jun 1996, i gat nem “Kamapim Ol Disaipel Long Rot Bilong Buk Save,” i bin putim mak olsem: “Tingim save bilong sumatin na i stap bilong em, na sapos inap, ating klostu olgeta taim yu mekim stadi, bai yu inap pinisim wanpela sapta olgeta insait long wanpela aua, tasol no ken mekim hariap tumas. Sapos long olgeta wan wan wik, tisa na sumatin i mekim stadi long taim stret tupela i bin makim, dispela bai helpim sumatin long kamap strong kwiktaim.” Na dispela Wok Kingdom i tok moa: “Taim man i stadi pinis long buk Save, ating bai yu save pinis, em i laik tru long mekim wok bilong God o nogat.” Askim long Wok Kingdom bilong Oktoba 1996, i stori olsem: “Mipela i ting olsem insait long sotpela hap taim tasol, wanpela gutpela tisa i ken helpim wanpela gutpela sumatin long kisim inap save bilong em i ken kamapim tingting bilong em long lotuim Jehova.”
6 Buk Save i Kamapim Ol Gutpela Samting: Long taim wanpela yangpela meri i kisim baptais, em i kamapim tingting bilong em long em i pilim olsem wanem taim em i stadi long buk Save. Inap sampela taim em i bin stadi long buk Stap Oltaim. Taim ol i kamapim buk Save, sista i mekim stadi em i senisim stadi i go long nupela buk. Wantu sumatin inap save olsem em i mas mekim sampela samting, na kirap long dispela taim em i wok long kamap strong hariap. Dispela yangpela meri, nau em i kamap sista pinis, em i tok: “Buk Stap Oltaim i helpim mi long laikim Jehova, tasol buk Save i helpim mi long pasim tok long bel bilong mi olsem mi mas mekim wok bilong em.”
7 Tingim olsem wanem narapela meri i lainim hariap tok i tru. Bihain long namba tu stadi bilong em, em i kam long wanpela miting long Haus Kingdom long taim bilong wasman sekit i kam lukim kongrigesen. Long dispela wik, long namba 3 stadi bilong em, em i tokim wasman sekit olsem em i dediket pinis long Jehova na em i laik kamap wanpela pablisa i no baptais yet. Ol elda i bung wantaim em, na ol i orait long em i kamap wanpela pablisa, na long wik bihain em i kirap long autim tok. Em i tingim tumas stadi bilong em long Baibel, olsem na em i kisim malolo long wok mani bilong em bambai em i ken stadi 2-pela o 3-pela taim long wanpela wik na lusim sampela taim moa long wok autim tok. Sampela taim ol i save stadi long 2-pela o 3-pela sapta long wanpela stadi. Em i kirap long bihainim olgeta tok em i wok long lainim, na insait long 4-pela wik tasol em i pinisim buk Save, na bihain em i kisim baptais!
8 Man bilong wanpela sista i tok, em yet i bin stap “wankain tru olsem ol narapela man marit i no bilip.” Wanpela taim, wanpela brata i tokim em, em i laik stadi wantaim em long buk Save, na em i tok sapos em laik lusim stadi bihain long namba wan stadi o long sampela taim bihain, em i ken mekim. Maski man bilong sista em i no wanpela gutpela sumatin long skul taim em i yangpela, na em i no bin stadi long sampela kain buk bilong lotu samting inap 20 yia, em i orait long stadi. Taim em i stadi long buk Save, em i kisim wanem tingting? Em i tok: “Mi amamas tru long luksave olsem ol i wokim gut dispela buk i kamapim ol tok bilong Baibel na i no hatwok long ol man i kisim save long ol tok bilong en. Ol tok bilong en i klia na i stret tru, olsem na i no longtaim na mi save wetim tru taim bilong narapela stadi i kamap. Tisa bilong mi i bihainim gut ol tok bilong Sosaiti long kamapim disaipel, na spirit bilong Jehova i helpim mi, olsem na bihain long fopela mun mi kisim baptais. Mi mas tok stret olsem, sapos yumi gat bikpela laik long kamapim ol disaipel, na yumi wok yet long painim ol man i gat gutpela bel long taim yumi autim tok, na mekim gutpela wok long buk Save na ol narapela buk i kamapim tok bilong Baibel em Sosaiti i wokim, na yumi beten askim Jehova long stiaim yumi, orait bai yumi inap long helpim wok bilong kamapim ol disaipel, em wanpela gutpela wok tru.” Tasol ol ekspiriens olsem mipela i bin kamapim long hia i no save kamap planti taim. Planti Baibel-stadi bilong yumi i no bin kam hariap insait long tok i tru.
9 I No Olgeta Sumatin Inap Kamap Strong Hariap: Yumi mas save olsem, save bilong ol tisa na sumatin bilong Baibel i narapela narapela kain. Sampela i hariap long kamap strong long ol samting bilong spirit na sampela nogat. Sampela sumatin i save kamap strong insait long sampela mun tasol na sampela narapela i kisim longpela taim long kamap strong. Wanem kain skul man i bin kisim, em i pilim ol samting bilong spirit o nogat, em i givim bel long Jehova o nogat—ol dispela samting inap helpim man long kamap strong hariap long ol samting bilong spirit o nogat. I no olgeta man yumi stadi wantaim ol, ol i gat laik long stadi long tok bilong Baibel long olgeta de olsem ol bilipman long Beria long bipo i bin mekim.—Ap 17:11, 12.
10 Long dispela as, pepa yumi kisim wantaim Wok Kingdom bilong Epril 1998, nem bilong en “Mipela i Laikim Planti Moa Baibel-Stadi,” em i givim dispela tok long yumi: “Tru, i no olgeta Baibel-stadi bai kamap strong hariap. Sampela i no gat bikpela laik tumas long ol samting bilong spirit olsem ol narapela o ol i no kisim kwik ol samting ol i lainim. Sampela i gat planti wok na ol i no gat taim bilong pinisim wanpela sapta olgeta long wan wan wik. Olsem na long sampela man, ating i gutpela long stadi tupela o tripela taim samting bilong pinisim wanpela sapta na sampela mun moa bilong pinisim buk.”
11 Ol Man Bilong Kamapim Disaipel i Mas i Gat Stretpela Tingting: Yumi mas tingim sindaun na save bilong sumatin bambai yumi ken save yumi inap stadi hariap liklik o yumi mas stadi isi isi wantaim em. Sosaiti i tok yumi ken kirapim ol stadi long buklet Yumi Mas Mekim Wanem?, olsem na ating inap 2-pela o 3-pela mun i mas lus pastaim na bihain bai yumi kirap mekim stadi long buk Save. Sapos yumi bihainim gut ol tok i stap long pepa yumi kisim wantaim Wok Kingdom bilong Jun 1996, ating 6 i go inap 9-pela mun samting inap lus bilong pinisim buk Save. Sampela em nau tasol ol i kirapim stadi long buk Save, ol i bin senisim stadi i go long buklet Yumi Mas Mekim Wanem? bambai sumatin i ken lainim hariap ol bikpela tok i tru bilong Baibel. Na bihain ol i bin stadi gen long buk Save. Sapos yumi kirapim stadi long buk Save na stadi i wok long kamap gutpela, ating i gutpela long stadi long buklet Yumi Mas Mekim Wanem? taim yumi pinisim buk Save, bambai yumi inap stori gen long ol bikpela tok i tru bilong Baibel. Maski yumi bihainim wanem rot, yumi no ken hariap hariap tasol long pinisim stadi long buk na nau sumatin i no kisim ol stretpela save. Olgeta sumatin i mas save long strongpela as bilong nupela bilip ol i kisim long Tok Bilong God.
12 Yumi save yumi stap long taim bilong pinis, olsem na yumi mas wok strong moa, winim olgeta taim bipo, bilong helpim ol narapela long kisim save long tok i tru. Yumi ken beten oltaim bilong kirapim ol nupela Baibel-stadi, na yumi mas beten tu bilong helpim ol man i kirap pinis long stadi wantaim yumi. Sapos yumi mekim olsem bai yumi amamas long baptaisim planti disaipel moa long “olgeta de, i go inap long dispela taim i pinis.”—Mt 28:20.