Sapta 22
Wok Yet Long Autim Tok Bilong God na No Ken Pret
LONG taim bilong ol aposel sampela bikpela samting i bin kamap, i winim olgeta samting i bin kamap insait long 4,000 yia bipo. God i makim Pikinini bilong em, Krais Jisas, bilong kamap King na bai em i bosim olgeta hap bilong graun. Ol man bilong lotu i birua long Jisas na kirapim ol man long kilim em i dai, tasol Jehova i kirapim bek Pikinini bilong em. Long rot bilong Krais ol man inap kisim laip i stap oltaim. Tasol taim ol disaipel bilong em i kirap autim dispela gutpela tok, ol man i birua tru long ol. Pastaim ol i kalabusim tupela aposel na bihain ol i kalabusim olgeta aposel. Ol i paitim ol na tambuim ol long autim tok long nem bilong Jisas. (Ap. 4:1-3, 17; 5:17, 18, 40) Orait, ol aposel i mas mekim wanem? Sapos yu bin i stap wantaim ol, bai yu mekim wanem? Bai yu wok yet long autim tok na yu no pret?
2 Long yia 1914 C.E., wanpela samting i kamap em i bikpela samting moa yet. God i kamapim Kingdom bilong em long heven na em i putim Krais i stap king. Bihain ol i rausim Seten wantaim ol ensel nogut i kam daun long graun. (Re. 12:1-5, 7-12) Las taim bilong dispela pasin nogut bilong nau i kirap. Ol manmeri i bin lukim ol samting i kamap long 1914, dispela lain i no i dai pinis yet na bai God i pinisim olgeta wok bilong Seten. (Mt. 24:34) Ol manmeri i winim dispela taim bai ol inap i stap oltaim. Bai olgeta hap bilong graun i kamap gutpela ples paradais olsem God i gat laik long en long pastaim. Sapos yu bilip pinis long dispela gutpela tok, orait yu gat wok long autim dispela tok long ol narapela man. (Mt. 24:14) Tasol taim yu autim tok, yu ting bai ol man i mekim wanem?
3 Sampela bai ol i amamas long harim dispela gutpela tok bilong Kingdom yu autim long ol. Tasol planti bai ol i no harim. (Mt. 24:37-39) Sampela bai tok bilas long yu o ating bai ol i birua long yu. Ating sampela wanhaus bilong yu bai birua long yu, olsem Jisas i toksave pinis. (Luk 21:16-19) O ating long ples wok o long skul bai sampela i mekim olsem long yu. Long planti kantri ol gavman i mekim pasin i no stret na ol i tambuim wok bilong ol Witnes Bilong Jehova. Taim kain hevi olsem i kamap o sapos olgeta dispela hevi i painim yu, bai yu wok yet long autim tok bilong God na yu no pret?
4 Yu laik sanap strong na mekim wok bilong God, a? Sampela brata ol i ting i no gat wanpela samting inap pundaunim ol, tasol nau ol i no wok moa long autim tok bilong Kingdom. Tasol sampela, maski ol i man bilong pret tu, ol i wok strong yet long wok bilong God. Orait, olsem wanem yu ken kamap man bilong “sanap strong long bilip”?—1 Ko. 16:13.
I No Long Strong Bilong Yu Yet
5 I gat planti samting ol wokboi bilong God i mas mekim bambai ol i ken i stap gut long wok bilong Em. Tasol namba wan samting ol i mas mekim, em olsem: Ol i mas bilip tru long Jehova na long ol samting em i bin mekim bilong helpim ol. Olsem wanem yumi ken bilip strong olsem? Wanpela rot em olsem: Yumi mas i go long ol miting bilong kongrigesen. Baibel i tok yumi no ken lusim pasin bilong bung wantaim ol brata. (Hi. 10:23-25) Planti Witnes Bilong Jehova ol i wok strong yet long autim tok maski ol man i les long harim tok bilong Kingdom o ol i birua long ol; ol i stap gut long dispela wok, long wanem ol i strong tru long go oltaim long ol miting na bung wantaim. Taim yumi go long miting yumi kisim sampela save moa long Baibel. Tasol yumi no tingting tasol long kisim save long ol nupela nupela samting na yumi go. Nogat. (Lukim Aposel 17:21.) Yumi pilim moa yet ol tok i tru yumi lain pinis long en, na yumi lain gut long rot bilong mekim wok long ol dispela tok i tru. Bel na tingting bilong yumi i pilim tru ol gutpela wok na pasin bilong Jisas yumi mas bihainim. (Ef. 4:20-24) Yumi lotu wantaim ol brata Kristen na yumi kamap wanbel tru wantaim ol, na ol tok yumi harim long ol miting i strongim yumi olgeta wan wan long mekim yet wok bilong God. Spirit bilong Jehova i stiaim yumi long rot bilong kongrigesen, na taim yumi bung long nem bilong Jisas, em i stap wantaim yumi long rot bilong dispela spirit.—Re. 3:6; Mt. 18:20.
6 Olsem wanem? Yu save go long olgeta miting? Yu save bihainim ol tok yu harim long ol dispela miting? Sampela taim gavman i putim tambu long wok bilong yumi na ol brata i mas mekim miting long haus bilong sampela brata, na ol i mas bung olsem ol liklik liklik lain. Ol i save senisim senisim taim na ples bilong bung, na sampela taim i hatwok long ol, long wanem ol i mas bung long biknait samting. Tasol maski i hatwok o birua inap painim ol, ol brata sista i laik i stap gut long Jehova ol i wok strong long i go long olgeta miting.
7 Na sapos yu bilip tru long Jehova, oltaim bai yu beten long em. Yu no ken beten nating; yu mas pilim tru long bel olsem Jehova i mas helpim yu. Yu save mekim olsem? Taim Jisas i mekim wok bilong em long graun, oltaim em i beten. (Luk 3:21; 6:12, 13; 9:18, 28; 11:1; 22:39-44) Na long apinun taim ol i laik kilim em i dai, em i tok strong long ol disaipel, olsem: “Yupela was na prea. Nogut samting bilong traim yupela em i kam painim yupela.” (Mak 14:38) Taim yumi autim tok, sapos ol man i no laik harim tok, ating bai yumi slek liklik long mekim wok. Sapos ol man i tok bilas long yumi o mekim nogut tru long yumi, ating bai yumi tingting long pasim maus bambai yumi inap abrusim hevi. Tasol sapos yumi beten strong askim God long spirit bilong em bilong helpim yumi long wok yet long autim tok na no ken pret, bai yumi no pasim maus.—Luk 11:13; Ef. 6:18-20.
Ol i No Pret Long Autim Tok
8 Stori bilong “Wok Bilong Ol Aposel” long Baibel inap helpim yumi olgeta. Em i stori long ol aposel na sampela Kristen moa bilong pastaim, em ol i man wankain olsem yumi. Na em i stori long olsem wanem ol i winim ol hevi na ol i strong long autim tok bilong Jehova na ol i no pret. Orait, nau yumi ken lukim sampela askim na skripsa na skelim sampela tok bilong dispela hap bilong Baibel. Taim yu mekim olsem, yu mas tingim ol dispela tok na olsem wanem em inap helpim yu.
Ol aposel i bin winim bikpela skul o nogat? Dispela pasin bilong ol, olsem ol i no man bilong pret, yu ting dispela em i pasin tru bilong ol? (Ap. 4:13; Jon 18:17, 25-27; 20:19)
Jisas i kot long kaunsil bilong ol Juda na ol man i kilim em i dai, na sampela wik bihain Pita i kot long dispela kaunsil; orait olsem wanem na Pita i no pret long autim tok long ai bilong ol? (Ap. 4:8; Mt. 10:19, 20)
Sampela wik paslain long taim ol aposel i kot long bikpela kaunsil bilong ol Juda, ol i bin mekim wanem? (Ap. 1:14; 2:1, 42)
Taim ol hetman i tambuim Pita na Jon long autim tok long nem bilong Jisas, tupela i bekim wanem tok long ol? (Ap. 4:19, 20)
Taim ol i lusim kot, ol i tingting gen long husat i mas helpim ol? Ol i krai long em long pasim ol man bambai ol i no ken mekim nogut moa long ol, o olsem wanem? (Ap. 4:24-31)
Taim ol birua i laik pasim ol aposel bambai ol i no ken autim tok, Jehova i helpim ol olsem wanem? (Ap. 5:17-20, 33-40)
Jehova i helpim ol aposel long lusim kalabus na ol i mekim wanem bilong kamapim ples klia olsem ol i save long as bilong dispela samting Jehova i mekim? (Ap. 5:21, 41, 42)
Taim ol man i birua nogut tru long ol Kristen na ol i ranawe nabaut, ol i wok yet long mekim wanem? (Ap. 8:3, 4; 11:19-21)
9 Wok ol i mekim bilong autim gutpela tok i no lus nating. Inap 3,000 ol i kisim baptais long Pentikos, 33 C.E. “Planti manmeri moa yet i bilip long Bikpela, na ol i kam insait long lain bilong em.” (Ap. 2:41; 4:4; 5:14) Bihain wanpela man i bin birua tru long ol Kristen, em Sol bilong Tasas, em i kamap Kristen na em i wok strong long autim tok i tru na em i no pret. Bihain ol i kolim em aposel Pol. (Ga. 1:22-24) Dispela wok i kirap long taim bilong ol aposel em i stap yet. Na nau long “las taim” dispela wok i kamap bikpela na i go long olgeta hap bilong graun. Yumi ken insait long dispela wok na bihainim gutpela pasin bilong ol Kristen bilong bipo, em ol i no pret long autim tok.
10 Taim Pol i kisim save long Krais Jisas, em i no lusim taim. “Kwiktaim em i go . . . na em i autim tok bilong Jisas. Em i tok, ‘Dispela man em i Pikinini Bilong God.’ ” (Ap. 9:20) Em i pilim pasin marimari God i bin mekim long em, na em i save ol narapela man tu i mas harim dispela gutpela tok em i bin harim. Pol em i wanpela Juda na ol Juda long dispela taim bipo ol i save bung long haus lotu bilong ol, olsem na em tu i go long haus lotu bilong autim tok long ol. Em i save go long olgeta haus tu na autim tok, na em i autim tok long maket. Na em i redi long i go long nupela ples bilong autim tok long ol man.—Ap. 17:17; 20:20; Rom 15:23, 24.
11 Pol i no pret long autim tok, tasol em i bihainim gutpela tingting. Yumi tu mas mekim olsem. Taim Pol i autim tok long ol Juda, em i kirapim ol long tingim ol tok promis God i bin mekim long ol tumbuna bilong ol. Taim em i autim tok long ol Grik, em i toktok long ol samting ol Grik i save long en. Sampela taim em i stori long taim em yet i bin kisim save long tok i tru, long wanem em i ting dispela i gutpela rot bilong autim tok bilong God long ol. Em i tok: “Mi save mekim dispela olgeta wok bilong litimapim gutnius, bai mi ken kisim blesing bilong gutnius wantaim sampela man.”—1 Ko. 9:20-23; Ap. 22:3-21.
12 Taim ol man bilong wanpela hap i birua long gutnius, Pol i lusim dispela hap na i go autim tok long narapela hap. Em i no tok pait wantaim ol man i birua long tok i tru. (Ap. 14:5-7; 18:5-7; Rom 12:18) Tasol em i no sem long gutnius. (Rom 1:16) Pol i no amamas long tok bilas bilong ol birua na pasin nogut ol i mekim long em, tasol em i no lusim wok bilong autim tok. Em i tok: “God bilong yumi em i strongim bel bilong mipela, na mipela i no surik long ol birua.” Maski wanem wanem kain hevi i painim em, em i tok: “Bikpela i bin sambai long mi na givim strong long mi. Olsem na mi autim gutnius inap tru.” (1 Te. 2:2; 2 Ti. 4:17) Het bilong kongrigesen Kristen, em Bikpela bilong yumi, Krais Jisas, em i wok yet long givim strong long ol wokboi bilong em bambai ol inap mekim dispela wok em i tok ol i mas mekim nau long taim bilong yumi.—Mak 13:10.
13 Olsem na i gat as tru na yumi no ken pret long autim tok bilong God. Yumi ken sanap strong olsem Jisas na ol Kristen bilong pastaim i bin mekim. I no olsem yumi gat hatpela pasin na yumi bikhet long ol man. Nogat. Yumi no laik subim ol man long harim tok. Yumi tingim gut ol narapela man. Tasol taim ol i no laik harim tok, yumi no lusim dispela wok, na taim ol i birua long yumi, yumi no pret na pasim maus. Olsem Jisas i bin mekim, yumi tu i tokaut olsem i stret Kingdom bilong God tasol i mas bosim graun. Yumi no pret long tokaut, long wanem yumi wokboi bilong King bilong heven na graun, em God Jehova, na dispela tok yumi autim i no tok bilong yumi; em i tok bilong God.—Fl. 1:27, 28; 1 Te. 2:13.
Stori Gen Long Ol Dispela Tok
● Bilong wanem yumi mas wok strong long autim tok bilong Kingdom long olgeta man? Tasol yumi mas save sampela man bai mekim wanem?
● Yumi ken mekim wanem na bai yumi kamapim ples klia olsem yumi no mekim wok bilong Jehova long strong bilong yumi yet?
● Stori bilong Wok Bilong Ol Aposel i lainim yumi long wanem ol bikpela samting?
[Askim Bilong Stadi]
1. (a) Kirap long Pentikos 33 C.E., ol disaipel bilong Jisas i autim wanem gutpela tok? Tasol ol hetman na bikman bilong lain Juda i mekim wanem? (b) Olsem na i gat wanem ol askim yumi yet yumi mas tingim?
2. (a) Yumi mas autim wanem tok long nau em i gutpela moa? (b) Em wok bilong husat long autim dispela tok?
3. (a) Taim yumi autim tok bilong Kingdom, sampela man i mekim wanem? (b) Olsem na yumi mas tingim wanem askim?
4. Tru nau yumi sanap strong, tasol yu ting i olsem yumi no inap lusim wok bilong God?
5. (a) Wanem namba wan samting yumi mas mekim na bai yumi inap i stap gut long wok bilong God? (b) Bilong wanem ol miting i bikpela samting?
6. Long ples i gat tambu long ol Witnes Bilong Jehova, ol i save mekim miting olsem wanem?
7. (a) Yumi mas mekim wanem narapela samting na bai yumi kamapim bel bilong yumi, yumi bilip tru long Jehova? (b) Dispela samting inap helpim yumi olsem wanem na bai yumi no pret long autim tok?
8. (a) Bilong wanem i gutpela sapos yumi tingim stori bilong Wok Bilong Ol Aposel? (b) Bekim ol askim i stap long pinis bilong dispela paragraf na stori long olsem wanem ol dispela tok inap helpim yumi.
9. (a) Ol disaipel bilong pastaim i autim tok na wanem gutpela samting i kamap? (b) Olsem wanem yumi insait long dispela wok?
10. (a) Pol i autim tok long wanem wanem rot? (b) Yu save autim tok bilong Kingdom long wanem wanem rot?
11. (a) Pol i mekim wanem na yumi ken save, em i no pret long autim tok, tasol em i bihainim gutpela tingting? (b) Olsem wanem yumi ken bihainim pasin bilong Pol taim yumi autim tok long ol wantok o wanwok o wanskul?
12. (a) Pol i no pret long autim tok, tasol em i mekim wanem bambai em i no ken tok pait wantaim ol birua? (b) Wanem taim yumi ken bihainim gutpela tingting olsem? Olsem wanem yumi ken mekim? (c) Strong bilong helpim yumi long autim tok na i no ken pret, dispela strong i kam we?
13. Yumi mekim wanem na yumi kamapim ples klia olsem yumi no pret long autim tok? I gat wanem as na yumi no pret?