Bihainim Pasin Bilong Jisas—Autim Tok na No Ken Pret
“God bilong yumi em i strongim bel bilong mipela, na . . . mipela i autim gutnius bilong God long yupela.”—1 TE. 2:2.
1. Bilong wanem gutnius bilong Kingdom i gutpela tok bilong harim?
EM I gutpela samting tru long harim tok bilong ol gutpela samting, a? Na nambawan gutpela tok, em gutnius bilong Kingdom Bilong God. Dispela gutnius i tokim yumi olsem ol hevi, sik, pen, krai, na indai bai pinis. Em i opim rot long ol man i ken kisim laip oltaim, kamapim klia ol samting God i tingting pinis long mekim, na soim yumi long olsem wanem yumi ken pas gut wantaim God. Ating bai yu ting olsem olgeta man i laik harim dispela tok em Jisas i bin autim long ol man. Tasol sori tru, i no olsem.
2. Kamapim insait bilong tok bilong Jisas: “Mi kam bilong mekim pasin birua i kamap.”
2 Jisas i tokim ol disaipel bilong em: “Yupela i no ken ting mi kam bilong mekim i dai olgeta pait long graun. Mi no kam bilong mekim i dai pait. Nogat. Mi bringim bainat i kam. Mi kam bilong mekim pasin birua i kamap. Man bai i birua long papa bilong en, na pikinini meri bai i birua long mama bilong en, na maritmeri bai i birua long mama bilong man bilong en. Ol famili bilong man yet bai i kamap birua bilong en.” (Mt. 10:34-36) Ol man i no bilip long gutnius, nogat, planti ol i sakim. Sampela i birua long ol man i autim gutnius, maski ol i famili.
3. Bilong mekim wok bilong yumi long autim tok, yumi mas i gat wanem pasin?
3 Yumi autim wankain tok i tru olsem Jisas, na taim ol man i harim, planti i mekim wankain pasin long yumi olsem ol i bin mekim long Jisas long bipo. Yumi save dispela samting bai kamap. Jisas i bin tokim ol disaipel bilong em: “Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu.” (Jo. 15:20) Long planti kantri ol birua i no save mekim nogut long yumi, tasol ol man i bel nogut long yumi na i no laik harim tok. Olsem na yumi mas i gat bilip na strongpela bel bilong mekim yet wok bilong yumi long autim gutnius na no ken pret.—Ritim 2 Pita 1:5-8.
4. Bilong wanem Pol i mas “strongim bel” bilong autim tok?
4 Ating sampela taim yu pilim olsem i hatwok long autim tok, o yu pret long sampela pasin bilong autim tok. Sapos olsem, i no yu wanpela tasol i pilim olsem. Aposel Pol i strong long autim tok na i no pret na em i save gut tru long tok i tru, tasol sampela taim em tu i pilim olsem i hatwok long autim tok. Long ol Kristen long Tesalonaika, Pol i tok: “Yupela i save, taim mipela i no kam long yupela yet, mipela i bin i stap long taun Filipai, na mipela i bin kisim pen, na ol i bagarapim bodi bilong mipela. Tasol taim mipela i kam long yupela, God bilong yumi em i strongim bel bilong mipela, na mipela i no surik long ol dispela birua. Nogat. Mipela i sanap strong na mipela i autim gutnius bilong God long yupela.” (1 Te. 2:2) Long Filipai ol jas i tokim sampela man long paitim Pol na poroman bilong em Sailas, putim tupela long kalabus, na pasim strong lek bilong tupela long plang. (Ap. 16:16-24) Tasol maski i olsem, Pol na Sailas i “strongim bel” na i wok yet long autim tok. Olsem wanem yumi inap bihainim pasin bilong ol? Bilong bekim dispela askim, gutpela yumi skelim wanem samting i bin helpim ol wokman bilong God long taim bilong ol man i bin raitim Baibel long strongim bel long autim tok i tru bilong Jehova, na yumi kisim save long olsem wanem yumi ken bihainim pasin bilong ol.
Ol i No Ken Pret Taim Ol Man i Birua Long Ol
5. Bilong wanem long olgeta taim ol man i stap gut long Jehova ol i mas strongim bel?
5 Jisas Krais i nambawan gutpela piksa olsem man i gat strongpela bel na i no pret. Tasol kirap long taim God i bin wokim Adam na Iv, long olgeta taim ol man i stap gut long Jehova ol i mas strongim bel. Bilong wanem i olsem? Bihain long Adam tupela Iv i bikhet, Jehova i tok profet olsem bai i gat pasin birua i stap namel long ol man i mekim wok bilong God na ol man i mekim wok bilong Satan. (Stt. 3:15) I no longtaim na dispela pasin birua i kamap ples klia taim Kein i kilim i dai brata bilong em Abel, em wanpela stretpela man. Bihain, ol man i bin birua long Enok, em narapela man i bin stap gut long God paslain long taim bilong Bikpela Tait. Enok i bin tok profet olsem God bai kam wantaim planti tausen ensel bilong Em bilong kotim olgeta man i givim baksait long God na Em bai mekim save long ol. (Ju. 14, 15) Planti man i no laikim dispela tok. Ol man i nolaik tru long Enok na ating ol bai kilim em i dai sapos Jehova i no kisim em. Man! Enok i strongim tru bel na i no pret, a?—Stt. 5:21-24.
6. Bilong wanem Moses i mas strongim bel bilong toktok long Fero?
6 Tingim tu pasin bilong Moses long strongim bel na toktok long Fero, em ol man i no tingim Fero olsem wanpela mausman tasol bilong ol god, nogat, ol i tingim em olsem wanpela god, em pikinini bilong god Ra. Olsem ol narapela Fero, ating em tu i lotuim imis bilong em yet. Tok bilong Fero i olsem lo. Em i gat bikpela strong, pasin antap, strongpela het, na ol narapela i no inap tokim em long ol samting em i mas mekim. Moses, wanpela wasman i gat pasin daun, i mas kam long dispela kain man planti taim—na Fero i no askim em long kam na em i no amamas long Moses i kam. Na Moses i tok profet long wanem samting? Ol bikpela hevi. Na em i tokim Fero long mekim wanem? Em i askim Fero long larim planti milion wokboi nating long go lusim kantri! Yu ting Moses i mas strongim bel? Yes, em i mas strongim tru bel!—Nam. 12:3; Hi. 11:27.
7, 8. (a) Wanem ol traim i bin painim ol gutpela wokman bilong God i bin stap paslain long taim bilong Krais? (b) Wanem samting i helpim ol dispela manmeri long soim olsem ol i no pret long sambai na helpim lotu i tru?
7 Long planti handet yia bihain, ol profet na ol narapela gutpela wokman bilong God i strong long sambai long lotu i tru. Ol lain bilong Satan i bin mekim nogut long ol. Pol i tok: “Ol birua i tromoi ston long ol. Ol i kisim so na katim bodi bilong ol long tupela hap. Ol i kilim ol i dai long bainat. Sampela bilong ol dispela man i bilip, ol i pasim skin bilong sipsip na meme olsem laplap, na ol i wokabaut i go. Ol i sot long olgeta samting bilong bodi, na ol man ol i givim hevi long ol na mekim pasin nogut tru long ol.” (Hi. 11:37) Wanem samting i helpim ol dispela gutpela wokman bilong God long sanap strong? Sampela ves paslain long dispela, aposel Pol i tokaut long samting i bin givim strong long Abel, Abraham, Sara, na sampela moa long sanap strong. Em i tok: “Ol i no kisim ol dispela gutpela samting God i bin promis long givim ol. Nogat. I olsem ol i sanap na lukluk i go long ol dispela samting i stap longwe tru long ol, na ol i amamas long lukim ol.” (Hi. 11:13) Yumi ken save, ol profet olsem Elaija, Jeremaia, na ol narapela gutpela wokman bilong God i bin stap paslain long taim bilong Krais, ol i strongim bel na sambai long lotu i tru, na pasin bilong lukluk i go long ol tok promis bilong Jehova i bin helpim ol long sanap strong na no ken les.—Ta. 1:2.
8 Ol dispela gutpela wokman i bin stap paslain long taim bilong Krais i lukluk long gutpela samting bai kamap bihain. Taim ol i kirap bek pinis, ol bai kamap gutpela olgeta na lusim “dispela kalabus bilong bagarap” long rot bilong wok pris bilong Krais Jisas na ol 144,000 nambatu pris. (Ro. 8:21) Na tu, Jeremaia na ol narapela strongpela wokman bilong God long bipo i strongim bel, long wanem Jehova i givim promis long ol, olsem Jeremaia i tok: “Ol dispela man i birua long yu, tasol ol bai i no inap daunim yu. Long wanem, mi yet mi stap wantaim yu na bai mi helpim yu. Mi Bikpela mi tok pinis.” (Jer. 1:19) Long nau, taim yumi tingim ol tok promis bilong God long ol samting bai kamap bihain na ol promis bilong em long lukautim yumi, dispela i strongim bel bilong yumi tu.—Snd. 2:7; ritim 2 Korin 4:17, 18.
Pasin Laikim i Kirapim Jisas Long Autim Tok na i No Pret
9, 10. Long wanem ol rot Jisas i kamapim olsem em i no pret long ai bilong (a) ol hetman bilong lotu, (b) lain soldia, (c) hetpris, (d) Pailat?
9 Jisas, em Man i stap gutpela piksa long yumi, em i kamapim long kain kain rot olsem em i no pret. Olsem: Maski ol man i gat strong na namba ol i nolaik tru long Jisas, Jisas i no mekim sampela tok i daunim strong bilong tok em God i laik ol man i mas save long en. Em i no pret long kamapim long ples klia pasin bilong ol strongpela hetman bilong lotu long tingim ol yet olsem stretpela man na kamapim ol bilip giaman bilong ol. Jisas i tokaut klia olsem God i kotim ol pinis. Wanpela taim em i tok: “Yupela saveman bilong lo na yupela Farisi, yupela lukaut. Yupela i man bilong tupela maus. Yupela i olsem matmat ol i bin penim long waitpela pen. Ausait bilong matmat em i naispela bilong lukim, tasol long insait ol bun bilong man i dai pinis na olgeta samting i doti i pulap i stap. Yupela tu i stap olsem tasol. Ol man i lukim bodi bilong yupela, ol i ting yupela i stretpela man. Tasol long insait yupela i pulap long ol pasin bilong giaman na pasin bilong sakim lo.”—Mt. 23:27, 28.
10 Taim wanpela lain soldia i kam holim Jisas long gaden Getsemani, em i no pret long kamapim em yet long ol. (Jo. 18:3-8) Bihain ol i bringim em i go long kaunsil, na hetpris i givim ol askim long em. Maski em i save olsem hetpris i laik painim eskius bilong kilim em i dai, Jisas i no pret na i tokaut olsem Em i Krais na Pikinini Bilong God. Em i tok ol bai lukim em “i sindaun long han sut bilong God i gat bikpela strong. Na em bai i stap long ol klaut bilong heven na i kam.” (Mk. 14:53, 57-65) Liklik taim bihain long dispela, ol i pasim Jisas long baklain na em i sanap long ai bilong Pailat, em man husat inap long lusim em i go. Tasol Jisas i no bekim ol tok ol i sutim long em. (Mk. 15:1-5) Em i mas i gat strongpela bel tru bilong mekim olsem.
11. Olsem wanem pasin laikim i insait long pasin bilong i no pret?
11 Jisas i tok long Pailat: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.” (Jo. 18:37) Jehova i tokim Jisas long autim gutnius, na Jisas i amamas long mekim olsem, long wanem, em i laikim tru Papa bilong em long heven. (Lu. 4:18, 19) Na tu, Jisas i laikim tru ol manmeri. Em i save olsem laip bilong ol i gat hatwok long en. Na i wankain long yumi, pasin bilong laikim tru God na laikim tru ol manmeri i as na yumi strong tru long autim tok na i no pret.—Mt. 22:36-40.
Holi Spirit i Givim Strong Long Yumi Long Autim Tok na No Ken Pret
12. Wanem samting i mekim ol disaipel bilong bipo i amamas?
12 Long ol wik bihain long Jisas i dai, ol disaipel i amamas long lukim olsem Jehova i bungim ol nupela disaipel long lain bilong ol. Long wanpela de tasol, inap 3,000 Juda na man i bihainim lotu Juda em ol i bilong planti kantri na ol i bin kam long Jerusalem bilong mekim Pentikos, ol i kisim baptais! Ating olgeta man long Jerusalem i bin toktok long dispela samting i kamap! Baibel i tok: “God i wokim planti mirakel long han bilong ol aposel, na olgeta manmeri i lukim, ol i kirap nogut na i pret.”—Ap. 2:41, 43.
13. Bilong wanem ol brata i beten bilong strongim bel na no ken pret? Wanem samting i kamap?
13 Ol hetman bilong lotu i kros nogut tru na ol i holim Pita na Jon, kalabusim ol inap long de bihain, na tokim ol olsem ol i no ken toktok moa long Jisas. Taim ol i lusim kalabus, tupela i go tokim ol brata long ol samting i bin kamap, na olgeta wantaim i beten bilong kisim helpim long karim ol hevi, ol i tok: “Bikpela . . . yu mas helpim mipela ol wokboi bilong yu. Olsem na bai mipela i ken strong tru long autim tok bilong yu, na mipela i no ken pret.” Wanem samting i kamap? “Holi Spirit i pulap long ol, na ol i autim tok bilong God. Ol i tokaut strong na ol i no pret.”—Ap. 4:24-31.
14. Olsem wanem holi spirit i helpim yumi long autim tok?
14 Tingim olsem em holi spirit bilong Jehova i bin helpim ol disaipel long autim strong tok bilong God na ol i no pret. Bilong yumi no ken pret long autim tok i tru long ol narapela, na long ol man i birua long yumi tu, yumi mas kisim strong long Jehova, strong bilong yumi yet i no inap. Jehova inap long givim holi spirit long yumi na em bai mekim olsem, sapos yumi askim em long en. Long rot bilong helpim yumi kisim long Jehova, yumi tu inap kamapim olsem yumi no pret, maski ol man i mekim kain kain pasin birua long yumi.—Ritim Song 138:3.
Ol Kristen Long Nau i Autim Tok na i No Pret
15. Olsem wanem tok i tru i save brukim ol lain long nau?
15 Long nau, olsem long bipo, tok i tru i wok yet long brukim ol lain. Sampela i amamas long harim tok, tasol sampela i no kliagut na i no rispektim pasin bilong yumi long lotuim God. Sampela i toktok planti, tok bilas, o i bel nogut long yumi, olsem Jisas i bin tok profet long en. (Mt. 10:22) Sampela taim ol man i mekim wok long TV samting bilong kamapim ol tok kranki bilong giamanim ol man long ol wok bilong yumi o ol i mekim ol tok bilong nogutim nem bilong yumi. (Sng. 109:1-3) Tasol long olgeta hap, lain bilong Jehova i autim strong gutnius na ol i no pret.
16. Wanem ekspiriens i soim olsem sapos yumi autim strong tok na i no pret, dispela inap senisim tingting bilong ol man em yumi autim tok long ol?
16 Taim yumi autim strong tok na i no pret, dispela inap senisim tingting bilong sampela man long tok bilong Kingdom. Wanpela sista long Kirgistan i tok: “Taim mi autim tok, wanpela man i tokim mi: ‘Mi bilip long God, tasol mi no bilip long dispela God bilong ol Kristen. Sapos yu kam gen long dispela dua, bai mi tokim dok bilong mi long kaikaim yu!’ Long baksait bilong em i gat wanpela strongpela dok i stap long sen. Tasol taim mipela i tilim Kingdom Nius Namba 37, ‘Pinis Bilong Lotu Giaman i Kam Klostu Tru!,’ mi tingting long go bek gen long dispela haus na mi tingting long bungim sampela narapela long famili bilong dispela man. Tasol dispela wankain man i opim dua. Wantu mi beten long Jehova, na mi tok: ‘Moning, mi tingim toktok bilong yumi inap 3-pela de i go pinis, na tu, mi tingim dok bilong yu. Tasol mi no inap abrusim haus bilong yu, long wanem, olsem yu, mi tu i bilip long wanpela trupela God. Klostu nau God bai givim strafe long olgeta lotu i bagarapim nem bilong em. Yu inap kisim sampela save moa long dispela tok taim yu ritim dispela nius.’ Mi kirap nogut, man hia i kisim Kingdom Nius. Orait nau mi go long narapela haus. Sampela minit bihain, dispela man i ran i kam long mi na em i holim Kingdom Nius long han bilong em. Em i tok: ‘Mi ritim pinis. Mi mas mekim wanem bambai mi ken abrusim belhat bilong God?’ ” Man i kirap stadi long Baibel, na em i kirap go long ol miting Kristen.
17. Olsem wanem pasin bilong wanpela sista long sanap strong na i no pret i strongim Baibel sumatin husat i gat pasin bilong pret?
17 Pasin bilong yumi long autim strong tok na i no pret inap strongim tu ol narapela. Long Rasia, wanpela sista i raun long PMV na em i tilim wanpela nius long wanpela pasindia. Orait, nau wanpela man i kirap sanap kwik long sia bilong em, pulim nius long han bilong sista, bagarapim, na tromoi long plua. Em i toknogutim sista, askim sista long atres bilong em na i tokim em olsem em i no inap autim tok long dispela ples. Sista i beten askim Jehova long helpim em, na em i tingim tok bilong Jisas: “Yupela i no ken pret long ol man i save kilim i dai bodi.” (Mt. 10:28) Long pasin isi em i sanap na tokim man hia: “Mi no inap givim atres bilong mi long yu, na mi bai autim tok yet long dispela ples.” Orait nau em i lusim PMV. Sista i no bin save, tasol wanpela Baibel sumatin bilong em i bin stap long PMV. Dispela meri i bin larim pasin bilong pret long man i pasim em long go long ol miting Kristen. Tasol taim em i lukim sista hia i sanap strong na i no pret, dispela Baibel sumatin i kirap go long ol miting.
18. Wanem samting bai helpim yu long strongim bel na autim tok, olsem Jisas i bin mekim?
18 Long dispela graun we ol man i stap longwe long God, yumi mas strongim bel bilong autim tok olsem Jisas i bin mekim. Wanem samting bai helpim yu long mekim olsem? Tingim samting bai kamap bihain. Wok strong long holimpas pasin bilong laikim tru God na ol narapela. Beten askim Jehova long strongim bel bilong yu. Long olgeta taim tingim olsem yu no stap wanpis, Jisas i stap wantaim yu. (Mt. 28:20) Holi spirit bai strongim yu. Na Jehova bai mekim gut long yu na helpim yu. Olsem na yumi mas strongim bel na tok: “Bikpela i save helpim mi na mi no inap pret. Ol man i no inap mekim wanpela samting long mi.”—Hi. 13:6.
Bai Yu Bekim Olsem Wanem?
• Bilong wanem ol wokman bilong God i mas i gat strongpela bel?
• Long pasin bilong no ken pret, yumi ken kisim wanem save long . . .
ol gutpela wokman bilong God i bin stap paslain long Krais?
Jisas Krais?
ol Kristen bilong pastaim?
ol wanbilip Kristen long nau?
[Piksa long pes 21]
Jisas i no pret long kamapim pasin nogut bilong ol hetman bilong lotu
[Piksa long pes 23]
Jehova i strongim bel bilong yumi long autim tok