“Sapos i No Gat Man i Tokim Mi . . . Bai Mi Inap Save Olsem Wanem?”
1 Taim Filip i askim man bilong Itiopia sapos em i save long as bilong ol tok em i ritim long Tok Bilong God, em i bekim tok olsem: “Sapos i no gat man i tokim mi long as bilong dispela tok, orait bai mi inap save olsem wanem?” Filip i amamas long helpim em long kisim save long gutnius bilong Jisas, na dispela i mekim na man bilong Itiopia i kisim baptais wantu tasol. (Ap 8:26-38) Filip i bihainim tok bilong Krais long ‘mekim olgeta lain manmeri i kamap disaipel na baptaisim ol na lainim ol.’—Mt 28:19, 20.
2 Yumi mas mekim dispela wok bilong kamapim disaipel olsem Filip i bin mekim. Tasol pasin bilong kamap strong kwik long samting bilong spirit olsem man bilong Itiopia i bin mekim i no save kamap tumas long ol manmeri yumi save stadi wantaim ol long Baibel. Dispela man bilong Itiopia i save bihainim lotu Juda, em i save gut long Baibel, em i gat gutpela bel, na i gat wanpela samting moa em i mas mekim, em i mas bilip olsem Jisas em i Mesaia God i bin tok promis long salim i kam. I hatwok long stadi wantaim ol manmeri sapos ol i no save tumas long Baibel, o ol bilip giaman bilong ol lotu i paulim ol, o ol i gat planti hevi bilong ol yet. Wanem samting inap helpim yumi long stiaim ol Baibel-stadi long dediket na baptais?
3 Ol Sumatin Bilong Baibel i Mas Kisim Wanem Ol Samting Bilong Spirit: Pepa yumi kisim wantaim Wok Kingdom bilong Ogas 1998 i stori long hamas mun samting yumi stadi wantaim man long buklet Yumi Mas Mekim Wanem? na buk Save. Em i tokim yumi long mekim olsem: “Yumi mas tingim sindaun na save bilong sumatin bambai yumi ken save yumi inap stadi hariap liklik o yumi mas stadi isi isi wantaim em. . . . Yumi no ken hariap hariap tasol long pinisim stadi long buk na nau sumatin i no kisim ol stretpela save. Olgeta sumatin i mas save long strongpela as bilong nupela bilip ol i kisim long Tok Bilong God.” Olsem na i no gutpela tingting long stadi hariap hariap long ol tok i stap long buk Save bilong pinisim buk insait long 6-pela mun. Bilong helpim sampela manmeri long winim mak bilong kisim baptais, ating yumi mas stadi wantaim ol planti mun liklik, winim 6-pela mun. Taim yu wok long mekim stadi long olgeta wan wan wik, lusim hap taim yu pilim yu mas lusim bilong helpim sumatin long kisim na bilipim ol samting em i lainim long Tok Bilong God. Sampela sumatin i mas stadi inap 2-pela o 3-pela wik bilong inapim wanpela sapta long buk Save. Dispela bai mekim na bai yu gat taim long ritim na kamapim gut insait bilong planti skripsa i stap long buk.—Ro 12:2.
4 Tasol olsem wanem sapos taim yu pinisim buk Save na yu luksave olsem sumatin i gat wok yet long kisim sampela save moa long tok i tru, o bel bilong em i no kirapim em long bihainim tok i tru na dediketim laip bilong em long God? (1 Ko 14:20) Yu inap mekim wanem samting moa bilong stiaim em i go long rot bilong laip?—Mt 7:14.
5 Inapim Laik Bilong Sumatin Bilong Baibel Long Ol Samting Bilong Spirit: Taim yu pinisim stadi long buklet Yumi Mas Mekim Wanem? na buk Save, na sapos yu luksave olsem sumatin i wok long kamap strong long samting bilong spirit, maski em i mekim olsem isi isi, na em i pilim ol samting em i lainim, orait stadi wantaim em long namba tu buk. Ating yu no gat wok long mekim olsem wantaim olgeta sumatin, tasol taim yu mas mekim olsem, stadi long buk Bel Isi o long buk Wanbel. Sapos kongrigesen i no gat ol dispela buk long buk-rum, planti pablisa i gat bilong ol yet. Ol kongrigesen inap putim oda long buk Wanbel tasol. Long olgeta taim yu mas stadi pastaim long buklet Yumi Mas Mekim Wanem? na long buk Save. Yu ken raitim long ripot Baibel-stadi yu mekim, na ol gobek, na ol aua yu lusim bilong mekim stadi, maski sumatin i kisim baptais taim em i no pinisim yet namba tu buk.
6 Olsem wanem? Dispela i makim olsem yumi bai kirap stadi long namba tu buk wantaim olgeta manmeri i no bin baptais inap longpela taim na ol i bin stadi long wanpela buk tasol? I no olsem. Tasol ating sampela i lusim wok autim tok o ol i no kamap strong long tok i tru, na ol i pilim olsem ol i mas i gat man bilong helpim ol long bihainim gut tok i tru long sindaun bilong ol. Paslain long yumi kirap stadi gen wantaim wanpela pablisa i baptais pinis, yumi mas toktok wantaim wasman bilong wok autim tok. Tasol sapos yu save long sampela man em bipo ol i bin stadi long buk Save tasol ol i no bin kamap strong na dediket na baptais, ating yu inap toktok wantaim ol bilong kisim save sapos ol i laik kirapim gen Baibel-stadi bilong ol o nogat.
7 Em i mak bilong pasin sori bilong ol Kristen long helpim na tingim tru olgeta wan wan manmeri yumi save stadi wantaim ol. Yumi laik helpim sumatin long kisim bikpela save moa long tok i tru bilong Baibel. Long dispela rot sumatin inap kisim gutpela save na insait long tok i tru, na dediketim laip bilong em yet long Jehova, na kisim baptais long wara bilong makim dediket bilong em.—Sng 40:8; Ef 3:17-19.
8 Yu inap tingim wanem samting i bin kamap bihain long taim man bilong Itiopia i kisim baptais? “Dispela man i amamas na i bihainim rot bilong en na i go” olsem wanpela nupela disaipel bilong Krais Jisas. (Ap 8:39, 40) Gutpela sapos yumi wantaim ol narapela manmeri yumi helpim ol long bihainim tok i tru i kisim bikpela amamas tru long mekim wok bilong Jehova God—long nau na long olgeta taim bihain!