Askim

◼ Nau yumi kisim pinis buk Save i Bringim Man Long Laip Oltaim, olsem na bai yumi mekim ol Baibel-stadi inap hamas mun?

Wok Kingdom bilong Septemba 1993 i bin tok olsem, yumi mas mekim yet stadi wantaim ol nupela man inap long yumi pinisim tupela buk. Nau yumi kisim buk Save, olsem na i stret yumi mas senisim pasin bilong mekim stadi, olsem Wastaua bilong Janueri 15, 1996, pes 13 na 14 i stori long en.

Buk Save i bilong helpim ol man, em ‘bel bilong ol i gutpela bilong kisim laip i stap gut oltaim,’ long kisim save long ol bikpela tok bilong Baibel bambai ol i ken dediket long Jehova na kisim baptais. (Aposel 13:48) Olsem na, taim yupela i pinisim dispela nupela buk, yupela i no gat wok long mekim stadi wantaim Baibel-stadi bilong yupela long namba tu buk. Taim ol Baibel-stadi bilong yupela i kirap long pilim gut ol tok i tru, yupela i ken wok yet long strongim ol long kisim sampela save moa taim ol i kam long ol miting bilong ol Witnes Bilong Jehova na tu taim ol i kaunim Baibel na ol buk na nius Kristen.

Sapos yupela yet i save gut long ol askim i stap long pes 175-218 bilong buk Lo Bilong Yumi Bilong Mekim Wok Autim Tok, dispela inap helpim yupela. Maski yupela i no kamapim ol dispela askim o stori wantaim ol Baibel-stadi long en, gutpela sapos yupela i kamapim ol tok bilong buk Save em inap helpim ol Baibel-stadi long stori gut long ol bikpela tok i tru bilong Baibel taim ol elda i skelim ol askim wantaim ol man i laik kisim baptais.

Yumi no gat wok long skruim sampela stori long tok bilong buk Save, olsem ol tok bilong ol narapela buk o sampela narapela tingting moa bilong helpim tok bilong Baibel o ol tok bilong daunim ol bilip giaman. Dispela bai mekim na bai yumi stadi longtaim. Tasol yumi laik pinisim dispela buk kwiktaim, ating insait long 6-pela mun tasol. Olsem na yumi gat wok long redim gut stadi pastaim, bambai yumi inap kamapim klia ol tok na mekim stadi i sotpela. Kirapim tu ol Baibel-stadi long redi gut pastaim, na kaunim ol skripsa, na wok strong long tingim wanem bikpela tok buk i laik skulim yumi long en.

Wastaua i kamapim klia i gat wanem as na ol Witnes Bilong Jehova i gat wok long mekim planti gutpela Baibel-stadi insait long sotpela hap taim tasol. (Lukim Aisaia 60:22.) Sapos yumi mekim gut wok long buk Save, dispela bai helpim ol nupela manmeri long kisim na bihainim dispela save i bringim man long laip oltaim.​—⁠Jon 17:⁠3.