‘Mipela i No Inap Pasim Maus’
1 Krais Jisas i wok long skelim gut wok autim tok. (Mt 28:20; Mk 13:10) Maski klostu siks milion manmeri i autim tok long olgeta mun long 234 kantri, yumi no ken kisim tingting olsem wok bilong yumi long autim tok i pinis. I go inap long taim God i tokaut olsem wok i pinis, yumi “no inap pasim maus” long ol samting yumi lainim pinis.—Ap 4:20.
2 Bilip na Wetim Spirit Holi i Helpim Yumi: Satan i save wok strong long mekim yumi bel hevi. (KTH 12:17) Skin bilong yumi i gat sin em tu i save givim planti hevi long yumi. Ol kain samting olsem inap pulim tingting bilong yumi na bai yumi no tingting tumas long nambawan bikpela wok, em wok autim tok. Tasol sapos yumi bilip long Jehova, spirit bilong em bai helpim yumi long karim olgeta kain hevi.
3 Taim ol i mekim nogut tru long kongrigesen Kristen long taim bilong ol aposel, ol brata i beten askim God long helpim ol long wok yet long autim tok na no ken pret. Jehova i harim beten bilong ol, na em i givim spirit bilong em long ol bambai ol i ken givim bel tru na tingting strong long mekim wok autim tok. Olsem na ol i no pret na ol i no lusim wok bilong autim gutnius.—Ap 4:29, 31; 5:42.
4 No Ken Pret Long Tok i Bagarapim Bel Bilong Yumi: Tingting bilong planti man long yumi o tok ol i mekim long ol nius samting bilong bagarapim nem bilong yumi inap pretim yumi. Tasol tingim strongpela tok Pita na ol narapela aposel i bin mekim long Nambawan Kaunsil bilong ol Juda, olsem i stap long Aposel 5:29-32. Olsem wanpela tisa bilong lo, Gamaliel, em i bin tok ol man i no inap pasim wok bilong God. Yumi no mekim dispela wok long strong bilong yumi yet. God i save givim strong long yumi bambai yumi ken mekim dispela bikpela wok, na em tasol inap mekim!—Sek 4:6.
5 Long olgeta de yumi mas beten strong askim Jehova long givim spirit bilong em bilong helpim yumi long wok strong long autim gutnius. Gutpela sapos yumi mekim wankain tok olsem Jeremaia i bin mekim, olsem tok bilong Kingdom i olsem wanpela paia i lait insait long bun bilong yumi. (Jer 20:9) Yumi no inap pasim maus!