Askim

◼ Inap hamas mun yumi ken mekim stadi wantaim wanpela man long buk Save?

Jehova i wok long blesim oganaisesen bilong em long nau. Dispela i kamap ples klia long olgeta yia, taim yumi lukim planti tausen nupela manmeri i kam insait long tok i tru. Buk Save em i gutpela buk tru bilong helpim planti man long mekim olsem. Wastaua bilong Janueri 15, 1996, i tok, ol i wokim dispela buk bilong helpim Baibel-stadi long kamap strong hariap long ol samting bilong spirit, na ating em i ken kisim baptais insait long sampela mun tasol.

Long dispela as, dispela Wastaua yet long pes 17 i tok olsem: “Taim wanpela Baibel-stadi i pinisim stadi long buk Save na i kisim baptais pinis, i no olsem em i mas stadi long namba tu buk.”

Olsem wanem long man i no kisim baptais taim em i pinisim stadi long buk Save? Wok Kingdom bilong Jun 1996, pes 6, paragraf 23, i kamapim gen dispela tok Wastaua i bin kamapim olsem yumi no ken stadi long narapela buk wantaim dispela Baibel-stadi taim yumi pinisim buk Save. Olsem wanem? Dispela i makim olsem yumi no tingting long helpim yet Baibel-stadi bihain long dispela taim? Nogat. Mipela i laik bai ol man i kisim save long ol bikpela tok bilong Baibel. Tasol, mipela i ting olsem insait long sotpela hap taim tasol, wanpela gutpela tisa i ken helpim wanpela gutpela sumatin long kisim inap save bilong em i ken kamapim tingting bilong em long lotuim Jehova. Ating sindaun bilong sampela Baibel-stadi bai mekim na ol i gat laik long stadi tupela taim insait long wanpela wik.

Tru, sampela sumatin i no inap kamap strong hariap olsem ol narapela. Tasol sapos sumatin i bin stadi longpela taim long buk Save na bihain long em i pinisim stadi em i no kamapim tingting bilong em olsem em i laik bung wantaim kongrigesen, orait pablisa i ken toktok wantaim wanpela elda bilong Komiti Bilong Lukautim Wok Bilong Kongrigesen long dispela samting. Sapos sampela samting i bin mekim na em i no tingting long bung wantaim kongrigesen, orait yupela i ken mekim sampela samting moa bilong helpim em. Dispela i stret wantaim ol tok i stap long paragraf 11 na 12 bilong Wastaua, Janueri 15, 1996, pes 17.

Sapos em i pilim tru ol bikpela tok bilong Baibel em i bin lainim, dispela i mas kirapim sumatin long i kam long ol miting Kristen. Long dispela rot sumatin inap kamapim klia olsem em i gat laik long lotuim Jehova. Sapos em i no kamapim klia olsem em i pilim ol samting bilong spirit bihain long em i stadi longpela taim long buk Save, orait ating i stret yumi no stadi moa wantaim em.